ସତ୍ୟଶିଖା(ଭୁବନେଶ୍ୱର )୦୨.୧୧ .୨୦୨୧: ନଭେମ୍ବର ମାସରୁ ରାଜ୍ୟର ବିଭିନ୍ନ ସ୍ଥାନରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେଉଛି । ରାଇସ ମିଲ କମ ଥିବା ଜିଲ୍ଲାରେ ବାହାର ଜିଲ୍ଲାର ମିଲ କଷ୍ଟମ ମିଲିଂ କରିପାରିବେ ବୋଲି ୧୦ ଜିଲ୍ଲାର ଜିଲ୍ଲାପାଳଙ୍କୁ ଚିଠି କରିଛନ୍ତି ଓଡ଼ିଶା ରାଜ୍ୟ ଯୋଗାଣ ନିଗମ ପରିଚାଳନା ନିଦେ୍ର୍ଧଶକ ବିଶ୍ୱଜିତ ଦାସ । ବାଲେଶ୍ୱର, ବରଗଡ଼, ଢେଙ୍କାନାଳ, ବଲାଙ୍ଗୀର, ଗଞ୍ଜାମ, ଯାଜପୁର, କଳାହାଣ୍ଡି, ଖୋର୍ଦ୍ଧା, ପୁରୀ ଏବଂ ସମ୍ବଲପୁର ଜିଲ୍ଲାପାଳଙ୍କୁ ଏହି ଚିଠି ଦିଆଯାଇଛି । ଏଥିପାଇଁ ମିଲ ମାଲିକଙ୍କୁ ୧୫ ଦିନ ପୂର୍ବରୁ ଜିଲ୍ଲାପାଳମାନଙ୍କୁ ସୂଚନା ଦେବାକୁ ପଡ଼ିବ । ତେବେ ଗୋଟିଏ ମିଲ ଦୁଇରୁ ଅଧିକ ଜିଲ୍ଲାର ଧାନ କ୍ରୟ କରିପାରିବେ ନାହିଁ । ଖାଦ୍ୟ ନୀତି ଅନୁଯାୟୀ, ଉପଯୁକ୍ତ ମଣ୍ଡି ବ୍ୟବସ୍ଥାରେ ଯୋଗାଣ ବିଭାଗ ପକ୍ଷରୁ ରାଜ୍ୟରେ ଚାଷୀଙ୍କ ଧାନ ସଂଗ୍ରହ କରାଯାଏ । ଏଥିରୁ ଚାଉଳ ମିଲିଂ ପାଇଁ ରାଇସ ମିଲଗୁଡ଼ିକୁ ଟ୍ୟାଗ କରାଯାଏ । ରାଇସ ମିଲର ସରକାରଙ୍କ ଠାରୁ ଧାନ କ୍ରୟ କରି ସେଥିରୁ ଉତ୍ପାଦିତ ଚାଉଳ ସରକାରଙ୍କୁ ବିକ୍ରୟ କରନ୍ତି । ମାତ୍ର କୌଣସି ଜିଲ୍ଲାରେ ଧାନ ରଖିବା ପାଇଁ ଗୋଦାମ ନାହିଁ ।
ଏଥିପାଇଁ ପେକ୍ସ ଧାନ କିଣିବା ସହିତ ହିଁ ଏହା ମିଲ ପାଖକୁ ଚାଲିଯାଏ । ଏଥିପାଇଁ ସରକାର ଏବଂ ଚାଷୀଙ୍କ ମଧ୍ୟରେ ଧାନ କ୍ରୟ-ବିକ୍ରୟ ହେଉଥିବା କୁହାଯାଉଥିଲେ ମଧ୍ୟ ମଣ୍ଡିରେ ମିଲରଙ୍କ କବଜା ରହିଥାଏ । ଯେଉଁ ଜିଲ୍ଲାରେ ଧାନ ଚାଷ ଅନୁସାରେ ମିଲ ନାହିଁ, ସେଠାରେ ଧାନ ସଂଗ୍ରହ ବେଳେ ବ୍ୟାପକ ସମସ୍ୟା ସୃଷ୍ଟି ହୁଏ । ମଣ୍ଡିରେ ଧାନ ପଡ଼ି ରହିଥାଏ । ଏଥିଯୋଗୁଁ ସରକାରଙ୍କ ପକ୍ଷରୁ ସମ୍ବଲପୁର, ବରଗଡ଼ ଭଳି ଅଧିକ ମିଲ ଥିବା ଜିଲ୍ଲାର ରାଇସ ମିଲକୁ ଅନ୍ୟ ଜିଲ୍ଲାରେ ମିଲିଂ ପାଇଁ ଅନୁମତି ଦେଇଛନ୍ତି । ଚାଷୀଙ୍କ ସ୍ୱାର୍ଥ ଦୃଷ୍ଟିରୁ ଏହି ନିଷ୍ପତ୍ତି ଗ୍ରହଣ ହେଉଥିଲେ ମଧ୍ୟ ରାଇସ ମିଲଗୁଡ଼ିକ ବାହାର ଜିଲ୍ଲାରେ ପ୍ରକୃତ ଧାନ ନକିଣି ବ୍ୟାପକ ମିଛ ଧାନ କ୍ରୟ କରି ଦୁର୍ନୀତି କରିଥାଆନ୍ତି । ତେଣୁ ଏହାକୁ ରୋକିବା ଲାଗି ସରକାରଙ୍କୁ ଦୃଷ୍ଟି ଦେବାର ଆବଶ୍ୟକତା ରହିଛି ।
