ସତ୍ୟଶିଖା( ସମ୍ବଲପୁର)୧୪.୦୭ . ୨୦୨୨ : ସମସ୍ତଙ୍କୁ ଉତ୍ତମ ଶିକ୍ଷା ପ୍ରଦାନ ନିମନ୍ତେ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି ସରକାର । କିନ୍ତୁ ସମ୍ବଲପୁର ଜିଲାରେ ସରକାରଙ୍କ ଶିକ୍ଷାର ବାସ୍ତବ ଚିତ୍ର ବୁଧବାର ପଦାକୁ ଆସିଛି । ସମ୍ବଲପୁର ଜିଲା ନାକଟିଦେଉଳ ବ୍ଲକର କେଉଁଟବେର୍ଣ୍ଣା ଗ୍ରାମରେ ଥିବା ପ୍ରାଥମିକ ବିଦ୍ୟାଳୟରେ ଶିକ୍ଷକ ନ ଥିବାରୁ ଛାତ୍ରଛାତ୍ରୀ ମାନଙ୍କ ପାଠପଢ଼ା ବନ୍ଦ ହୋଇଛି । ଅନେକବାର ଅଞ୍ଚଳବାସୀଙ୍କ ଦାବି ପରେ ବି ଏ ପର୍ଯ୍ୟନ୍ତ କୌଣସି ସୁଫଳ ନମିଳିବାରୁ ବାଧ୍ୟ ହୋଇ ଜିଲା ମୁଖ୍ୟାଳୟ ସମ୍ବଲପୁରରୁ ପ୍ରାୟ ୧୦୦ କିଲୋମିଟର ଦୂରରେ ଥିବା ଗ୍ରାମର ଅଧିବାସୀ ଓ ବିଦ୍ୟାଳୟର କୁନି କୁନି ଛାତ୍ରଛାତ୍ରୀ ମାନେ ଜିଲାପାଳଙ୍କ ନିକଟରେ ଦ୍ୱାରସ୍ଥ ହୋଇ ଫେରାଦ ହୋଇଛନ୍ତି । ନାକଟିଦେଉଳ ବ୍ଲକର ସାଲେଭଟା ଗ୍ରାମ ପଞ୍ଚାୟତ ଅଧିନସ୍ଥ କେଉଁଟବେର୍ଣ୍ଣା ପ୍ରାଥମିକ ବିଦ୍ୟାଳୟ ୧୯୫୯ରେ ଆରମ୍ଭ ହୋଇଥିଲା । ଉକ୍ତ ବିଦ୍ୟାଳୟରେ ମୋଟ ୪୮ ଜଣ ଛାତ୍ରଛାତ୍ରୀ ରହିଥିବା ବେଳେ ଗତ ଜୁନ ମାସରୁ ବିଦ୍ୟାଳୟରେ ଶିକ୍ଷକ ନାହାନ୍ତି ।
