ଭାରତ ବନ୍ଦରେ ୩୫୦ କୋଟିର ବେପାର ପ୍ରଭାବିତ

ସତ୍ୟଶିଖା (ଭୁବନେଶ୍ୱର) ୦୯/୧୨/୨୦୨୦ : କୃଷକମାନଙ୍କ ଆନ୍ଦୋଳନକୁ ସମର୍ଥନ କରି ଆଜି ଭାରତ ବନ୍ଦ ପାଳନ କରାଯାଇଛି । ଏଥିରେ ରାଜ୍ୟର ଅର୍ଥନୀତି ଆଂଶିକ ପ୍ରଭାବିତ ହୋଇଛି । ଆଜି ପ୍ରଥମାଷ୍ଟମୀ ଥିବାରୁ ଦୋକାନ ବଜାରଗୁଡ଼ିକରେ ଭଲ ବେପାର ହୋଇଥାନ୍ତା । କିନ୍ତୁ ଦିନ ତିନିଟା ପର୍ଯ୍ୟନ୍ତ ବନ୍ଦ ପାଳନ କରାଯିବାରୁ ଅଧିକାଂଶ ଦୋକାନ ବନ୍ଦ ରହିଥିଲା । ଦିନ ସାରାକୁ ଯଦି ବିଚାରକୁ ନିଆଯିବ ତେବେ ଆଜି ରାଜ୍ୟରେ ୨୫% ଦୋକାନ ବନ୍ଦ ଓ ୭୫% ଖୋଲାଥିଲା ବୋଲି କୁହାଯାଇପାରିବ । ଏ ସମ୍ପର୍କରେ ଓଡ଼ିଶା ବ୍ୟବସାୟୀ ସଂଘର ସାଧାରଣ ସମ୍ପା‌ଦକ ସୁଧାକର ପଣ୍ଡା କହିଛନ୍ତି ଯେ କୃଷକ ଆନ୍ଦୋଳନକୁ ଆମର ନୈତିକ ସମର୍ଥନ ରହିଛି । ଆଜିର ବନ୍ଦ ପାଳନ ବେଳେ ପିକେଟିଂ ଯୋଗୁଁ କିଛି ସ୍ଥାନରେ ଦୋକାନ ବନ୍ଦ ଥିଲା । ମାତ୍ର ଅନେକ ସ୍ଥାନ ବିଶେଷ କରି ଗ୍ରାମାଞ୍ଚଳରେ ଥିବା ଖୁଚୁରା ଦୋକାନଗୁଡ଼ିକ ଖୋଲା ଥିଲା । ବ୍ୟବସାୟୀ ସଂଘ ଅଧୀନରେ ରାଜ୍ୟର ୨୦ ଲକ୍ଷ ଖୁଚୁରା ଦୋକାନ ରହିଛି । ‌ଏହି ଦୋକାନଗୁଡ଼ିକରେ ଦିନକୁ ପ୍ରାୟ ୪୦୦ କୋଟି ଟଙ୍କାର କାରବାର ହୁଏ ।ଆଜି ଭାରତ ବନ୍ଦ ପାଳନ କରାଯିବା ଯୋଗୁଁ ପ୍ରାୟ ୧୦୦ କୋଟି ଟଙ୍କାର ବ୍ୟବସାୟ ପ୍ରଭାବିତ ହୋଇଥିବା ଆଶଙ୍କା କରାଯାଉଛି । ଆଜି ପରିବହନ ଶିଳ୍ପ ଉପରେ ମଧ୍ୟ ବନ୍ଦ ପାଳନର ପ୍ରଭାବ ଅନୁଭୂତ ହୋଇଥିଲା । ଯଦି ପରିବହନ ଏବଂ ଖୁଚୁରା ବ୍ୟବସାୟ ଉଭୟ କ୍ଷେତ୍ରକୁ ବିଚାରକୁ ନିଆଯିବ ତେବେ ୩୦୦ କୋଟି ଟଙ୍କାର ବେପାର ପ୍ରଭାବିତ ହୋଇଥିବା ଅନୁମାନ କରାଯାଉଛି ବୋଲି ଶ୍ରୀ ପଣ୍ଡା କହିଛନ୍ତି ।