ସତ୍ୟଶିଖା ୦୧/୦୧/୨୦୨୧ : ଜୟଦେବ ବିହାରରୁ ନନ୍ଦନକାନନ ରାସ୍ତା ମଧ୍ୟରେ ସୃଷ୍ଟି ହେଉଥିବା ଟ୍ରାଫିକ୍ ସମସ୍ୟାର ସମାଧାନ ପାଇଁ ରାଜ୍ୟ ସରକାର ନୀଳନକ୍ସା ପ୍ରସ୍ତୁତ କରିଛନ୍ତି । ପ୍ରଥମ ପର୍ଯ୍ୟାୟରେ ୪ ଥାକିଆ ବିଶିଷ୍ଟ ଜୟଦେବ ବିହାର-କିଟ୍ ଛକ ରାସ୍ତାକୁ ୬ ଥାକିଆ କରାଯିବ । ଏଥିସହ ୭ କିଲୋମିଟର ବିଶିଷ୍ଟ ଏହି ରାସ୍ତାରେ ଦୁଇଟି ଫ୍ଲାଏଓଭର ନିର୍ମାଣ କରିବାକୁ ନିଷ୍ପତ୍ତି ନିଆଯାଇଛି । ଟ୍ରାଫିକ୍ ସମସ୍ୟା ସୃଷ୍ଟି ହେଉଥିବା ନାଲ୍କୋ ଓ ଡମଣା ଛକରେ ଏହି ଦୁଇଟି ଫ୍ଲାଏଓଭର୍ ନିର୍ମାଣ ହେବ । ମାସକ ମଧ୍ୟରେ ଟେଣ୍ଡର୍ ପ୍ରକ୍ରିୟା ଶେଷ ହେବା ସହ କାର୍ଯ୍ୟ ଆରମ୍ଭ ହେବ । ୨୦୨୩ ସୁଦ୍ଧା ଫ୍ଲାଏଓଭର୍ କାର୍ଯ୍ୟକ୍ଷମ କରିବାକୁ ଲକ୍ଷ୍ୟ ରଖାଯାଇଛି ।
ଏହାବ୍ୟତୀତ ଗହଳି ହେଉଥିବା ଏହି ରାସ୍ତାର ଟ୍ରାଫିକ୍ ସମସ୍ୟାର ସମାଧାନ ଲାଗି ଚାଲିଥିବା ଦୁଇଟି ସମାନ୍ତରାଳ ରାସ୍ତାର ନିର୍ମାଣ କାର୍ଯ୍ୟ ୨୦୨୧ମଧ୍ୟରେ ସାରିବାକୁ ଯୋଜନା ହୋଇଛି । ସୈନିକ ସ୍କୁଲରୁ ଡମଣା ଛକକୁ ସଂଯୋଗ କରୁଥିବା ରାସ୍ତା ନିର୍ମାଣ କାର୍ଯ୍ୟ ସାମାନ୍ୟ ବିଳମ୍ବ ହୋଇପାରେ । ତେଣୁ ପ୍ରାରମ୍ଭିକ ପର୍ଯ୍ୟାୟରେ ଶିଖରଚଣ୍ଡୀ ପାଦଦେଶରୁ ସାଲିଆସାହିକୁ ସଂଯୋଗ କରିବାକୁ ଥିବା ବିକଳ୍ପ ରାସ୍ତାର ଅଧା ଅଂଶ ଖୋଲିବାକୁ ସ୍ଥିର ହୋଇଛି । ସାଲିଆ ସାହିରେ ଜବରଦଖଲ ଉଚ୍ଛେଦ ବେଳେ ସମସ୍ୟା ସୃଷ୍ଟି ହେଉଥିବାରୁ ଶିଖରଚଣ୍ଡୀ ପାଦଦେଶରୁ ଆସୁଥିବା ରାସ୍ତାକୁ ଜାଭିଅର୍ ଛକ ନିକଟରେ ମିଶାଯିବ । ଏହି ରାସ୍ତା ନିର୍ମାଣ କାର୍ଯ୍ୟ ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଲାଣି । ବିଭିନ୍ନ ପର୍ଯ୍ୟାୟରେ ନିର୍ମାଣ ହେଉଥିବା ଏହି ବିକଳ୍ପ ରାସ୍ତା ବିର୍ସାମୁଣ୍ଡା ଛକରେ ଚାଲିଛି । ଆସନ୍ତା ୬ ମାସ ତଥା ୨୦୨୧ ଜୁନ୍/ଜୁଲାଇ ସୁଦ୍ଧା ଏହି ବିକଳ୍ପ ରାସ୍ତା ଖୋଲିବାକୁ ଲକ୍ଷ୍ୟ ରଖାଯାଇଛି । ଫଳରେ ଆଗାମୀ ଦୁଇ ବର୍ଷ ଧରି ନିର୍ମାଣ ହେବାକୁ ଥିବା ଦୁଇଟି ଓଭରବ୍ରିଜ୍ ନିକଟରେ ଟ୍ରାଫିକ୍ ସମସ୍ୟାକୁ ଦୂର କରାଯାଇପାରିବ ।
ନାଲ୍କୋ ଛକରେ ହେବାକୁ ଥିବା ପ୍ରଥମ ଓଭର ବ୍ରିଜ୍ ଜାଭିଅର ଛକ ନିକଟ ଫର୍ଚ୍ୟୁନ୍ ଟାୱାର ସମ୍ମୁଖରୁ ଆରମ୍ଭ ହେବ । ପ୍ରାୟ ୬୦୦ ମିଟର ହେବାକୁ ଥିବା ଏହି ଓଭରବ୍ରିଜ୍ ରେଳ ସଦନ ସମ୍ମୁଖ ପର୍ଯ୍ୟନ୍ତ ଲମ୍ବିବ । ଏହି ଓଭରବ୍ରିଜ୍ ନିର୍ମାଣ ଲାଗି ୪୦ କୋଟି ଟଙ୍କାର ବ୍ୟୟ ଅଟକଳ ହୋଇଛି । ସେହିପରି ଡମଣା ଛକରେ ହେବାକୁ ଥିବା ଓଭରବ୍ରିଜ୍ ୭୫୦ମିଟରର ହେବ । ଚନ୍ଦ୍ରଶେଖରପୁର ଭାରତୀୟ ପେଟ୍ରୋଲ୍ ପମ୍ପ ନିକଟରୁ ଆରମ୍ଭ ହେବାକୁ ଥିବା ଏହି ଓଭରବ୍ରିଜ୍ ଚନ୍ଦ୍ରଖେଶରପୁର ଥାନା ଛକର କ୍ଲବଟାଉନ୍ ଆପାର୍ଟମେଣ୍ଟ ଯାଏ ଲମ୍ବିବ । ଏଥିପାଇଁ ୪୫ କୋଟି ଟଙ୍କା ଖର୍ଚ୍ଚ କରିବାକୁ ନିଷ୍ପତ୍ତି ନିଆଯାଇଛି । ଭୁବନେଶ୍ୱର ଡିଭିଜନ୍-୩ ଦ୍ବାରା ପ୍ରସ୍ତୁତ ହୋଇଥିବା ପ୍ଲାନ୍କୁ ପୂର୍ତ୍ତ ବିଭାଗକୁ ପଠାଯାଇଛି । ମୁଖ୍ୟଯନ୍ତ୍ରୀ(ରାସ୍ତା) ଏହା ଉପରେ ଅନୁଧ୍ୟାନ ଜାରି ରଖିଛନ୍ତି । ଜାନୁଆରି ମାସରେ ଚୂଡ଼ାନ୍ତ ରୂପରେଖ ପ୍ରସ୍ତୁତ ହେବ ବୋଲି ପୂର୍ତ୍ତ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି ।
