ସତ୍ୟଶିଖା (ନୂଆଦିଲ୍ଲୀ) ୧୨/୦୨/୧୦୨୧ : ଦେଶବ୍ୟାପୀ କୋଭିଡ ଟିକାକରଣ କାର୍ଯ୍ୟ ଦ୍ରୁତଗତିରେ ଆଗେଇ ଚାଲିଛି । ଗୁରୁବାର କୋଭିଡ ଟିକାକରଣର ୨୭ ତମ ଦିନ ଥିଲା । ଏପର୍ଯ୍ୟନ୍ତ ଦେଶରେ ୭୪ ଲକ୍ଷ ୩୦ ହଜାର ୮୬୬ ଜଣଙ୍କୁ କୋଭିଡ ପ୍ରତିଷେଧକ ଟିକା ଦିଆଯାଇଛି । ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି, ଗତ ୨୪ଘଣ୍ଟା ମଧ୍ୟରେ ୪ ଲକ୍ଷ ୧୩ ହଜାର ୬୦୪ଜଣ କୋଭିଡ ପ୍ରତିଷେଧକ ଟିକା ନେଇଛନ୍ତି । ୭୦ ଲକ୍ଷରୁ ଅଧିକ ସ୍ୱାସ୍ଥ୍ୟ କର୍ମୀଙ୍କୁ ଶୀଘ୍ର କୋଭିଡ ଟିକା ଦେବାରେ ଭାରତ ବିଶ୍ୱର ପ୍ରