ସତ୍ୟଶିଖା( ଫୁଲବାଣୀ ) ୧୪.୦୮ .୨୦୨୧: ଖୁସିରେ ଗଦ୍ଗଦ୍ ହୋଇପଡୁଛି ଜଗା ଓ ତାଙ୍କ ପରିବାର । କୋଳରେ ଅଛି ତା’ର ନୂଆ କୁନି ଭଉଣୀ । ଗତ ଦିନରେ ଭାଇ କାଳିଆକୁ ହରାଇ ମନଦୁଃଖ କରୁଥିବା ଜଗା ମୁହଁରେ ଏବେ ହସ ଫୁଟିଉଠିଛି । ଗତ ୮ ଦିନ ହେଲା ଜଗା ପାଇଛି ତା’ର ସାନ ଭଉଣୀ ସୁଭଦ୍ରାକୁ । ଏଥିରେ କେବଳ ଜଗା ନୁହେଁ , ତାଙ୍କ ମାଆ ପୁଷ୍ପାଳି କହଁର ଓ ବାପା ଭୁୂୟାଁ କହଁର ମଧ୍ୟ ବେଶ୍ ଖୁସିଅଛନ୍ତି । ପରିବାରରେ ଖେଳିଯାଇଛି ଖୁସିର ଲହରି । ଫିରିଙ୍ଗିଆ ବ୍ଲକର ମିଲୁପଦର ଗ୍ରାମର ଯୋଡ଼ାଶିଶୁ ଜଗା ଓ କାଳିଆ ।
ଏହି ଖବର ଗତ ଦିନରେ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପରେ ରାଜ୍ୟ ସରକାର ତାଙ୍କର ଚିକିତ୍ସା ଦାୟିତ୍ୱ ନେଇଥିଲେ । ଲକ୍ଷ ଲକ୍ଷ ଟଙ୍କା ଖର୍ଚ୍ଚରେ ଜଗା-ବଳିଆଙ୍କୁ ଦିଲ୍ଲୀ ସ୍ଥିତ ଏମ୍ସ୍ରେ ଜୋଡ଼ାମୁଣ୍ଡକୁ ଅଲଗା କରି ଚିକିତ୍ସା କରାଯାଇଥିଲା । ଦୀର୍ଘଦିନ ପରେ ଦିଲ୍ଲୀରେ ରହିବା ପରେ ସେମାନଙ୍କୁ କଟକ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିଲେ ମଧ୍ୟ କଟକରେ ବଳିଆ ଅସୁସ୍ଥ ହୋଇ ଜୀବନ ହାରିଥିଲା ।
ସେହି ସମୟରେ ଜଗା-କାଳିଆଙ୍କ ପାଇଁ ଗାଁଠାରୁ ଆରମ୍ଭ କରି ସହର ପର୍ଯ୍ୟନ୍ତ ସବୁଠାରେ ପୂଜାର୍ଚ୍ଚନା କରାଯାଇଥିଲା । କଟକରେ ଜଗା ଏକୁଟିଆ ହୋଇପଡ଼ିଥିବା ବେଳେ ସେ ସୁସ୍ଥ ଥିଲା । ଗତ କିଛିମାସ ହେଲା ଜଗାକୁ ଫୁଲବାଣୀ ମୁଖ୍ୟ ଚିକିତ୍ସାଳୟରେ ସ୍ୱତନ୍ତ୍ର ଭାବେ ରଖାଯାଇ ଦେଖାଚାହାଁ କରାଯାଉଛି । ନିକଟରେ କନ୍ଧମାଳ ଜିଲ୍ଲା ଗସ୍ତରେ ଆସିଥିବା ପଞ୍ଚାୟତିରାଜ ମନ୍ତ୍ରୀ ମଧ୍ୟ ସାକ୍ଷାତ କରିଥିଲେ ଜଗାକୁ । ତେବେ ଏକୁଟିଆ ଥିବା ଜଗା ତା’ର ଭାଇ ବଳିଆକୁ ସିନା ହରାଇଛି, କିନ୍ତୁ ଗତ ୮ ଦିନ ହେଲା ପାଇଛି ତା’ର ଭଉଣୀକୁ । ଗତ ଶନିବାର ଅପରାହ୍ନ ପ୍ରାୟ ୪ଟାରେ ଜନ୍ମ ନେଇଛି ସୁଭଦ୍ରା । ସୁଭଦ୍ରାକୁ ପାଇଁ ଜଗା ମନରେ ଖୁସି କହିଲେ ନସରେ ।
କାଳିଆ ଆଉ ଦୁନିଆରେ ନାହିଁ ସତ । କିନ୍ତୁ ଜଗା ମଧ୍ୟ ଆଉ ଏକୁଟିଆ ରହିବ ନାହିଁ । ଜଗାକୁ ମିଳିଯାଇଛି ଭଉଣୀ ସଭଦ୍ରା । ସେ ବେଶ୍ ସୁସ୍ଥ ଅଛି । କାଳିଆକୁ ଆମେ ହରାଇଛୁ ସତ, କିନ୍ତୁ ଭଗବାନଙ୍କ ଆଶୀର୍ବାଦରୁ ଆମେ ଜଗା ପାଇଁ ସୁଭଦ୍ରାଟିଏ ପାଇ ବେଶ୍ ଖୁସି ଅଛୁ ବୋଲି ପ୍ରକାଶ କରିଛନ୍ତି ମାଆ ସଂଯୁକ୍ତା ଓ ବାପା ଭୁୟାଁ କହଁର । ଏହି ଖବର ପ୍ରଚାର ପରେ ଏବେ ଡାକ୍ତରଖାନରେ ଅନେକଙ୍କ ଭିଡ଼ ଜମୁଥିବାର ଦେଖାଯାଇଛି ।
