ସତ୍ୟଶିଖା(ଭୁବନେଶ୍ୱର) ୦୩ .୦୭.୨୦୨୧: ରାଜ୍ୟ ଯୁବ ବିଜେଡି ସଭାପତି ତଥା ଚାନ୍ଦବାଲି ବିଧାୟକ ବ୍ୟୋମକେଶ ରାୟ ଦ୍ୱିତୀୟ ବିବାହ କରିଛନ୍ତି । ଏଥିପାଇଁ ବହୁଦିନ ପୂର୍ବରୁ ନିର୍ବନ୍ଧ ସରିଥିଲେ ବି କରୋନା କାରଣରୁ ବାହାଘର ଘୁଞ୍ଚି ଚାଲିଥିଲା ! ଆଜି ଏକ ହୋଟେଲରେ ବିବାହ ଉତ୍ସବ ଅନୁଷ୍ଠିତ ହୋଇଛି । ନିରାଡମ୍ବର ସହ ବାହାଘର ହୋଇଛି ! ପରେ ଅତିଥିଙ୍କୁ ଏକ ସ୍ବତନ୍ତ୍ର ଉତ୍ସବରେ ବାହାଘର ଭୋଜି ଦିଆଯିବ ବୋଲି ଜାଣିବାକୁ ମିଳିଛି ! ମିଳିଥିବା ସୂଚନା ଅନୁସାରେ, କରୋନା କଟକଣା ପାଇଁ କେବଳ ବର ଓ କନ୍ୟାପକ୍ଷ ପରିବାରଙ୍କୁ ନେଇ ବିବାହ ଉତ୍ସବ ସମ୍ପନ୍ନ ହୋଇଥିଲା । ଚାନ୍ଦବାଲି ନିର୍ବାଚନମଣ୍ଡଳୀରେ ବିଜେଡିର ଜଣେ ଘନିଷ୍ଠ ସହଯୋଗୀଙ୍କ କନ୍ୟାଙ୍କ ସହ ତାଙ୍କର ବିବାହ ହୋଇଛି । ପ୍ରକାଶଥାଉକି, ବିଧାୟକ ଶ୍ରୀ ରାୟ ୨୦୧୪ ମସିହାରେ ନିଜ ବାନ୍ଧବୀ ନୀଳିମା ପ୍ରଧାନଙ୍କୁ ବିବାହ କରିଥିଲେ । ବିବାହର କିଛି ବର୍ଷ ପରେ ନୀଳିମା ରୋଗରେ ଆକ୍ରାନ୍ତ ହୋଇ ଚିକିତ୍ସାଧୀନ ଥିବା ବେଳେ ୨୦୨୦ ଫେବୃୟାରୀ ୩ ତାରିଖରେ ତାଙ୍କର ଦେହାନ୍ତ ହୋଇ ଯାଇଥିଲା ।
