୨୦ ଜିଲ୍ଲାକୁ ମାଡ଼ିଲାଣି ଡେଙ୍ଗୁ, ଦକ୍ଷିଣ ଓଡ଼ିଶା ପାଇଁ ଆଣିପାରେ ବିପଦ

 
ସତ୍ୟଶିଖା( ଭୁବନେଶ୍ୱର )୦୨ .୦୭ . ୨୦୨୨:  ରାଜ୍ୟରେ ଏ ପର୍ଯ୍ୟନ୍ତ ଠିକ୍‌ରେ ମୌସୁମୀ ବର୍ଷା ଆରମ୍ଭ ହୋଇନାହିଁ। ହେଲେ ୨୦ ଜିଲ୍ଲାକୁ ଡେଙ୍ଗୁ ବ୍ୟାପି ଗଲାଣି। ଉପକୂଳ ଓଡ଼ିଶାର ଖୋର୍ଧା ଜିଲ୍ଲାକୁ ବାଦ୍ ଦେଲେ ଦକ୍ଷିଣ ଓଡ଼ିଶାର ଏକାଧିକ ଜିଲ୍ଲା ଏବେ ଡେଙ୍ଗୁ କବଳରେ ରହିଛି। ଏବେଠାରୁ ଯଦି ଡେଙ୍ଗୁ ନିୟନ୍ତ୍ରଣ ନେଇ ପଦକ୍ଷେପ ନିଆ ନ ଯାଏ ଆସନ୍ତା ୩/୪ମାସ ଡେଙ୍ଗୁ ବିସ୍ଫୋରଣ ହୋଇପାରେ ବୋଲି ଆଶଙ୍କା କରାଯାଉଛି। ଡେଙ୍ଗୁ ଏବେ ବି ଓଡ଼ିଶା ପାଇଁ ଏକ ପ୍ରମୁଖ ଜନସ୍ବାସ୍ଥ୍ୟ ସମସ୍ୟା ହୋଇ ରହିଛି। କେଉଁ ବର୍ଷ କମୁଛି ତ ଆଉ କେଉଁ ବର୍ଷ ମାଡ଼ୁଛି। ହେଲେ ସ୍ବାଇନ୍ ଫ୍ଲୁ କିମ୍ବା ଜେଇ ଭଳି ନିୟନ୍ତ୍ରଣକୁ ଆସିନାହିଁ। ରାଜ୍ୟ ସରକାର ମ୍ୟାଲେରିଆ ନିୟନ୍ତ୍ରଣ ଉପରେ ବିଶେଷ ଗୁରୁତ୍ବ ଦେଉଥିବା ବେଳେ ଡେଙ୍ଗୁ ପାଇଁ ସେଭଳି ପଦକ୍ଷେପ ନିଆଯାଇନି। ମ୍ୟାଲେରିଆ ପାଇଁ ସ୍ବାସ୍ଥ୍ୟ ବିଭାଗ ପକ୍ଷରୁ ‘ଦମନ’ ଭଳି କାର୍ଯ୍ୟକ୍ରମ ଆରମ୍ଭ ହୋଇଛି। ହେଲେ ଡେଙ୍ଗୁ ନିୟନ୍ତ୍ରଣ ପାଇଁ ‌ସ୍ବାସ୍ଥ୍ୟ କେବଳ ଚିଠି ଲେଖି ସଚେତନ କରୁଥିବା ବେଳେ ଜିଲ୍ଲାସ୍ତରରେ ଆବଶ୍ୟକ ପଦକ୍ଷେପ ନିଆଯାଉନାହିଁ। ଗତମାସ ୨୧ତାରିଖଠାରୁ ୩ମାସ ଯାଏ ରାଜ୍ୟ ସରକାର ଇଣ୍ଟିଗ୍ରେଟେଡ୍‌ ଡିଜିଜ୍ ସର୍ଭେଲାନ୍‌ସ ଆରମ୍ଭ କରିଛନ୍ତି। ଏଥିରେ ଅନ୍ୟ ରୋଗ ସହ ଡେଙ୍ଗୁର ଚିହ୍ନଟ ଉପରେ ମଧ୍ୟ ଗୁରୁତ୍ବ ଦିଆଯାଇଛି। ସେହିପରି ରାଜ୍ୟରେ ଡେଙ୍ଗୁର ନମୁନା ପରୀକ୍ଷାକୁ ନେଇ ବର୍ଷ ବର୍ଷ ଧରି ବିବାଦ ଜାରି ରହିଛି। ଯାହାଫଳରେ ଡେଙ୍ଗୁରେ ମୃତ୍ୟୁ ହେଲେ ମଧ୍ୟ ତାହାକୁ ରାଜ୍ୟ ସରକାର ଗ୍ରହଣ କରୁ ନାହାନ୍ତି।