ସତ୍ୟଶିଖା( ଭୁବନେଶ୍ୱର )୨୬.୦୨.୨୦୨୨ : ରାଜ୍ୟର ଜେଲ୍ଗୁଡ଼ିକୁ କ୍ରମାନ୍ୱୟରେ ଆଧୁନିକୀକରଣ କରାଯାଉଛି । ଅନ୍ତେବାସୀଙ୍କ ପାଇଁ ଏଟିଏମ୍ ଠାରୁ ଆରମ୍ଭ କରି ଭିଡିଓ କଲ୍ର ସୁବିଧା ଆରମ୍ଭ ହୋଇଯାଇଛି । ବିଚାରଧୀନ କଏଦୀଙ୍କ କ୍ଷେତ୍ରରେ ପୁଣି ଏକ ନୂଆ ବ୍ୟବସ୍ଥା ଲାଗୁ କରାଯାଇଛି । ଏଣିକି କଏଦୀ ଓ ମାମଲାରେ ସମ୍ପୃକ୍ତ ଥିବା ସାକ୍ଷୀମାନେ କେସ୍ର ଟ୍ରାଏଲ୍ ବେଳେ କୋର୍ଟ ପରିସରକୁ ଯିବେ ନାହିଁ । ଭିଡ଼ିଓ କନ୍ଫେରେନ୍ସିଂରେ ରହି ସେମାନେ ସାକ୍ଷୀ ଦେବେ । ଏହି ବ୍ୟବସ୍ଥା ପ୍ରଥମେ ରାଜ୍ୟର ନୟାଗଡ଼ ଓ ଅନୁଗୁଳ ଜିଲ୍ଲାରେ ଆରମ୍ଭ ହୋଇଛି । ଖୁବ୍ ଶୀଘ୍ର ଅନ୍ୟ ଜିଲ୍ଲା କାରାଗାର ଗୁଡ଼ିକରେ ଏହି ବ୍ୟବସ୍ଥା ଲାଗୁ ହେବ ବୋଲି ଜେଲ୍ ବିଭାଗ ପକ୍ଷରୁ ସୂଚନା ମିଳିଛି ।
ସୂଚନା ଅନୁଯାୟୀ, ଜଣେ ଅଭିଯୁକ୍ତଙ୍କୁ ପୁଲିସ ଗିରଫ ପରେ କୋର୍ଟ ଚାଲାଣ କରିଥାଏ । ଏହାପରେ କୋର୍ଟ ପାରିପାଶ୍ୱର୍ିକ ପରିସ୍ଥିତିକୁ ଦେଖିକି ଜାମିନ ନଦେଇ ଅଭିଯୁକ୍ତଙ୍କୁ ବିଚାର ବିଭାଗୀୟ ହାଜତକୁ ପଠାଇଦିଅନ୍ତି । ଏହାପରେ ଅଭିଯୁକ୍ତଙ୍କ ମାମଲାର ଟ୍ରାଏଲ୍ ଆରମ୍ଭ ହୋଇଥାଏ । ମାମଲାର ବିଚାରବେଳେ ପୁଲିସ ସମସ୍ତ ତଥ୍ୟପ୍ରମାଣ ଦାଖଲ କରିବା ସହ ସାକ୍ଷୀଙ୍କୁ କୋର୍ଟରେ ହାଜର କରାଏ । ହେଲେ କେତେକ କ୍ଷେତ୍ରରେ ବିଭିନ୍ନ ସମସ୍ୟା ଯୋଗୁ ସାକ୍ଷୀମାନେ କୋର୍ଟକୁ ଆସିପାରନ୍ତି ନାହିଁ । ତେଣୁ ମାମଲାର ଶୁଣାଣି ବିଳମ୍ବ ହୁଏ ।
ଏହିସବୁ ପରିସ୍ଥିତିକୁ ଦେଖି ଭିଡିଓ କନ୍ଫେରେନ୍ସିଂରେ ଶୁଣାଣି କରିବାକୁ କୋର୍ଟଙ୍କ ନିଷ୍ପତ୍ତି ପରେ ଜେଲ୍ ବିଭାଗ ତାହାକୁ ଲାଗୁ କରିଛି । ସମସ୍ତ ସାକ୍ଷୀ ଏବେ ଭିଡିଓ କନ୍ଫେରେନ୍ସିଂ ଜରିଆରେ ଶୁଣାଣିବେଳେ ଉପସ୍ଥିତ ରହିପାରିବେ । ସମୟ ଅଭାବରୁ ବିଭିନ୍ନ ସମୟରେ ଡାକ୍ତରମାନେ ସାକ୍ଷୀ ଦେବାକୁ ଯାଉନଥିବା ଦେଖିବାକୁ ମିଳିଥାଏ । ହେଲେ ଏହି ବ୍ୟବସ୍ଥା ହେବା ପରଠାରୁ ଡାକ୍ତରମାନେ ହସ୍ପିଟାଲରେ ରହି ଶୁଣାଣିବେଳେ ଉପସ୍ଥିତ ରହିପାରିବେ । ସେହିପରି ପୁଲିସ ମଧ୍ୟ ଥାନାରେ ରହି ହାଜର ହୋଇପାରିବେ ବୋଲି ଜେଲ୍ ଡିଜି କହିଛନ୍ତି। ଏଥିସହ ଶୁଣାଣିବେଳେ ଭିଡିଓ କନ୍ଫେରେନ୍ସିଂରେ ଜେଲ୍ ପରିସରରୁ ସମ୍ପୃକ୍ତ ଅଭିଯୁକ୍ତ ସାମିଲ ହେବା ସହ ଅନ୍ୟ ସାକ୍ଷୀମାନେ ଘରେ ରହି ମୋବାଇଲ ଦ୍ୱାରା ଭିଡିଓ କନ୍ଫେରେନ୍ସିଂରେ ଉପସ୍ଥିତ ରହିବେ । ସେମାନଙ୍କୁ ଭିଡିଓ କଲ୍ର ଲିଙ୍କ୍ ସେୟାର କରିଦିଆଯିବ । ସେମାନେ ଲିଙ୍କ୍ ଜରିଆରେ ସାମିଲ ହେବେ । କୌଣସି ସାକ୍ଷୀଙ୍କ ଯଦି ମୋବାଇଲ ନଥିବ, ତା’ହେଲେ ତାଙ୍କୁ କୋର୍ଟ ଯିବାକୁ ପଡ଼ିବ । କୋର୍ଟ ପରିସରରେ ଥିବା ଭିଡିଓ କନ୍ଫେରେନ୍ସିଂ ହଲ୍କୁ ଯାଇ ସେ ଶୁଣାଣି ସମୟରେ ଉପସ୍ଥିତ ରହିବେ ।
