ସତ୍ୟଶିଖା (ଲମତାପୁଟ) ୪/୧୧/୨୦୨୦ : କୋରାପୁଟ ଜିଲ୍ଲା ଲମତାପୁଟରୁ ପୁଣି କୋଟିଏ ଟଙ୍କାର ଗଞ୍ଜେଇ ଜବତ ହୋଇଛି । ଗୋଟିଏ ପିକଅପ୍ ଭ୍ୟାନରୁ କୋଟିଏ ଟଙ୍କାର ଗଞ୍ଜେଇ ସହ ବନ୍ଧୁକ ଜବତ କରିଛି ପୋଲିସ । ତେବେ ଗଞ୍ଜେଇ ଚାଲାଣ କରୁଥିବା ମାଫିଆ ମାନେ ଫେରାର ହୋଇଯାଇଛନ୍ତି । ମାଛକୁଣ୍ଡ ପୋଲିସ ଏବଂ ବିଏସଏଫ ପକ୍ଷରୁ ମିଳିତ ଭାବେ କମ୍ବିଂ ଅପରେସନ ଚାଲିଥିବା ବେଳେ ଏହି ଗଞ୍ଜେଇ ଜବତ ହୋଇଛି । ନନ୍ଦପୁର ଏସଡ଼ିପିଓ, ଲମତାପୁଟ, ମାଛକୁଣ୍ଡ ,ଜଲାପୁଟ ପୋଲିସ ୫ ଜଣିଆ ଟିମ ଗଠନ କରି ହନୁମାଳ ଗ୍ରାମ ନିକଟରେ ଚେକ୍ ପୋଷ୍ଟ ଲଗାଇଥିଲେ ।
ଅନ୍ୟପକ୍ଷରେ ବିଏସଏଫକୁ ମାଓବାଦୀ ଚଳପ୍ରଚଳ ସୂଚନା ମିଳିବା ପରେ କମ୍ବିଂ ଅପରେସନ ଚାଲିଥିଲା । ସେହି ସମୟରେ ଏକ ପିକଅପ୍ ଭ୍ୟାନ ଦ୍ରୁତଗତିରେ ହନୁମାଳ ଗାଁ ଦେଇ ଆସୁଥିବା ବେଳେ ପୋଲିସ ଓ ବିଏସଏଫ ଅଟକାଇଥିଲେ । ଅନ୍ଧାର ର ସୁଯଗ ନେଇ ଗାଡି ଛାଡି ଡ୍ରାଇଭର ଚମ୍ପଟ ମାରିଥିଲା । ଗାଡ଼ି ଯାଞ୍ଚ କରିବାରୁ ପ୍ରାୟ ୮ କୁଇଣ୍ଟାଲରୁ ଅଧିକ ଗଞ୍ଜେଇ ଏବଂ ଏକ ପିସ୍ତଲ ଏବଂ ୨ଟି ଦୁଇଟି ଗୁଳି ଜବତ କରାଯାଇଛି । ପୋଲିସ ପିକଅପ୍ ଭ୍ୟାନ କୁ ଜବତ କରିଛି । ଗଞ୍ଜେଇ ଜବତ ମୂଲ୍ୟ ୧ କୋଟି ଟଙ୍କା ହେବ ବୋଲି ପୋଲିସ ସୂଚନା ଦେଇଛି ।
