ସତ୍ୟଶିଖା( କଟକ) ୦୯ .୧୨.୨୦୨୧: ଏକ ନାବାଳିକା ଅପହରଣ ଓ ଦୁଷ୍କର୍ମ ମାମଲାରେ କଟକର ତୃତୀୟ ଅତିରିକ୍ତ ଜିଲ୍ଲା ଓ ଦୌରାଜଜ୍ ତଥା ପୋଷ୍କୋ କୋର୍ଟ ଆସାମୀ ସୁରେଶ ପୁର୍ତ୍ତି(୪୬)କୁ ୧୪ ବର୍ଷ ସଶ୍ରମ କାରାଦଣ୍ଡ ପ୍ରଦାନ କରିଛନ୍ତି । କୋର୍ଟ ଆସାମୀକୁ ପୋକ୍ସୋ ଆଇନର ୬ ଦଫାରେ ୧୪ ବର୍ଷ ସଶ୍ରମ କାରାଦଣ୍ଡ ପ୍ରଦାନ କରିବା ସହିତ ୧୦ ହଜାର ଟଙ୍କା ଜୋରିମାନା ରାଶି ଦାଖଲ କରିବାକୁ ଆଦେଶ ଦେଇଛନ୍ତି । ଜୋରିମାନା ଅନାଦେୟ ଆଉ ଅଧିକ ୬ ମାସ ସଶ୍ରମ କାରଦଣ୍ଡ ଭୋଗିବାକୁ ପଡ଼ିବ ବୋଲି କୋର୍ଟ କହିଛନ୍ତି । ସେହିପରି କୋର୍ଟ ଆସାମୀକୁ ଆଇପିସିର ୩୬୩ ଦଫାରେ ୫ ବର୍ଷ ସଶ୍ରମ କାରଦଣ୍ଡ ଆଦେଶ ପ୍ରଦାନ କରିଛନ୍ତି ।
ଏହି ଦଫାରେ ଆସାମୀକୁ ୫ହଜାର ଟଙ୍କା ଜୋରିମାନା ରାଶି ଦାଖଲ କରିବାକୁ ଆଦେଶ ଦେଇଛନ୍ତି । ଜୋରିମାନା ଅନାଦେୟ ଆଉ ଅଧିକ ୩ ମାସ ଜେଲ୍ଦଣ୍ଡ ଭୋଗିବାକୁ ପଡିବ ବୋଲି କୋର୍ଟ ଆଦେଶ ଦେଇଛନ୍ତି । ଅନ୍ୟପକ୍ଷରେ କୋର୍ଟ ଆଇପିସିର ୩୬୬ ଦଫାରେ ଆସାମୀକୁ ୫ବର୍ଷ ସଶ୍ରମ କାରଦଣ୍ଡ ଆଦେଶ ପ୍ରଦାନ କରିବା ସହ ୧୦ ହଜାର ଟଙ୍କାର ଜୋରିମାନା ରାଶି ଦାଖଲ କରିବାକୁ ଆଦେଶ ଦେଇଛନ୍ତି । ତେବେ ଜୋରିମାନା ରାଶି ଦାଖଲ ନକଲେ ଆସାମୀକୁ ଆଉ ଅଧିକ ୪ ମାସ ସଶ୍ରମ କାରଦଣ୍ଡ ଭୋଗିବାକୁ ପଡ଼ିବ ବୋଲି କୋର୍ଟ ତାଙ୍କ ଆଦେଶରେ ସ୍ପଷ୍ଟ କରିଛନ୍ତି । ତେବେ ଏ ସମସ୍ତ ଦଣ୍ଡାଦେଶ ଏକତ୍ର ଲାଗୁ ହେବ ବୋଲି ଅଦାଲତ କହିଛନ୍ତି ।
ଏଥିସହିତ ପୀଡ଼ିତାଙ୍କୁ ୫ ଲକ୍ଷ ଟଙ୍କାର କ୍ଷତିପୂରଣ ପ୍ରଦାନ କରିବାକୁ କୋର୍ଟ କଟକ ଜିଲ୍ଲା ଆଇନସେବା ପ୍ରାଧିକରଣକୁ ଆଦେଶ ଦେଇଛନ୍ତି। ରାଜ୍ୟ ସରକାରଙ୍କ ପକ୍ଷରୁ ପୋଷ୍କୋ କୋର୍ଟରେ ଏହି ମାମଲାକୁ ସ୍ୱତନ୍ତ୍ର ପବ୍ଲିକ୍ ପ୍ରସିକ୍ୟୁଟର ରମେଶ ଚନ୍ଦ୍ର ମହାନ୍ତି ପରିଚାଳନା କରୁଥିଲେ । ସୂଚନାଥାଉକି କଟକ ଜିଲ୍ଲା ଖୁଣ୍ଟୁଣି ଅଞ୍ଚଳର ଜଣେ ୧୪ ବର୍ଷିୟା ନାବାଳିକାକୁ ଆସାମୀ ସୁରେଶ ପୁର୍ତ୍ତି ଗତ ୨୦୧୫ ମସିହା ଫେବୃୟାରୀ ୨୭ ତାରିଖରେ ଅପହରଣ କରି ନେଇଥିଲା । ଏ ସମ୍ପର୍କରେ ଖୁଣ୍ଟୁଣି ଥାନାରେ ଗତ ୨୦୧୫ ମାର୍ଚ୍ଚ ୧ତାରିଖରେ ଏତଲା ରୁଜୁ ହୋଇଥିଲା । ପରେ ପୁଲିସ୍ ଅଭିଯୁକ୍ତକୁ ଗିରଫ କରି ତା’ ବିରୋଧରେ କୋର୍ଟରେ ଅଭିଯୋଗଫର୍ଦ୍ଦ ଦାଖଲ କରିଥିଲା ।
