ମହଙ୍ଗା ହେଲା କ୍ଷୀର, ଚିନି, ଚା’ପତି

ସତ୍ୟଶିଖା(ନୂଆଦିଲ୍ଲୀ) ୦୭/୧୨/୨୦୨୦ : ସାଧାରଣ ଜନତାଙ୍କ ରୋଷେଇ ଘର ଉପରେ ଲଗାତାର ମହଙ୍ଗା ମାଡ ବଢିଚାଲିଛି । ପନିପରିବା, ଡାଲି ଓ ତେଲ ପରେ ଏବେ ଚିନି, କ୍ଷୀର ଓ ଚା’ପତି ଦର ବୃଦ୍ଧି ପାଇଛି । ଉପଭୋକ୍ତା ମନ୍ତ୍ରାଳୟ ୱେବସାଇଟରେ ଦିଆଯାଇଥିବା ତାଲିକା ଅନୁଯାୟୀ, ନଭେମ୍ବର ୩୦ ତାରିଖରେ ଦେଶରେ ଖୁଚୁରା ବଜାରରେ ଚିନି ଦାମ କିଲୋ ପ୍ରତି ହାରାହାରି ୩୯.୬୮ ଟଙ୍କା ଥିଲା । କିନ୍ତୁ ଡିସେମ୍ବର ୭ ତାରିଖ ସୁଦ୍ଧା ଏହା ବୃଦ୍ଧି ପାଇ ୪୩ ଟଙ୍କା ୩୮ ପଇସା ହୋଇଯାଇଛି । ଖୋଲା ଚା’ପତି ଦାମ୍ ମଧ୍ୟ ପାଖାପାଖି ୧୧.୫୭ ପ୍ରତିଶତ ବୃଦ୍ଧି ପାଇଛି । ଚା’ପତି ଦାମ ୨୩୮ ଟଙ୍କାରୁ ୨୬୬ ଟଙ୍କା ହୋଇଛି । କ୍ଷୀର ଦାମ୍ ମଧ୍ୟ ପାଖାପାଖି ୭ ପ୍ରତିଶତ ବୃଦ୍ଧି ପାଇଛି । କ୍ଷୀର ଲିଟର ପ୍ରତି ୪୬.୭୪ ଟଙ୍କାରୁ ୫୦ ଟଙ୍କା ହୋଇଛି ।ସୂଚନା ଅନୁଯାୟୀ, କିଛି ଦିନ ହେଲା ଟମାଟୋ ଦାମ ମଧ୍ୟ ବୃଦ୍ଧି ପାଇଛି । ଡିସେମ୍ବର ମାସରେ ଟମାଟୋ ଦର ୩୭.୮୭ ପ୍ରତିଶତ ବୃଦ୍ଧି ପାଇଛି । ଖୁଚୁରା ବଜାରରେ ଟମାଟୋ କିଲୋ ପ୍ରତି ୫୦ ଟଙ୍କାରେ ବିକ୍ରି ହେଉଛି । ନଭେମ୍ବର ୩୦ ତାରିଖ ସୁଦ୍ଧା ଟମାଟୋ କିଲୋ ପ୍ରତି ପାଖାପାଖି ୩୬ ଟଙ୍କା ଥିଲା । ଖାଇବା ତେଲ ଦାମ ହ୍ରାସ ପାଇଥିବା ନଜର ଆସିଛି । ପାମ୍ ତେଲ ପ୍ୟାକେଟ୍ ୧୦୨ ରୁ ୯୨ ଟଙ୍କା ହୋଇଛି । ତାଛଡା ସୂର୍ଯ୍ୟମୁଖୀ ତେଲ ୧୨୪ ରୁ ଖସି ୧୨୩ ଟଙ୍କା ହୋଇଛି lବାଦାମ୍ ତେଲ ୧୫୬ ରୁ ୧୪୫ ଟଙ୍କା ହୋଇଥିବାବେଳେ ସୋରିଷ ତେଲ ୧୩୫ ଟଙ୍କାରୁ ୧୩୨ ଟଙ୍କାକୁ ଖସିଛି । ସୋୟାବିନ୍ ତେଲ ୬ ପ୍ରତିଶତ ବୃଦ୍ଧି ପାଇଛି।ମନ୍ତ୍ରାଳୟ ଜାରି କରିଥିବା ତାଲିକା ଅନୁଯାୟୀ, ସାଧାରଣ ଜନତାଙ୍କୁ ଗହମ, ଅଟା ଓ ଚାଉଳ ଦାମରେ ଆଶ୍ବସ୍ତି ମିଳିଛି। ଗହମ ଦାମ ପାଖାପାଖି ୧୯.୪୫ ପ୍ରତିଶତ ହ୍ରାସ ପାଇଛି। ଗହମ କିଲୋ ପ୍ରତି ୨୯ ରୁ ୨୪ ଟଙ୍କାକୁ ଖସିଛି। ଖୁଚୁରା ବଜାରରେ ଅଟା ଦାମ ୩୨ ରୁ ୨୮ ଟଙ୍କାକୁ ଖସିଛି। ଚଣା ଓ ମୁଗ ଡାଲି ଶସ୍ତା ହୋଇଛି।