ରସାୟନ ବିଜ୍ଞାନରେ ଇମାନୁଏଲ ଚାରପେଣ୍ଟିଅର ଓ ଜେନିଫିର ଏ ଡାଉଡନାଙ୍କୁ ନୋବେଲ୍ ପୁରସ୍କାର l
ସତ୍ୟଶିଖା (ଷ୍ଟକହୋମ) ୦୭.୧୦.୨୦୨୦ : ରସାୟନ ବିଜ୍ଞାନରେ ୨୦୨୦ ପାଇଁ ନୋବେଲ ପୁରସ୍କାର ଘୋଷଣା କରାଯାଇଛି । ଜିନୋମ୍ ଏଡିଟିଂ ପାଇଁ ଏକ ପଦ୍ଧତିର ବିକାଶ ଲାଗି ଚଳିତ ଥର ଇମାନୁଏଲ ଚାରପେଣ୍ଟିଅର ଓ ଜେନିଫିର ଏ ଡାଉଡନାଙ୍କୁ ନୋବେଲ୍ ପୁରସ୍କାରରେ ସମ୍ମାନିତ କରାଯିବ । ଏହି ପୁରସ୍କାର ଜରିଆରେ ସେହି କାର୍ଯ୍ୟକୁ ସମ୍ମାନିତ କରାଯାଉଛି, ଯାହାର ବର୍ତ୍ତମାନ ସମୟରେ ଅଧିକ ଉପଯୋଗ କରାଯାଉଛି ।
ଷ୍ଟକହୋମରେ ସ୍ଵିଡିଶ ଏକାଡେମୀ ଅଫ ସାଇସେନ୍ସର କମିଟି ବୁଧବାର ବିଜେତାଙ୍କ ନାମ ଘୋଷଣା କରିଛନ୍ତି । ଗତଥର ରସାୟନ ବିଜ୍ଞାନରେ ଲିଥିୟ-ଆୟନ ବ୍ୟାଟେରୀ ତିଆରି କରିଥିବା ବୈଜ୍ଞାନିକ ଜନ ବି ଗୁଡଇନଫ, ଏମ ଷ୍ଟାନଲି ଓ୍ଵିଟିଙ୍ଘମ ଓ ଅକିରା ୟୋସିନଙ୍କୁ ନୋବେଲ୍ ପୁରସ୍କାର ପ୍ରଦାନ କରାଯାଇଥିଲା । ପୁରସ୍କାର ଭାବେ ସ୍ଵର୍ଣ୍ଣ ପଦକ ଏବଂ ଏକ କୋଟି ସ୍ଵିଡିଶ କ୍ରୋନା(ପ୍ରାୟ ୮.୨୦ କୋଟି ଟଙ୍କା) ଦିଆଯାଏ । ଏହି ପୁରସ୍କାର ସ୍ଵିଡେନର ବୈଜ୍ଞାନିକ ଆଲଫ୍ରେଡ ନୋବେଲଙ୍କ ନାମରେ ଦିଆଯାଏ ।
ଏହା ପୂର୍ବରୁ ବ୍ଲାକ ହୋଲର ସନ୍ଧାନ ପାଇଁ ତିନି ବୈଜ୍ଞାନିକଙ୍କୁ ଚଳିତ ବର୍ଷର ପଦାର୍ଥ ବିଜ୍ଞାନରେ ନୋବେଲ୍ ପୁରସ୍କାର ଦିଆଯାଇଛି । ବ୍ରିଟେନର ରୋଜର ପେନରୋଜଙ୍କୁ ବ୍ଲାକ ହୋଲ୍ ସମ୍ବନ୍ଧିତ ଆବିଷ୍କାର ପାଇଁ ଏବଂ ଜର୍ମାନୀର ରିନହାର୍ଡ ଗେଞ୍ଜେଲ ଓ ଆମେରିକାର ଆଣ୍ଡ୍ରିଆ ଗେଜ୍ଙ୍କୁ ଆକାଶଗଙ୍ଗାର କେନ୍ଦ୍ରରେ ସୁପରମେସିଭ କମ୍ପାକ୍ଟ ଅବଜେକ୍ଟର ସନ୍ଧାନ ପାଇଁ ଏହି ପୁରସ୍କାର ଦିଆଯାଇଛି । ସେହି ପରି ଭେଷଜ ବିଜ୍ଞାନରେ ଆମେରିକାର ବୈଜ୍ଞାନିକ ହାର୍ଭେ ଜେ ଆଲଟର, ଚାର୍ଲ୍ସ ଏମ ରାଇସ୍ ଓ ବ୍ରିଟେନ ଜନ୍ମିତ ବୈଜ୍ଞାନିକ ମାଇକେଲ ହଫଟନଙ୍କୁ ମିଳିତ ଭାବେ ନୋବେଲ୍ ଦେବାକୁ ଘୋଷଣା କରାଯାଇଛି ।
