ସତ୍ୟଶିଖା (ବଲାଙ୍ଗୀର) ୨୫/୧୧/୨୦୨୦ : ଭିଜିଲାନ୍ସ ଜାଲରେ ପଡିଲେ ଜେଇ ବାବୁ । ତାଙ୍କ ନାଁରେ ଆସିଛି ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗ । ବଲାଙ୍ଗୀର ଦେଓଗାଁ ବ୍ଲକରେ କାର୍ଯ୍ୟରତ ଥିବା ଜୁନିୟର ଇଞ୍ଜିନିୟର ଗିରିଶ କୁମାର ପାତ୍ରଙ୍କ ଘରେ ଭିଜିଲାନ୍ସ ରେଡ୍ କରିଛି ।
ବୁଧବାର ସକାଳୁ ବଲାଙ୍ଗୀର ସହର ଆଦର୍ଶପଡାଠାରେ ଥିବା ତାଙ୍କ ବାସଭବନ ଓ ଦେଓଗାଁରେ ଥିବା କାର୍ଯ୍ୟାଳୟ ଉପରେ ଭିଜିଲାନ୍ସ ଟିମ୍ ଚଢାଉ କରିଛି । ସମ୍ବଲପୁର, ବଲାଙ୍ଗୀର ଓ ସୋନପୁର ଭିଜିଲାନ୍ସ ଟିମ୍ ଏକକାଳୀନ ଚଢାଉ କରିଛି । ତେବେ ଚଢାଉ ବେଳେ ତାଙ୍କ ପାଖରୁ ନଗଦ ୮୨ ହଜାର ଟଙ୍କା, କିଛି ସୁନା ସହ ବ୍ୟାଙ୍କ ପାସବୁକ, ବିଭିନ୍ନ କାଗଜପତ୍ର, ଏଲଆଇସି ଭଳି ଗୁରୁତ୍ବପୂର୍ଣ୍ଣ କାଗଜପତ୍ର ଜବତ କରାଯାଇଛି । ତଦନ୍ତ ଜାରି ରହିଥିବା ବେଳେ ସମ୍ପୂର୍ଣ୍ଣ ଆକଳନ କରାଯାଇନାହିଁ ବୋଲି କହିଛନ୍ତି ଭିଜିଲାନ୍ସ ଡିଏସପି ।
ସେପଟେ ତାଙ୍କ ନାଁରେ କ’ଣ ଅଭିଯୋଗ ହୋଇଛି ଓ ସେ କୌଣସି ପ୍ରକାର ଆୟ ବହିର୍ଭୂତ ସମ୍ପତ୍ତି ଠୁଳ କରିନାହାନ୍ତି ବୋଲି ଜେଇ ଗିରିଶ କୁମାର ପାତ୍ର କହିଛନ୍ତି ।
