ସତ୍ୟଶିଖା ୨୯ .୦୮.୨୦୨୦ : ଯୁଗ୍ମ ପ୍ରବେଶିକ ପରୀକ୍ଷା (ଜେଇଇ) ମେନ ଓ ନ୍ୟାସନାଲ ଇଲିଜିବିଲିଟି କମ ଏଣ୍ଟ୍ରାନ୍ସ ପରୀକ୍ଷା (ଏନଇଇଟି) ପାଇଁ ରାଜ୍ୟ ସରକାରଙ୍କ ବଡ଼ ଘୋଷଣା । ଓଡ଼ିଶାରେ ଚଳିତ ବର୍ଷ ୩୭ ହଜାର ପରୀକ୍ଷାର୍ଥୀ ପରୀକ୍ଷା ଦେବେ । ତେବେ ଏହି ୨ଟି ପରୀକ୍ଷାର ସୁପରିଚାଳନା ଲାଗି ରାଜ୍ୟ ସରକାର ଅଗଷ୍ଟ ଓ ସେପ୍ଟେମ୍ବର ମାସରେ ୧୨ ଦିନ ପର୍ଯ୍ୟନ୍ତ କରୋନା ଭାଇରସ ପାଇଁ ଲାଗୁ ହୋଇଥିବା ଲକଡାଉନ ଓ ସଟଡାଉନକୁ କୋହଳ କରିଛନ୍ତି । ଜେଇଇ ଓ ଏନଇଇଟି ପରୀକ୍ଷା କେନ୍ଦ୍ର ଥିବା ୭ଟି କେନ୍ଦ୍ରରେ ଲକଡାଉନ ଓ ସଟଡାଉନ କଟକଣା ଲାଗୁ ହେବ ନାହିଁ । ଏନେଇ ରାଜ୍ୟ ସରକାରଙ୍କ ସ୍ୱତନ୍ତ୍ର ରିଲିଫ କମିଶନର ପ୍ରଦୀପ କୁମାର ଜେନା ଟୁଇଟ କରି ସୂଚନା ଦେଇଛନ୍ତି ।
ସୂଚନାନୁଯାୟୀ, ଆସନ୍ତାକାଲି (ଅଗଷ୍ଟ ୩୦ ତାରିଖ) ଠାରୁ ସେପ୍ଟେମ୍ବର ୭ ତାରିଖ ଯାଏଁ ପ୍ରଥମ ପର୍ଯ୍ୟାୟରେ ରାଜ୍ୟର ୭ଟି ସହରରେ ଲକଡାଉନ ଓ ସଟଡାଉନ ହେବ ନାହିଁ । କାରଣ ଏହି ସମୟ ମଧ୍ୟରେ ଜେଇଇ ମେନ ପରୀକ୍ଷା ହେବ । ସେହିପରି ସେପ୍ଟେମ୍ବର ୧୨ ତାରିଖ ଠାରୁ ୧୪ ତାରିଖ ଯାଏଁ ୩ ଦିନ ଲାଗି ମଧ୍ୟ ସଂପୃକ୍ତ ସହରଗୁଡ଼ିକରେ ଲକଡାଉନ ଓ ସଟଡାଉନ ହେବ ନାହିଁ । କାରଣ ଏହି ଦିନ ମଧ୍ୟରେ ଏନଇଇଟି ପରୀକ୍ଷା ଅନୁଷ୍ଠିତ ହେବ ।
ଉଲ୍ଲେଖଯୋଗ୍ୟ, ଜେଇଇ ମେନ ପରୀକ୍ଷା ଆସନ୍ତା ସେପ୍ଟେମ୍ବର ୧ ତାରିଖ ଠାରୁ ୬ ତାରିଖ ଯାଏଁ ଅନୁଷ୍ଠିତ ହେବ । ଚଳିତ ବର୍ଷ ଜେଇଇ ପରୀକ୍ଷାରେ ଓଡ଼ିଶାରେ ୭ଟି ପରୀକ୍ଷା କେନ୍ଦ୍ର କରାଯାଇଛି । ପ୍ରାୟ ୩୭ ହଜାର ପରୀକ୍ଷାର୍ଥୀ ପରୀକ୍ଷାରେ ଅଂଶଗ୍ରହଣ କରିବେ । ରାଜ୍ୟ ସରକାର ଏହି ପରୀକ୍ଷା ପାଇଁ ବ୍ୟାପକ ବ୍ୟବସ୍ଥା କରିଛନ୍ତି । ପିଲାମାନଙ୍କ ପରିବହନ ଏବଂ ରହିବା ବ୍ୟହସ୍ଥା ସରକାର ଦାୟିତ୍ୱ ନେବେ । ପରୀକ୍ଷାର୍ଥୀ ମାନେ ଆଡମିଟ୍ କାର୍ଡ ଦେଖାଇଲେ ରାଜ୍ୟ ସରକାର ସମସ୍ତ ଖର୍ଚ୍ଚ ବହନ କରିବେ । ଏ ନେଇ ରାଜ୍ୟର ସମସ୍ତ ଜିଲ୍ଲାରେ ନୋଡାଲ ସେଣ୍ଟର ପ୍ରସ୍ତୁତ କରାଯାଇଛି । ଉକ୍ତ ସେଣ୍ଟରରେ ପିଲାମାନେ ନିଜର ତଥ୍ୟ ପ୍ରଦାନ କରିବେ । ଏ ନେଇ ପିଲାମାନେ ଅଗଷ୍ଟ ୩୧ ତାରିଖ ସୁଦ୍ଧା ସମସ୍ତ ଖର୍ଚ୍ଚ ବହନ କରିବେ । ପିଲାମାନେ ଦୂରରୁ ଆସୁଥିଲେ ସେମାନଙ୍କ ପାଇଁ ହଷ୍ଟେଲର ବ୍ୟବସ୍ଥା ମଧ୍ୟ କରାଯାଇଛି । ଏ ନେଇ ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠି ।
