ସତ୍ୟଶିଖା(ନୂଆଦିଲ୍ଲୀ ) ୧୮.୦୬.୨୦୨୧: ମହାମାରୀ କରୋନା ସମୟରେ ବି ସ୍ୱିସ ବ୍ୟାଙ୍କରେ ଭାରତର ଲୋକ ଓ ଭାରତୀୟ କମ୍ପାନୀ ଗୁଡ଼ିକ ଅର୍ଥ ଜମା କରିବାକୁ ପଛାଉ ନାହାନ୍ତି। ସ୍ୱିସ ବ୍ୟାଙ୍କରେ ଜମା କଳାଧନ ଫେରାଇ ଆଣିବାକୁ ମୋଦି ସରକାର ପ୍ରତିଶ୍ରୁତି ଦେଇଥିଲେ ହେଁ ଏହାର କୌଣସି ସୁଫଳ ଦେଖିବାକୁ ମିଳିନାହିଁ।
୨୦୨୦ ବର୍ଷରେ ସ୍ୱିସ ବ୍ୟାଙ୍କରେ ଭାରତୀୟଙ୍କ ଜମା ୨.୫୫ ବିଲିୟନ ସ୍ୱିସ୍ ଫ୍ରାଙ୍କ ବା ୨୦,୭୦୦ କୋଟିରୁ ଅଧିକ ଟଙ୍କାକୁ ବୃଦ୍ଧି ପାଇଛି। ଗତ ୧୩ ବର୍ଷ ମଧ୍ୟରେ ଏହା ସର୍ବାଧିକ। ଭାରତରେ ଥିବା ସ୍ୱିସ୍ ବ୍ୟାଙ୍କର ଶାଖା ଓ ଅନ୍ୟାନ୍ୟ ଆର୍ଥିକ ପ୍ରତିଷ୍ଠାନ ମାଧ୍ୟମରେ ଭାରତୀୟମାନେ ସେଠାରେ ପାଣ୍ଠି ରଖିଛନ୍ତି। ସିକ୍ୟୁରିଟିଜ ଓ ଅନ୍ୟାନ୍ୟ ଆର୍ଥିକ ସାଧନ ମାଧ୍ୟମରେ ବି ଭାରତୀୟମାନେ ଟଙ୍କା ସ୍ୱିସ ବ୍ୟାଙ୍କରେ ଜମା କରିଛନ୍ତି।
ଗୁରୁବାର ସ୍ୱିଜରଲ୍ୟାଣ୍ଡର କେନ୍ଦ୍ରୀୟ ବ୍ୟାଙ୍କ ପକ୍ଷରୁ ଜାରି ବାର୍ଷିକ ରିପୋର୍ଟରୁ ଏପରି ତଥ୍ୟ ସାମ୍ନାକୁ ଆସିଛି। ରିପୋର୍ଟ ଅନୁସାରେ, ଲଗାତାର ଦୁଇ ବର୍ଷ ଧରି ସ୍ୱିସ୍ ବ୍ୟାଙ୍କରେ ଭାରତୀୟଙ୍କ ଜମା ରାଶି ହ୍ରାସ ଘଟିଥିଲା। ୨୦୧୯ ଶେଷ ବେଳକୁ ସ୍ୱିସ୍ ବ୍ୟାଙ୍କରେ ଭାରତୀୟ ଓ ଭାରତୀୟ କମ୍ପାନୀର ଜମା ରାଶି ୮୯୯ ନିୟୁତ ସ୍ୱିସ ଫ୍ରାଙ୍କ ବା ୬୬୨୫ କୋଟି ଥିଲା। ତେବେ ଏହା ଏବେ ୧୩ ବର୍ଷ ମଧ୍ୟରେ ସର୍ବୋଚ୍ଚ ସ୍ତରରେ ପହଞ୍ଚି ଯାଇଛି।
୨୦୦୬ ମସିହାରେ ସ୍ୱିସ ବ୍ୟାଙ୍କରେ ଭାରତୀୟଙ୍କ ଜମା ରାଶି ରେକର୍ଡ ୬.୫ ବିଲିୟନ ସ୍ୱିସ୍ ଫ୍ରାଙ୍କ୍ ରହିଥିଲା। ୨୦୧୧, ୨୦୧୨ ଓ ୨୦୧୭କୁ ବାଦ ଦେଲେ ଆଉ ସବୁବେଳେ ଏହା ହ୍ରାସ ଘଟିଥିଲା।
୨୦୨୦ରେ ସ୍ୱିସ ବ୍ୟାଙ୍କରେ ଥିବା ୨୦,୭୦୦ କୋଟି ମଧ୍ୟରୁ କଷ୍ଟମ ଡିପୋଜିଟ୍ ଭାବେ ୪୦୦୦ କୋଟି ଟଙ୍କା, ଅନ୍ୟ ବ୍ୟାଙ୍କଗୁଡ଼ିକ ଜରିଆରେ ୩୧୦୦ କୋଟି ଟଙ୍କା, ଟ୍ରଷ୍ଟ ମାଧ୍ୟମରେ ୧୬.୫ କୋଟି, ବଣ୍ଡ, ସିକ୍ୟୁରିଟିଜ୍ ଓ ଅନ୍ୟାନ୍ୟ ମାଧ୍ୟମରେ ୧୩୫୦୦ କୋଟି ଟଙ୍କା ରଖାଯାଇଛି।