ପେଟ୍ରୋଲ୍ ଓ ଡିଜେଲ୍ ବିକ୍ରି ଉପରେ ମଧ୍ୟ ବନ୍ଦ ପାଳନର ପ୍ରଭାବ ସ୍ପଷ୍ଟ ଅନୁଭୂତ ହୋଇଛି । ଏ ସମ୍ପର୍କରେ ଉତ୍କଳ ପେଟ୍ରୋଲିୟମ୍ ଡିଲର ସଂଘର ସାଧାରଣ ସମ୍ପାଦକ ସଞ୍ଜୟ ଲାଠ୍‌ କହିଛନ୍ତି ଯେ ସ୍ବାଭାବିକ ଦିନରେ ଓଡ଼ିଶାରେ ଦୈନିକ ୨୩.୮୬ କୋଟି ଟଙ୍କା ମୂଲ୍ୟର ୨୮.୨୯ ଲକ୍ଷ ଲିଟର ପେଟ୍ରୋଲ୍‌ ଓ ୬୬.୮୪ କୋଟି ଟଙ୍କା ମୂଲ୍ୟର ୮୩.୦୫ ଲକ୍ଷ ଲିଟର ଡିଜେଲ୍ ବିକ୍ରି ହୋଇଥାଏ । ସେଥିରୁ ଭୁବନେଶ୍ବରେ ଦେଢ଼ ଲକ୍ଷ ଲିଟର ପେଟ୍ରୋଲ୍ ଓ ୨ ଲକ୍ଷ ଲିଟର ଡିଜେଲ୍ ବିକ୍ରି ହୁଏ । ପରିବହନ କ୍ଷେତ୍ର ପ୍ରଭାବିତ ହୋଇଥିବାରୁ ଆଜି ତୈଳ ବିକ୍ରି ୮୦% ହ୍ରାସ ପାଇଛି ବୋଲି ଆକଳନ କରାଯାଇଛି । ହିସାବ ଅନୁସାରେ ସ୍ବାଭାବିକ ଦିନ ତୁଳନାରେ ଆଜି ୧୯.୦୮ କୋଟି ଟଙ୍କାର ପେଟ୍ରୋଲ୍ ଓ ୫୩.୪୭ କୋଟି ଟଙ୍କାର କମ୍ ଡିଜେଲ୍ ବିକ୍ରି ହୋଇଛି । ‌ତେଣୁ ଉଭୟ କେନ୍ଦ୍ର ଓ ରାଜ୍ୟ ସରକାର ମୋଟ ଉପରେ ୪୪.୩୪ କୋଟି ଟଙ୍କାର ଟିକସ ପାଇବାକୁ ବଞ୍ଚିତ ହୋଇଛନ୍ତି । ରାଜ୍ୟ ସରକାର ୧୫.୭୪ କୋଟି ଟଙ୍କା ଓ କେନ୍ଦ୍ର ସରକାର ୨୮.୬୦ କୋଟି ଟଙ୍କାର ଟିକସ ହରାଇଛନ୍ତି ବୋଲି ସେ କହିଛନ୍ତି । ବ୍ୟାଙ୍କ ସେବା ଉପରେ ବନ୍ଦ ପାଳନର ପ୍ରଭାବ ଆଂଶିକ ଥିଲା ବୋଲି ଏଆଇବିଓସିର ରାଜ୍ୟ ସଭାପତି ଦାମୋଦର ନନ୍ଦ କହିଛନ୍ତି । ବ୍ୟାଙ୍କ ସଂଘ ତରଫରୁ ଆଜିର ବନ୍ଦ ପାଳନକୁ ନୈତିକ ସମର୍ଥନ ଦିଆଯାଇଥିଲା । କିଛି ସମ୍ବେଦନଶୀଳ ସ୍ଥାନରେ ବ୍ୟାଙ୍କ ବନ୍ଦ ଥିଲା ଓ ଅନ୍ୟ ସ୍ଥାନଗୁଡ଼ିକରେ ଖୋଲାଥିଲା । ସେଥିପାଇଁ ସରକାରୀ କାରବାର, ଚେକ୍ କ୍ଲିୟରାନ୍ସ ଓ ଶାଖାରେ ଟଙ୍କା ଜମା ଓ ଉଠାଣ ପ୍ରଭାବିତ ହୋଇଛି । ମୋଟ ଉପରେ ପ୍ରାୟ ୨-୩ ହଜାର କୋଟି ଟଙ୍କାର ବ୍ୟାଙ୍କ କାରବାର ପ୍ରଭାବିତ ହୋଇଥିବା ସେ କହିଛନ୍ତି ।