ସତ୍ୟଶିଖା( କିବ୍ )୧୦.୧୦.୨୦୨୨: ରୁଷ୍କୁ ସଂଯୋଗ କରୁଥିବା କ୍ରାଇମିଆ ସେତୁରେ ମାରାତ୍ମକ ବିସ୍ଫୋରଣ ପାଇଁ ମସ୍କୋ ୟୁକ୍ରେନ୍କୁ ଦାୟୀ କରିବାର ଦୁଇ ଦିନ ପରେ ଆଜି ପ୍ରଚଣ୍ଡ କ୍ଷେପଣାସ୍ତ୍ର ମାଡ଼ରେ ରାଜଧାନୀ କିବ୍ ଥରି ଉଠୁଥିବା କଥା ବିଭିନ୍ନ ଗଣମାଧ୍ୟମ ରିପୋର୍ଟ କରିଛନ୍ତି।
ଆଜି ୟୁକ୍ରେନ୍ର ପ୍ରେସିଡେନ୍ସି କହିଛି, ୟୁକ୍ରେନ୍ର ଅନେକ ସହର ଉପରେ କ୍ଷେପଣାସ୍ତ୍ର ଆକ୍ରମଣ ହେଉଛି। ରାଷ୍ଟ୍ରପତିଙ୍କ କାର୍ଯ୍ୟାଳୟର ଉପମୁଖ୍ୟ କିରିଲୋ ତିମୋସେଙ୍କୋ ସାମାଜିକ ଗଣମାଧ୍ୟମରେ ଜନସାଧାରଣଙ୍କୁ ଆଶ୍ରୟସ୍ଥଳକୁ ଚାଲିଯିବାକୁ ଅନୁରୋଧ କରି କହିଛନ୍ତି, ୟୁକ୍ରେନ୍ ଉପରେ କ୍ଷେପଣାସ୍ତ୍ର ଆକ୍ରମଣ ଚାଲିଛି। ଦେଶର ଅନେକ ସହର ଉପରେ କ୍ଷେପଣାସ୍ତ୍ର ପଡୁଥିବା ଖବର ଆସୁଛି।
ଟେଲିଗ୍ରାମ୍ ମେସେଞ୍ଜିଙ୍ଗ୍ ଆପ୍ରେ ୟୁକ୍ରେନୀୟ ରାଷ୍ଟ୍ରପତି ଜେଲେନ୍ସ୍କି କହିଛନ୍ତି, ସେମାନେ ଆମକୁ ପୃଥିବୀରୁ ନିଶ୍ଚିହ୍ନ କରିଦେବାକୁ ଉଦ୍ୟମ କରୁଛନ୍ତି। ଜାପରିଝ୍ଝିଆ ନଗରୀ ବାସଭବନରେ ଶୋଇଥିବା ଆମ ଜନତାଙ୍କୁ ଧ୍ବଂସ କରିଛନ୍ତି। ନିପ୍ରୋ ଓ କିବ୍ରେ କାର୍ଯ୍ୟକ୍ଷେତ୍ରକୁ ଯାଉଥିବା ଲୋକଙ୍କୁ ହତ୍ୟା କରିଛନ୍ତି।
ସକାଳ ପ୍ରାୟ ୮.୧୫ରେ କିବ୍ରେ ଅନ୍ୟୂନ ୫ଟି ବିସ୍ଫୋରଣ ହୋଇଛି। ବିସ୍ଫୋରଣସ୍ଥଳ ଅଭିମୁଖେ ଆମ୍ବୁଲାନ୍ସ୍ ଯାଉଥିବା କଥା ସେଠାରେ ଥିବା ଗଣମାଧ୍ୟମ ପ୍ରତିନିଧି ଦେଖିଥିବା ରିପୋର୍ଟ କରିଛନ୍ତି।
ସାମାଜିକ ଗଣମାଧ୍ୟମରେ କିବ୍ ମେୟର୍ ଭିତାଲି କ୍ଲିତ୍ସ୍ଚ୍କୋ କହିଛନ୍ତି, ରାଜଧାନୀର କେନ୍ଦ୍ରାଞ୍ଚଳ ଶେଭ୍ଚେଙ୍କିଭ୍ସ୍କି ଜିଲ୍ଲାରେ କେତେଗୁଡ଼ିଏ ବିସ୍ଫୋରଣ ଘଟିଛି। ସାମାଜିକ ଗଣମାଧ୍ୟମରେ ପୋଷ୍ଟ୍ ହୋଇଥିବା ଭିଡିଓଗୁଡ଼ିକରେ ଦେଖାଯାଉଛି ସହରର ଅନେକ ଅଞ୍ଚଳରୁ କଳାଧୂଆଁ ଉଠୁଛି।
ସମ୍ବାଦ ସରବରାହ ସଂସ୍ଥାନ ‘ସ୍ପୁଟ୍ନିକ୍’ ରିପୋର୍ଟ କରିଛି, ସହରର ଗୁରୁତ୍ବପୂର୍ଣ୍ଣ ଭିତ୍ତିଭୂମି ଉପରେ କେତେଗୁଡ଼ିଏ କ୍ଷେପଣାସ୍ତ୍ର ପକାଯାଇଛି। ଲୋକେ ଆହତ ହୋଇଛନ୍ତି। କିନ୍ତୁ, ସମସ୍ତ ଆଞ୍ଚଳିକ ସେବା ପ୍ରଦାନ ଜାରି ରହିଛି।
ୟୁକ୍ରେନ୍ ଗୃହ ମନ୍ତ୍ରାଳୟର ଉପଦେଷ୍ଟା ଆଣ୍ଟୋନ୍ ଗେରାସ୍ଚଚେଙ୍କୋ ଟୁଇଟର୍ରେ ଲେଖିଛନ୍ତି ଯେ, କିବ୍ରେ ପଡ଼ିଥିବା ରକେଟ୍ଗୁଡ଼ିକରୁ ଗୋଟାଏ ଭ୍ଲାଦିମିର୍ସ୍କାୟା ପଥରେ ଥିବା ମଖାଇଲ୍ ଗ୍ରୁସେଭ୍ସ୍କି ସ୍ମାରକୀ ନିକଟରେ ପଡ଼ିଛି। ଏହି ପଥରେ ୟୁକ୍ରେନ୍ର ନିରାପତ୍ତା ସେବା ସବୁ ଅବସ୍ଥିତ ଏବଂ ନିକଟବର୍ତ୍ତୀ ଅଞ୍ଚଳରେ ରାଷ୍ଟ୍ରପତି ଭୋଲୋଦିମିର୍ ଜେଲେନ୍ସ୍କିଙ୍କ କାର୍ଯ୍ୟାଳୟ ବି ରହିଛି।
କ୍ଷେପଣାସ୍ତ୍ର ବିସ୍ଫୋରଣ ଯୋଗୁଁ ରାଜଧାନୀରେ ୫ଜଣ ସାଧାରଣ ଜନତା ନିହତ ଓ ୧୨ଜଣ ଆହତ ହୋଇଥିବା କଥା ସେ କହିଛନ୍ତି।
