ବିଧାୟକ ଉମା ସାମନ୍ତରାୟଙ୍କୁ ନୋଟିସ୍, ସପ୍ତାହକ ମଧ୍ୟରେ କାରଣ ଦର୍ଶାଇବାକୁ ନିର୍ଦ୍ଦେଶ
ସତ୍ୟଶିଖା (ପୁରୀ) ୧୦.୧୦.୨୦୨୦ : ସତ୍ୟବାଦୀ ବିଧାୟକ ଉମା ସାମନ୍ତରାୟଙ୍କୁ କାରଣ ଦର୍ଶାଅ ନୋଟିସ୍ । ସପ୍ତାହକ ମଧ୍ୟରେ କାରଣ ଦର୍ଶାଇବାକୁ ନୋଟିସ୍ ଜାରି କରାଯାଇଛି । କୋଭିଡ୍ କରୋନା ପଜିଟିଭ ଥାଇ ମଧ୍ୟ ପ୍ରଦୀପ ମହାରଥୀଙ୍କ ଶେଷକୃତ୍ୟରେ ଯୋଗଦେବା ପାଇଁ ସ୍ୱର୍ଗଦ୍ୱାରକୁ ଯାଇଥିଲେ । ଏନେଇ ପୁରୀ ସମୂଦ୍ରକୂଳ ଥାନାରେ ଅଭିଯୋଗ ହୋଇଥିଲା । ଅଭିଯୋଗ ଆସିବା ପରେ ବିଧାୟକ ଉମା ସାମନ୍ତରାୟ ନିଜ ଭୁଲ ସ୍ବୀକାର କରିଥିଲେ । ସେ କହିଥିଲେ ପିପିଲି ବିଧାୟକ ପ୍ରଦୀପ ମହାରଥୀଙ୍କ ପରଲୋକ ତାଙ୍କୁ ମର୍ମାହତ କରିଥିଲା । କରୋନା ପଜିଟିଭ ଥାଇ ମଧ୍ୟ ପ୍ରଦୀପ ମହାରଥୀଙ୍କ ଶେଷକୃତ୍ୟରେ ଯୋଗଦେବା ପାଇଁ ସ୍ୱର୍ଗଦ୍ୱାରକୁ ଯାଇଥିଲି । ଆଇନର ଉର୍ଦ୍ଧ୍ବରେ କେହି ନାହିଁ । ଯାହା ବି କାର୍ଯ୍ୟାନୁଷ୍ଠାନ ହେବ ମାନିନେବେ ବୋଲି ଉମା ସାମନ୍ତରାୟ କହିଥିଲେ ।
ପିପିଲି ବିଧାୟକ ପ୍ରଦୀପ ମହାରଥୀଙ୍କ ଶେଷକୃତ୍ୟ ସମ୍ପନ୍ନ ସମୟରେ ସ୍ୱର୍ଗଦ୍ୱାରା କୋଭିଡ୍ ନିୟମ ଉଲ୍ଲଂଘନ କରିବା ଅଭିଯୋଗରେ ତାଙ୍କ ବିରୋଧରେ ମାମଲା ରୁଜୁ ହୋଇଥିଲା । ଏ ନେଇ ସୂଚନା ଦେଇଥିଲେ ଏସପି ଅଖିଳେଶ୍ୱର ସିଂହ । ଏସପି କହିଥିଲେ ଯେ, ମନ୍ତ୍ରୀ ସମୀର ଦାଶ ଓ ବିଧାୟକ ଉମା ସାମନ୍ତରାୟଙ୍କ ବିରୋଧରେ ଅଭିଯୋଗ ହୋଇଥିଲା । କିନ୍ତୁ କରୋନା ପଜିଟିଭ୍ ବ୍ୟକ୍ତି ୧୭ ଦିନ କ୍ୱାରେଣ୍ଟାଇନ୍ରେ ରହିବା ନିୟମ ଅନୁଯାୟୀ ମନ୍ତ୍ରୀ ସମୀର ଦାଶ ଠିକ୍ ଥିଲେ । ମନ୍ତ୍ରୀଙ୍କ ପଜିଟିଭ ହେବାକୁ ୨୨ ଦିନ ହୋଇଯାଇଥିଲା । ମନ୍ତ୍ରୀଙ୍କୁ ସରକାର ପ୍ରତିନିଧି ରୂପେ ପଠାଇଥିଲେ । କିନ୍ତୁ ବିଧାୟକ ଏହି ନିୟମ ଉଲ୍ଲଂଘନ କରିଥିଲେ । ତେଣୁ ତାଙ୍କ ବିରୋଧରେ ସମୁଦ୍ରକୂଳ ଥାନାରେ ୨୬୯, ୨୭୦ ଓ ୩ ମହାମାରୀ ଆଇନ୍ ଅନୁଯାୟୀ ମାମଲା (୧୬୧/୨୦) ରୁଜୁ ହୋଇଥିଲା ।
