ସତ୍ୟଶିଖା( କାଠମାଣ୍ଡୁ )୩୦.୦୫.୨୦୨୨ :: ନେପାଳରେ ନିଖୋଜ ହୋଇଥିବା ବିମାନ ତାରା ୯NAETର ସନ୍ଧାନ ମିଳିଛି । ନେପାଳର ସେନା ପକ୍ଷରୁ ବିମାନଟିକୁ ଠାବ କରାଯାଇଥିବା ବେଳେ ବିମାନଟି ଦୁର୍ଘଟଣା ଘଟି ସମ୍ପୂର୍ଣ୍ଣ ନଷ୍ଟ ହୋଇଯାଇଛି । ଏନେଇ ନେପାଳ ସେନା ପକ୍ଷରୁ ଟ୍ୱିଟ୍ କରି ସୂଚନା ଦିଆଯାଇଥିବା ବେଳେ ବର୍ତ୍ତମାନ ଦୁର୍ଘଟଣାକୁ ନେଇ ତଦନ୍ତ ଚାଲିଛି ବୋଲି କହିଛି ସେନା । ଏନେଇ ସେନାର ମୁଖପାତ୍ର ଟ୍ୱିଟକରି କହିଛନ୍ତି ଉଦ୍ଧାରକାରୀ ଦଳ ନିଖୋଜ ବିମାନର ଦୁର୍ଘଟଣାସ୍ଥଳ ଚିହ୍ନଟ କରିଛନ୍ତି । ରବିବାର ଦିନ ବିମାନ ତାରା ୯NAET ଉଡାଣ ଭରିବା ପରେ ମୁସ୍ତାଙ୍ଗ ଜିଲ୍ଲାର କୋଓ୍ୱାଙ୍ଗ ଗାଁ ନିକଟରେ ଦୁର୍ଘଟଣା ହୋଇଛି । ସେଠାକାର ଲୋକମାନେ ବିସ୍ଫୋରଣ ପରି ଏକ ଛୋଟ ଶବ୍ଦ ଶୁଣିଛନ୍ତି ।
ସୂଚନାଥାଉ କି ଗତକାଲି ନେପାଳରେ ବିମାନ ତାରା ୯NAET ଉଡାଣର ଏକ ଘଣ୍ଟା ପରେ ନିଖୋଜ ହୋଇଯାଇଥିଲା। ତାରା ୯NAET ସକାଳ ୯ଟା ୫୫ରେ ଉଡାଣ ଆରମ୍ଭ କରିଥିଲା । ବିମାନଟିରେ ମୋଟ୍ ୨୨ଜଣ ଯାତ୍ରୀ ଥିବା ବେଳେ ସେମାନଙ୍କ ମଧ୍ୟରେ ୪ ଭାରତୀୟ ଓ ୩ ଜାପାନୀ ଯାତ୍ରୀ ଥିଲେ । ପରେ ସମସ୍ତ ୪ଭାରତୀୟ ଭୁବନେଶ୍ୱରର ଗୋଟିଏ ପରିବାରର ସଦସ୍ୟ ବୋଲି ଜଣାପଡ଼ିଥିଲା ।
