ସତ୍ୟଶିଖା(ଭୁବନେଶ୍ୱର) ୩୦ .୧୧.୨୦୨୧: ଗଲ୍ଫ ଅଫ୍ ଥାଇଲ୍ୟାଣ୍ଡ ଅଞ୍ଚଳରେ ଏବେ ସଂଗଠିତ ହେଉଛି ବଳୟ । ଆସନ୍ତା ୨୪ ଘଣ୍ଟାରେ ଏହା ଆଣ୍ଡାମାନ ସାଗରରେ ପହଞ୍ôଚବା ସହ ଅଧିକ ଘନିଭୂତ ହୋଇ ଏକ ଲଘୁଚାପର ରୂପ ନେବ । ପରବର୍ତ୍ତି ୨୪ ଘଣ୍ଟାରେ ଲଘୁଚାପଟି ଏକ ସଦୃଶ ଲଘୁଚାପ ଓ ୨ ତାରିଖ ସୁଦ୍ଧା ତାହା ଅବପାତର ରୂପ ନେଇପାରେ । ୩ ତାରିଖ ସୁଦ୍ଧା ଏହା ବଙ୍ଗୋପସାଗରରେ ପ୍ରବେଶ କରିବା ସହ ଗଭୀର ଅବପାତରେ ପରିଣତ ହୋଇ ଉପକୂଳ ମୁହାଁ ହେବ । ୪ ତାରିଖ ସକାଳ ସୁଦ୍ଧା ଏହା ସିଭିଅର୍ ସାଇକ୍ଲୋନ୍ (ଭୀଷଣ ସାମୁଦ୍ରିକ ଝଡ଼) ରୂପ ନେବା ସହ ଅପରାହ୍ନ ସୁଦ୍ଧା ସ୍ଥଳ ଭାଗ ଛୁଇଁବ ବୋଲି ବିଭିନ୍ନ ଅନ୍ତର୍ଜାତୀୟ ପାଣିପାଗ ମଡେଲ ପକ୍ଷରୁ ପୂର୍ବାନୁମାନ କରାଯାଇଛି ।
ଘରୋଇ ପାଣିପାଗ ସଂସ୍ଥା ୱିଣ୍ଡିର ଜିଏଫ୍ଏସ୍ ମଡେଲ୍ରେ ବାତ୍ୟା ଓଡ଼ିଶା ଉପକୂଳ ଛୁଇଁବା ନେଇ ଆକଳନ କରାଯାଉଛି । ସେହିପରି ୱିଣ୍ଡିର ଇସିଏମ୍ଡବ୍ଲୁଏଫ୍ ମଡେଲ୍ ପକ୍ଷରୁ ହୋଇଥିବା ଆକଳନ ଅନୁଯାୟୀ ସାମ୍ଭାବ୍ୟ ବାତ୍ୟା ଆନ୍ଧ୍ର ଉପକୂଳରେ ସ୍ଥଳଭାଗ ଛୁଇଁବା ପରେ ଓଡ଼ିଶା ଉପକୂଳକୁ ପ୍ରବେଶ କରିବ । ଉଭୟ କ୍ଷେତ୍ରରେ ଓଡ଼ିଶା ଉପକୂଳବର୍ତ୍ତୀ ଅଞ୍ଚଳରେ ପ୍ରବଳରୁ ଅତିପ୍ରବଳ ବର୍ଷା ହେବ ବୋଲି ପାଣିପାଗ ବିଶେଷଜ୍ଞ ମତ ଦେଇଛନ୍ତି । ସାମ୍ଭାବ୍ୟ ବାତ୍ୟା ‘ଜୱାଦ’ ଉପକୂଳ ଛୁଇଁବା ପୂର୍ବରୁ ଦିଗ ପରିବର୍ତ୍ତନ କରିବା ସମ୍ଭାବନା ଅଧିକ ରହିଛି । ଆରବିଆନ୍ ସମୁଦ୍ରରେ ଆସନ୍ତା ୧ ତାରିଖ ସୁଦ୍ଧା ଆଉ ଏକ ଲଘୁଚାପ କ୍ଷେତ୍ର ସୃଷ୍ଟି ହେବା ଆଶଙ୍କା ରହିଛି ।
