ଜମି ଜାଲିଆତି କରି ଗିରଫ ହେଲେ ଏନଜିଓ ଡାଇରେକ୍ଟର ଓ ଟ୍ରେଜରର

ସତ୍ୟଶିଖା ( ଢେଙ୍କାନାଳ ): ୧୯।୦୭: ଢେଙ୍କାନାଳ ଜିଲ୍ଲାର ଜନ ଜାଗରଣ କେନ୍ଦ୍ର ନାମକ ଏକ ସ୍ୱେଚ୍ଛାସେବୀ ଅନୁଷ୍ଠାନ(ଏନଜିଓ)ର ନିର୍ଦ୍ଦେଶକ ଓ କୋଷାଧ୍ୟକ୍ଷଙ୍କୁ ପୋଲିସ୍ ଗିରଫ କରି କୋର୍ଟ ଚାଲାଣ କରିଛି। ଏହି ଦୁଇ ଅଧିକାରୀ ୮୮ଲକ୍ଷ ୧୬ହଜାର ୮୧୨ଟଙ୍କା ହେରଫେର କରିଥିବା ଅଭିଯୋଗ ହୋଇଛି।

ଏହି ଦୁଇ ଜଣ ଏନଜିଓର ନିର୍ଦେଶକ ରତିକାନ୍ତ ନାୟକ ଓ ବର୍ତମାନର କୋଷାଧକ୍ଷ ଉପେନ୍ଦ୍ର ନାୟକଙ୍କୁ ଢେଙ୍କାନାଳ ଟାଉନ ପୁଲିସ ଗିରଫ କରି କୋର୍ଟ ଚାଲାଣ କରିଛି । ଏନଜିଓର ପୂର୍ବତନ କୋଷାଧକ୍ଷଙ୍କ ଅଭିଯୋଗକୁ ଭିତ୍ତି କରି ଢେଙ୍କାନାଳ ଏସଡିଜେଏମ କୋର୍ଟଙ୍କ ନିର୍ଦେଶ ମୁତାବକ ଟାଉନ ପୁଲିସ ତଦନ୍ତ କରି ଗିରଫ କରିଥିବା ଜଣାପଡ଼ିଛି ।

ବିଭିନ୍ନ ଜିଲ୍ଲାର ବେକାର ଯୁବକ ଯୁବତୀ ମାନଙ୍କୁ ଦକ୍ଷତା ତାଲିମ ଦେବାପାଇଁ କେନ୍ଦ୍ର ସରକାରଙ୍କ ଅନୁଦାନରେ ସଦର ଥାନା ଅନ୍ତର୍ଗତ ମୁଲିସିଙ୍ଗ ଠାରେ ନିର୍ମିତ ଟ୍ରେନିଂ ସେଣ୍ଟର ଓ ଅଫିସ ଏନଏଚ ସଂପ୍ରସାରଣ ଜମି ଅଧିଗ୍ରହଣ ବାବଦକୁ ଏହି ଟଙ୍କା ମିଳିଥିଲା । ମାତ୍ର ଉକ୍ତ ଟଙ୍କାକୁ ପୁନର୍ବାର ଘର ଓ ଟ୍ରେନିଂ ସେଣ୍ଟର ନିର୍ମାଣ ବଦଳରେ ଜାଲିଆତି କରି ସଂସ୍ଥାର ନିର୍ଦେଶକ ବ୍ୟକ୍ତିଗତ ଭାବେ ପୁଅ ଓ ନିଜ ଆକାଉଣ୍ଟକୁ ନେଇ ଟଙ୍କା ହେରଫେର କରିଥିବା ତଦନ୍ତରୁ ଜଣାପଡିଛି I