ସତ୍ୟଶିଖା ୨୯/୦୧/୨୦୧୧ : ପାନ ଦୋକାନରେ ବିକ୍ରି ହେଉଛି ଗଞ୍ଜେଇ ସିଗାରେଟ । ଦିନ ଦ୍ୱିପ୍ରହରରେ ରାଜଧାନୀର ଛାତିି ଉପରେ ବେଧଡକ ଚାଲିଛି ଏଭଳି ଗଞ୍ଜେଇ ବେପାର । ପୋଲିସକୁ ଚକମା ଦେବାକୁ ଏଭଳି ଭିନ୍ନ ଉପାୟ ଆପଣାଇଥିଲେ ଦୋକାନୀ , କିନ୍ତୁ ଦୋକାନୀଙ୍କ ଏହି ଚାଲାକି ଫେଲ ମାରିଛି । ସିଗାରେଟ ଭିତରେ ଗଞ୍ଜେଇ ଭର୍ତ୍ତି କରି ବିକ୍ରି କରୁଥିବା ବେଳେ ଅବକାରୀ ବିଭାଗର ପଞ୍ଝାରେ ପଡିଛି ଅସାଧୁ ବ୍ୟବସାୟୀ । ମିଳିଥିବା ସୂଚନା ମୁତାବକ ଭୁବନେଶ୍ୱର ବିଶେଶ୍ୱର ବସ୍ତିରେ ଗତ କିଛି ହେବ ସିଗାରେଟରେ ଗଞ୍ଜେଇ ଭର୍ତ୍ତି କରି ବିକ୍ରି ଚାଲିଥିଲା । ଅବକାରୀ ବିଭାଗ ଓ ପୋଲିସ ନଜରରୁ ବର୍ତ୍ତିବା ପାଇଁ ଏଭଳି ଉପାୟ ଆପଣାଇଥିଲେ ଦୋକାନୀ । ତେବେ ସିଗାରେଟରେ ଗଞ୍ଜେଇ ଭର୍ତ୍ତି କରି ବିକ୍ରି କରୁଥିବା ନେଇ କୌଣସି ସୂତ୍ରରୁ ଖବର ପାଇ ଆଜି ଅବକାରୀ ବିଭାଗ ବିଶେଶ୍ୱର ବସ୍ତିରେ ଚଢାଉ କରିଥିଲା । ଗ୍ରାହକ ସାଜି ଗଞ୍ଜେଇ ସିଗାରେଟ ମାଗିଥିଲେ ଭୁବନେଶ୍ୱର ଅବକାରୀ ବିଭାଗର ଆଇଆଇସି । ଆଉ ସିଗାରେଟ ବଢାଇବା ମାତ୍ରେ ଦୋକାନ ଉପରେ ଅବକାରୀ ବିଭାଗ ଚଢାଉ କରିଥିଲା । ଆଉ ଚଢାଉ ବେଳେ ଅବକାରୀ ବିଭାଗ ଯାହା ଦେଖିଥିଲା ତାହା ପୂରା ଟିମକୁ ତାଜୁବ କରି ଦେଇଥିଲା । ଦୋକାନରୁ ୨୦୦୦ରୁୁ ଅଧିକ ଗଞ୍ଜେଇ ସିଗାରେଟ ସହ ୧୫ କିଲୋରୁ ଅଧିକ ଗଞ୍ଜେଇ ଜବତ କରିଛି ଅବକାରୀ ବିଭାଗ । ଏହି ଘଟଣାରେ ୨ ଜଣ ଅଭିଯୁକ୍ତଙ୍କୁ ଗିରଫ କରାଯାଇଛି ।