ଯାହାକି ପରବର୍ତ୍ତୀ ସମୟରେ ଅଧିକ ଘନିଭୂତ ହୋଇ ଗୁଜୁରାଟ, ମହାରାଷ୍ଟ୍ର ଓ ମଧ୍ୟପ୍ରଦେଶରେ ବର୍ଷା କରାଇବା ନେଇ ଏକାଧିକ ପାଣିପାଗ ମଡେଲ ପୂର୍ବାନୁମାନ କରିଛନ୍ତି । ବାୟୁମଣ୍ଡଳରେ ଏକାସାଙ୍ଗରେ ୨ଟି ଲଘୁଚାପ ସକ୍ରିୟ ରହିଲେ ଗୋଟିଏ ଦୁର୍ବଳ ହେବା ନେଇ ଆଶଙ୍କା ରହିଛି । ତେଣୁ ବଙ୍ଗୋପସାଗରରେ ସୃଷ୍ଟ ଲଘୁଚାପ କ୍ଷେତ୍ର ଉପକୂଳ ଛୁଇଁବା ପୂର୍ବରୁ ନିଜ ଦିଗ ପରିବର୍ତ୍ତନ କରିବା ସହ ଓଡ଼ିଶା ଉପକୂଳରେ ଘସିହୋଇ ପଶ୍ଚିମବଙ୍ଗ ଆଡ଼କୁ ଉତ୍ତର-ପୂର୍ବ ଦିଗରେ ଗତି କରିବା ସମ୍ଭାବନା ରହିଛି । ଯଦି ଏପରି ହୁଏ ତାହେଲେ ବି ଓଡ଼ିଶାକୁ ପ୍ରବଳ ବର୍ଷା ହେବା ନେଇ ସତର୍କତା ଜାରି ହୋଇଛି । ଆଞ୍ଚଳିକ ପାଣିପାଗ କେନ୍ଦ୍ର ନିର୍ଦ୍ଦେଶକ ଏଚ୍ ଆର୍ ବିଶ୍ୱାସଙ୍କ ମତରେ ଆସନ୍ତାକାଲି ସୃଷ୍ଟି ହେବାକୁ ଥିବା ଲଘୁଚାପ କ୍ରମଶଃ ଅଧି ଘନିଭୂତ ହୋଇ ପଶ୍ଚିମ-ଉତ୍ତର ପଶ୍ଚିମ ଦିଗରେ ଗତି କରିବ ।
ଏହାଫଳରେ ଆସନ୍ତା ୨ ତାରିଖରୁ ରାଜ୍ୟରେ ପାଗ ବଦଳିବା ସହ ୩ରୁ ଉପକୂଳ ଅଞ୍ଚଳରେ ଭାରି ବର୍ଷା ହେବା ସମ୍ଭାବନା ରହିଛି । ୩ ତାରିଖ ଦିନ ଗଞ୍ଜାମ, ଗଜପତି ଓ ପୁରୀ ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ନେଇ ୟେଲୋ ୱାର୍ଣ୍ଣିଂ ଜାରି ହୋଇଛି । ସେହିପରି ଆଇଆଇଟି ପାଣିପାଗ ବିଶେଷଜ୍ଞ ସନ୍ଦୀପ ପଟ୍ଟନାୟକଙ୍କ ମତରେ ସାମ୍ଭାବ୍ୟ ଲଘୁଚାପ ଏକ ଭୀଷଣ ବାତ୍ୟା ରୂପ ନେବ । ପବନର ବେଗ ଘଣ୍ଟା ପ୍ରତି ୮୦ରୁ ୯୦ କିମି ରହିବାକୁ ଥିବାବେଳେ ୪ ତାରିଖ ଅପରାହ୍ନ ସୁଦ୍ଧା ଏହା ଲ୍ୟାଣ୍ଡଫଲ୍ କରିବ । ଲଘୁଚାପ ସୃଷ୍ଟି ହେବା ପୂର୍ବରୁ ବିଭିନ୍ନ ପାଣିପାଗ ମଡେଲ ଭିନ୍ନ ଭିନ୍ନ ତଥ୍ୟ ପ୍ରଦାନ କରୁଛନ୍ତି । କିନ୍ତୁ ଆସନ୍ତାକାଲି ଲଘୁଚାପ କ୍ଷେତ୍ର