ଅନ୍ୟପକ୍ଷରେ ନିର୍ମାଣ ହେବାକୁ ଥିବା ୬ ଥାକିଆ ରାସ୍ତା ଉପରେ ଏବେ ଅନୁଧ୍ୟାନ ଜାରି ରହିଛି । ପ୍ରଥମ ପର୍ଯ୍ୟାୟରେ ସମ୍ପ୍ରସାରଣ ହେବାକୁ ଥିବା ୭ କିମି ବିଶିଷ୍ଟ ଏହି ରାସ୍ତାରେ ଅଧିକାଂଶ ସରକାରୀ ଜମି ରହିଛି । ଅଳ୍ପ କିଛି ସ୍ଥାନରେ ବେସରକାରୀ ଜମି ରହିଥିବାରୁ ତାହାକୁ ହଟାଇବା ପ୍ରଶାସନ ପାଇଁ ଚାଲେଞ୍ଜ ହେବ । ହଜାରରୁ ଅଧିକ ଗଛ କାଟିବାକୁ ପଡ଼ିବ । ତେବେ ଏହି ରାସ୍ତା ସମ୍ପ୍ରସାରିତ ହେବା ପରେ ଉତ୍ତର ଭୁବନେଶ୍ବର ନିର୍ବାଚନମଣ୍ଡଳୀ ନୂଆ ରୂପ ପାଇବ। ଚନ୍ଦ୍ରଶେଖରପୁର, ଚନ୍ଦକା, ପଟିଆ, ଇନ୍ଫୋସିଟ୍ ଆଦି ଅଞ୍ଚଳ ବାଣିଜ୍ୟିକ ପେଣ୍ଠସ୍ଥଳୀ ପାଲଟିବା ସହ ପର୍ଯ୍ୟଟନ ମାନଚିତ୍ରରେ ସ୍ବତନ୍ତ୍ର ସ୍ଥାନ ହାସଲ କରିବ । ଉତ୍ତର ଭୁବନେଶ୍ବର ବିଧାୟକ ସୁଶାନ୍ତ କୁମାର ରାଉତ କହିଛନ୍ତି ଯେ ନାଲକୋ ଓ ଡମଣା ଛକରେ ଫ୍ଲାଏଓଭର୍ ନିର୍ମାଣ ନେଇ ପ୍ରକ୍ରିୟା ଆରମ୍ଭ ହୋଇସାରିଛି । ଖୁବ୍ଶୀଘ୍ର ଟେଣ୍ଡର ଡକାଯିବା ପରେ କାର୍ଯ୍ୟ ଆରମ୍ଭ ହେବ । ଏହି ଫ୍ଲାଏଓଭର ନିର୍ମାଣ ପରେ ଉତ୍ତର ଭୁବନେଶ୍ବର ନିର୍ବାଚନମଣ୍ଡଳୀ ବିକାଶର ନୂଆ ସୋପାନରେ ପହଞ୍ଚିବ । ୨୦୨୩ ପର୍ଯ୍ୟନ୍ତ ଫ୍ଲାଏଓଭର ନିର୍ମାଣ ଚାଲିବ । ଏହି ସମୟ ମଧ୍ୟରେ ନାଲ୍କୋ ଓ ଡମଣା ଛକରେ ସୃଷ୍ଟି ହେବାକୁ ଥିବା ଟ୍ରାଫିକ୍ ସମସ୍ୟାର ସମାଧାନ ଲାଗି ଯୁଦ୍ଧକାଳୀନ ଭିତ୍ତିରେ ବିକଳ୍ପ ରାସ୍ତା ନିର୍ମାଣ ଚାଲିଛି । ଆସନ୍ତା ୬ ମାସ ମଧ୍ୟରେ ଏହି ରାସ୍ତା ଜାଭିୟର ଛକକୁ ଛୁଇଁବା ପରେ ନନ୍ଦନକାନନ ରାସ୍ତାରେ ଟ୍ରାଫିକ୍ ସମସ୍ୟା ବହୁମାତ୍ରାରେ କମିଯିବ ।
