ସତ୍ୟଶିଖା ୨୦ .୦୮.୨୦୨୦ : ଘାତକ ହେଉଛି ମହାମାରୀ କରୋନା ଭୂତାଣୁ । ସାରା ବିଶ୍ଵରେ କରୋନା ସଂକ୍ରମିତଙ୍କ ସଂଖ୍ୟା 2.23 କୋଟି ପାର କଲାଣି । ସେପଟେ ଏହି ମହାମାରୀରେ 7.85 ଲକ୍ଷରୁ ଅଧିକ ଲୋକଙ୍କ ଜୀବନ ଗଲାଣି । ଅଧିକ ପ୍ରଭାବିତ ହୋଇଥିବା ଦେଶମାନଙ୍କ ମଧ୍ୟରେ ଆମେରିକା ଶୀର୍ଷରେ ରହିଛି । ସେପଟେ ଆମେରିକାରେ ମହାମାରୀର ଅଣାୟତ୍ତ ସ୍ଥିତିକୁ ନେଇ ଚୀନ ଉପରେ ବର୍ଷିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ସେ କଡ଼ା ସମାଲୋଚନା କରି କହିଛନ୍ତି ଯେ, ଏଭଳି ସ୍ଥିତି ପାଇଁ ଚୀନକୁ କେବେ କ୍ଷମା କରିବୁ ନାହିଁ ।
ସୂଚନାନୁଯାୟୀ, ବର୍ଦ୍ଧିତ କରୋନା ସଂକ୍ରମଣ ହୋଇଥିବା ଦେଶମାନଙ୍କ ତାଲିକାରେ ଶୀର୍ଷରେ ରହିଛି ଆମେରିକା । ଏଠାରେ ସଂକ୍ରମିତଙ୍କ ସଂଖ୍ୟା 56,99,168ରେ ପହଞ୍ଚିଥିବା ବେଳେ ମୃତକଙ୍କ ସଂଖ୍ୟା 1,76,290 ଛୁଇଁଛି । ସେପଟେ ଏହି ମହାମାରୀ କବଳରୁ 30,60,513 ଜଣ ସୁସ୍ଥ ହୋଇ ଘରକୁ ଫେରିଲେଣି । ଆମେରିକାର 6ଟି ବିଶ୍ଵବିଦ୍ୟାଳୟର 200ରୁ ଅଧିକ ଛାତ୍ର ସଂକ୍ରମିତ ହୋଇସାରିଲେଣି । ସେଠାରେ 5ଟି ରାଜ୍ୟର ସ୍କୁଲରେ 2,000ରୁ ଅଧିକ ଛାତ୍ରଙ୍କୁ କ୍ଵାରେଣ୍ଟାଇନରେ ରଖାଯାଇଛି । ଦେଶରେ ଅଗଷ୍ଟ 3ରେ ସ୍କୁଲ କଲେଜ ଖୋଲିବାକୁ ନିଷ୍ପତ୍ତି ନିଆଯିବା ପରେ ଏଯାବତ୍ ୟୁନିଭରସିଟି ଅଫ ଆୟୋବାରେ ସର୍ବାଧିକ 175 ଜଣ ସଂକ୍ରମିତ ହୋଇଛନ୍ତି । ସେହିପରି ଜର୍ଜିଆର ଚେରୋକି କାଉଁଟି ସ୍କୁଲରେ ସର୍ବାଧିକ 1100 ଛାତ୍ର କ୍ଵାରେଣ୍ଟାଇନରେ ଅଛନ୍ତି ।
ଦେଶରେ ଏଭଳି ସ୍ଥିତିକୁ ନେଇ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି । ସେ କହିଛନ୍ତି ଯେ, ଦେଶର ଏଭଳି ସ୍ଥିତିକୁ ନେଇ ଚୀନ ପ୍ରତି ଆମର ଆଭିମୁଖ୍ୟ ପରିବର୍ତ୍ତନ ହେବ ନାହିଁ । ମହାମାରୀରର ପ୍ରସାର ପାଇଁ ସେ ଚୀନକୁ କେବେ କ୍ଷମା କରିବେ ନାହିଁ କି ତାହା ସହ କୌଣସି ବାର୍ତ୍ତା କରିବେ ନାହିଁ । ଦୁନିଆକୁ ସଙ୍କଟରେ ପକାଇଛି ଚୀନ । ଯାହାକି ଅକଳ୍ପନୀୟ ।