ସୃଷ୍ଟି ହେବା ପରେ ଏହା ଗତିପଥ ଓ ତୀବ୍ରତା ନେଇ ସ୍ପଷ୍ଟ ଚିତ୍ର ମିଳିବ ବୋଲି ସେ କହିଛନ୍ତି । ପ୍ରାଥମିକ ଆକଳନରୁ ଆସନ୍ତା ୪ ଓ ୫ ତାରିଖ ଦୁଇ ଦିନ ଓଡ଼ିଶା ଉପକୂଳରେ ପ୍ରବଳରୁ ଅତିପ୍ରବଳ ବର୍ଷା ହେବ । ବିଶେଷ କରି ଗଞ୍ଜାମ, ଗଜପତି, କୋରାପୁଟ, ଖୋର୍ଦ୍ଧା, ନୟାଗଡ଼, କଟକ, ଜଗତସିଂହପୁର, କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱର, ଯାଜପୁର ଜିଲ୍ଲାରେ ଏହାର ପ୍ରଭାବ ନଜରକୁ ଆସିବ ।
୬ ତାରିଖରୁ ରାଜ୍ୟରେ ବର୍ଷା ପରିମାଣ ସାମାନ୍ୟ ହ୍ରାସ ପାଇବା ନେଇ ପୂର୍ବାନୁମାନ ଥିବାବେଳେ ୭ ତାରିଖ ପରେ ପୁଣି ରାଜ୍ୟକୁ ଶୀତ ଫେରିବା ନେଇ ପାଣିପାଗ ବିଜ୍ଞାନୀମାନେ ପୂର୍ବାନୁମାନ କରିଛନ୍ତି । ଅନ୍ୟପଟେ ଲଘୁଚାପର ପରିଧି ଯେତେ ବଡ଼ ହେବ ସେତେ ଅଧିକ ଜିଲ୍ଲା ଏଥିରେ ପ୍ରଭାବିତ ହେବ । ଭାରତୀୟ ପାଣିପାଗ ସଂସ୍ଥାନର ପୂର୍ବାକଳନ ଅନୁଯାୟୀ, ଲଘୁଚାପ ଦ୍ୱାରା ଆସନ୍ତାକାଲିଠାରୁ ଡିସେମ୍ବର ୨ ପର୍ଯ୍ୟନ୍ତ ଆଣ୍ଡାମାନ ସାଗର ଓ ଏହାର ନିକଟସ୍ଥ ପୂର୍ବ କେନ୍ଦ୍ରୀୟ ବଙ୍ଗୋପସାଗର ଓ ଦକ୍ଷିଣ-ପୂର୍ବ ବଙ୍ଗୋପସାଗର ଅଶାନ୍ତ ରହିବ । ସେହିପରି ଡିସେମ୍ବର ୨ରୁ ୫ ତାରିଖ ପର୍ଯ୍ୟନ୍ତ କେନ୍ଦ୍ରୀୟ ବଙ୍ଗୋପସାଗର ଓ ଏହାର ନିକଟସ୍ଥ ଉତ୍ତର ବଙ୍ଗୋପସାଗର, ଆନ୍ଧ୍ର ଉପକୂଳ ଏବଂ ଓଡ଼ିଶା ଉପକୂଳ ନିକଟସ୍ଥ ସମୁଦ୍ର ଅଶାନ୍ତ ରହିବ । ଏହି ସମୟରେ ସମୁଦ୍ର ଉପରେ ପବନର ବେଗ ଘଣ୍ଟା ପ୍ରତି ୭୦ରୁ ୮୦ କିମି ରହିବା ସମ୍ଭାବନା ଥିବାବେଳେ ସମୟ ସମୟରେ ଝଟକା ପବନ ୯୦ କିମି ବେଗରେ ହେବ । ତେଣୁ ଏହି ସମୟରେ ମତ୍ସଜୀବୀଙ୍କୁ ସମୁଦ୍ର ମଧ୍ୟକୁ ଯିବାକୁ ବାରଣ କରାଯାଇଛି ।
