ସତ୍ୟଶିଖା ୦୧/୦୯/୨୦୨୫:ଭାରତ-ଚୀନ ସଂପର୍କରେ ଲେଖାହୋଇଛି ନୂଆ ଅଧ୍ୟାୟ । ସାର ବିଶ୍ୱବାସୀଙ୍କ ନଜର ରହିଛି ଏହା ଉପରେ । ହାତୀ-ଡ୍ରାଗନ ଏକାଠି ହେବାକୁ ନେଇ ବିଶ୍ୱ ଦରବାରରେ ଚର୍ଚ୍ଚା । କାରଣ ଦୀର୍ଘ ବର୍ଷ ଧରି ଭାରତ ଓ ଚୀନ୍ ମଧ୍ୟରେ ସମ୍ପର୍କ ଖରାପ ଥିଲା । ତେଣୁ ଏବେ ମୋଦୀଙ୍କ ଗସ୍ତ ଉପରେ ନଜର ରହିବା ସ୍ବାଭାବିକ କଥା । ହେଲେ ଆମେରିକା ଭାରତ ଉପରେ ୫୦ ପ୍ରତିଶତ ଟାରିଫ୍ ଲଗାଇବା ପରେ ଚୀନ୍ ବି ଅସନ୍ତୋଷ ବ୍ୟକ୍ତ କରିଥିଲା । କାରଣ ଚୀନ୍ ଉପରେ ବି ଆମେରିକା ଟାରିଫ୍ ଲଗାଇଥିଲା ।
କିନ୍ତୁ ବଡ଼ କଥା ହେଉଛି ଭାରତ ଓ ଚୀନ୍ ସମ୍ପର୍କରେ ଏବେ ସୁଧାର ଆସିଛି । ତେବେ ନୂଆ ସଂପର୍କ ଭିତରେ ନଜର ଆସିଛି ମୋଦୀ-ଜିନ୍ପିଙ୍ଗ ଦୋସ୍ତାନା । ସଂପର୍କ ଏତେ ଗଭୀର ହୋଇଛି ଯେ, ଚୀନ୍ ରାଷ୍ଟ୍ରପତି ମୋଦୀଙ୍କୁ ଭେଟି ଦେଇଛନ୍ତି ନିଜ ପସନ୍ଦର କାର । ସେପଟେ ତିନି ମହାଶକ୍ତିଙ୍କୁ ଏକାଠି ଦେଖି ରକ୍ତ ଚାଉଳ ଚୋବାଉଛି ଶକ୍ତିଶାଳୀ ରାଷ୍ଟ୍ର ଆମେରିକା ।ଆମେରିକାର ଟାରିଫ୍ ଓ୍ୱାରକୁ ଦେଖି ଡରୁନାହାଁନ୍ତି ଋଷିଆ-ଚୀନ ଓ ଭାରତ । ସେଇଥି ଲାଗି ତ ତିନିରାଷ୍ଟ୍ରର ନେତା ଏବେ ହାତ ମିଳାଉଛନ୍ତି। କେମିତି ଆମେରିକାକୁ ଚେକ୍ ଦିଆଯିବ ସେନେଇ ମାଷ୍ଟର ପ୍ଲାନ୍ ବି ହେଉଛି । ଖାସ୍ କରି ମୋଦୀଙ୍କ ଚୀନ୍ ଗସ୍ତ ଏବେ ପୂରା ବିଶ୍ବରେ ଚର୍ଚ୍ଚା ଚାଲିଥିବା ବେଳେ ଆମେରିକା ବି ନଜର ରଖିଛି । ମୋଦୀ ଚୀନ୍ରେ ପହଞ୍ଚିବା ପରେ ତାଙ୍କୁ ଭବ୍ୟ ସ୍ବାଗତ କରାଯାଇଥିଲା । ଖାଲି ଏତିକି ନୁହେଁ ବରଂ ଅନେକ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ବି ହୋଇଥିଲା ।
ଜିନପିଙ୍ଗ ପୁଟିନ୍ଙ୍କୁ ଏକ କାର୍ ଗିଫ୍ଟ ଦେଇଥିଲେ ଆଉ ମୋଦୀଙ୍କୁ ବି ଗିଫ୍ଟ ଦେଇଛନ୍ତି । ଯାହା ସ୍ପଷ୍ଟ କରୁଛି କି ଚୀନ୍ ଋଷିଆ ଓ ଭାରତକୁ ଗୋଟିଏ ନଜରରେ ଦେଖୁଛନ୍ତ । ମୋଦୀଙ୍କୁ ଚୀନ୍ ରାଷ୍ଟ୍ରପତି ଯେଉଁ କାର୍ ଦେଇଛନ୍ତି ତାହାକୁ ନେଇ ବି ଜୋରଦାର ଆଲୋଚନା ହୋଇଛି । ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁସାରେ, ଏହି କାର୍ ଚୀନ୍ର ବ୍ରାଣ୍ଡ ଅଟେ । ସାଧାରଣ ଭାବରେ ଏହି କାର୍ ଚୀନ୍ର ବଡ଼ ନେତା ଓ ବିଦେଶୀ ଅତିଥିଙ୍କ ପାଇଁ ବ୍ୟବହାର କରାଯାଏ ।
ଚୀନ୍ ନିଜସ୍ବ ଜ୍ଞାନକୌଶଳରେ ଏହି କାର୍ ନିର୍ମାଣ କରିଛି । ଏହା କାର୍ରେ ଅତ୍ୟାଧୁନିକ ସୁରକ୍ଷା ବ୍ୟବସ୍ଥା ବି ରହିଛି । ତେବେ ଏହି କାର୍ ଚୀନ୍ ମୋଦୀଙ୍କୁ ଦେବା ପରେ ଗୋଟିଏ କଥା ସ୍ପଷ୍ଟ ହେଉଛି କି, ଭାରତ ଉପରେ ଏବେ ପୂର୍ଣ୍ଣ ବିଶ୍ବାସ କରୁଛି ଚୀନ୍ । ଖାଲି ବିଶ୍ବାସ କରୁଛି ତାହା ନୁହେଁ ବରଂ ଆଗାମୀ ଦିନରେ ଉଭୟ ଦେଶ ମିଳିତ ଭାବରେ କାମ କରିବାକୁ ନିଷ୍ପତ୍ତି ନେଇଥିବା ସ୍ପଷ୍ଟ ହୋଇଛି । ତେବେ ଚୀନ୍ ଓ ଭାରତ ମଧ୍ୟରେ ସମ୍ପର୍କ ସୁଧୁରୁଥିବାରୁ ଆମେରିକା ଟେନ୍ସନ୍ରେ ପଡ଼ିଯାଇଛି । ସେପଟେ ଏହି ସମୟରେ, ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ମଧ୍ୟ ଶିଖର ସମ୍ମିଳନୀ ପାଇଁ ତିଆନଜିନରେ ପହଞ୍ଚିଛନ୍ତି । ସେ ତାଙ୍କର କାର “ଅରୁସ” ଆଣିଛନ୍ତି ଏବଂ ଏଥିରେ ଯାତ୍ରା କରୁଛନ୍ତି। ଏହି କାରଟି ରୁଷ ଅଟୋମୋବାଇଲ କମ୍ପାନୀ ଅରୁସ ମୋଟର୍ସ ଦ୍ୱାରା ନିର୍ମିତ । ଏହା ରେଟ୍ରୋ-ଷ୍ଟାଇଲ୍ ଲଗଜରୀ ବୈଶିଷ୍ଟ୍ୟ ସହିତ ସଜ୍ଜିତ। ଏହି ସମୟ ମଧ୍ୟରେ, ତାଙ୍କ କାରକୁ ଏକ ଚୀନ୍ କୂଟନୈତିକ ନମ୍ବର ପ୍ଲେଟ୍ ଦିଆଯାଇଛି।
ସେହି ସମୟରେ, ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ଭାରତ ପାରସ୍ପରିକ ବିଶ୍ୱାସ, ସମ୍ମାନ ଓ ସମ୍ବେଦନଶୀଳତା ଆଧାରରେ ଚୀନ୍ ସହିତ ସମ୍ପର୍କକୁ ଆଗକୁ ନେବା ପାଇଁ ପ୍ରତିବଦ୍ଧ। ସେ ଏହା ମଧ୍ୟ କହିଛନ୍ତି ଯେ ଭାରତ ଏବଂ ଚୀନ୍ ମଧ୍ୟରେ ସହଯୋଗ ୨.୮ ବିଲିୟନ ଲୋକଙ୍କ ସ୍ୱାର୍ଥ ସହିତ ଜଡିତ ଓ ଏହା ସମଗ୍ର ମାନବଜାତିର କଲ୍ୟାଣ ପାଇଁ ପଥ ଖୋଲିପାରେ।ପ୍ରଧାନମନ୍ତ୍ରୀ ମୋଦି ତାଙ୍କ ଉଦଘାଟନୀ ଭାଷଣରେ ଏହା ମଧ୍ୟ କହିଛନ୍ତି ଯେ ସୀମାରୁ ସୈନ୍ୟ ପ୍ରତ୍ୟାହାର ଦୁଇ ଦେଶ ମଧ୍ୟରେ ଶାନ୍ତି ଏବଂ ସ୍ଥିରତାର ବାତାବରଣ ସୃଷ୍ଟି କରିଛି। ଏହି ବୈଠକ ଏପରି ଏକ ସମୟରେ ହୋଇଥିଲା ଯେତେବେଳେ ବିଶ୍ୱ ଆମେରିକା ଏବଂ ଚୀନ୍ ମଧ୍ୟରେ ଟିକସ ବିବାଦ ଯୋଗୁଁ ସୃଷ୍ଟି ହୋଇଥିବା ଅଶାନ୍ତିର ସାକ୍ଷୀ ହେଉଛି। ଏହି ସମୟରେ, ଭାରତ ଏବଂ ଚୀନ୍ ନିକଟତର ହେବା ବିଶେଷ ଗୁରୁତ୍ୱ ରଖେ।
-
-
-
-
-
-
-
-
-
-
