ସତ୍ୟଶିଖା( ମାହାଙ୍ଗା)୧୯.୦୪.୨୦୨୨ : କଟକ ଜିଲ୍ଲା ମାହାଙ୍ଗା ବ୍ଲକ୍ କୁସୁପୁର ଗଣହତ୍ୟା ମାମଲାରେ ଆଜି ୫ ଜଣଙ୍କ ଶବ ବ୍ୟବଚ୍ଛେଦ ରିପୋର୍ଟ ଆସିଥିବା ବେଳେ ପ୍ରାଥମିକ ତଦନ୍ତରୁ ଦେହର ବିଭିନ୍ନ ସ୍ଥାନରେ କ୍ଷତ ଚିହ୍ନ ରହିଥିବା ସ୍ପଷ୍ଟ ହୋଇଛି । ତେବେ ନିଶା ଦେବା ପରେ ହତ୍ୟା କରାଯାଇଥିବା ନେଇ ଯେଉଁ ସନ୍ଦେହ କରାଯାଉଥିଲା ସେ ସମ୍ପର୍କରେ କିଛି ସ୍ପଷ୍ଟ ହୋଇନାହିଁ । ଶିବ ଏକା ଏବଂ ଯୋଜନାବଦ୍ଧ ଭାବେ ହିଁ ହତ୍ୟା କରିଛି ବୋଲି କୁହାଯାଉଛି ।
ସୂଚନା ଯୋଗ୍ୟ ଗତ ୯ ତାରିଖରେ ଅଭିଯୁକ୍ତ ଶିବ ପ୍ରସାଦ ସାହୁ ଜମିଜମା ବିବାଦକୁ ନେଇ ତା’ ବଡ଼ ଭାଇ ଅଲେଖ ସାହୁଙ୍କ ସମେତ ଭାଉଜ, ଦୁଇ ପୁତୁରା ଏବଂ ଝିଆରୀକୁ ହତ୍ୟା କରିଥିଲା । ଏକ କଟୁରୀ ଯୋଗେ ପରିବାରର ୫ ସଦସ୍ୟକୁ ଅତି ନିର୍ମମ ଭାବେ ହାତି ହତ୍ୟା କରିଥିଲା । ଘଟଣା ଦିନ ଶିବର ପତ୍ନୀ ସୁନୀତା କଟୁରୀ ନେଇ କେଉଁ ଆଡ଼େ ଯାଉଛ ବୋଲି ପଚାରିବାରୁ, ମୁଁ ଅଲେଖର ସମ୍ପୂର୍ଣ୍ଣ ପରିବାରକୁ ହତ୍ୟା କରିବାକୁ ଯାଉଛି ବୋଲି ପ୍ରତିଶୋଧ ପରାୟଣ ହୋଇ ପ୍ରକାଶ କରିଥିଲା । ସୁନୀତା କାନ୍ଦି କାନ୍ଦି ଏପରି ନକରିବାକୁ କହିଥିଲେ ମଧ୍ୟ ରକ୍ତମୁଖା ହୋଇଥିବା ଶିବ ସୁନୀତାଙ୍କ କୌଣସି କଥା ଶୁଣିନଥିଲା ଏବଂ ତାଙ୍କୁ ଘର ଭିତରେ କବାଟ ବନ୍ଦ କରି ଅଲେଖଙ୍କ ସହ ଯାଇ ପୁଣି ଗଣ୍ଡଗୋଳ ଆରମ୍ଭ କରିଥିଲା । ପରେ ଏକ କଟୁରୀ ଯୋଗେ ପରିବାରର ସମସ୍ତ ସଦସ୍ୟଙ୍କୁ ହତ୍ୟା କରିବା ସହ ଏକ କୋଠରୀରେ ତାଲା ପକାଇ ଦେଇଥିଲା । ସେଠାରୁ ଫେରି ପତ୍ନୀ ସୁନୀତାଙ୍କୁ ମଧ୍ୟ ଧମକାଇଥିଲା ଯେ, ତୁ ଏଠାରୁ ପଳା ନହେଲେ ତତେ ମାରିଦେବି । ପରେ ଶିବ ସେଠାରୁ ଯାଇ ଯାଜପୁର ଜିଲ୍ଲା ପାଣିକୋଇଲି ଥାନାରେ ନିଜକୁ ଆତ୍ମସମର୍ପଣ କରିଥିଲା । ତେବେ ଆତ୍ମ ସମର୍ପଣ ପୂର୍ବରୁ ସେ ଏକ ଭିଡିଓ ଜାରି କରି ନିଜ ଦୋଷ ସ୍ୱୀକାର କରିଥିଲା ।
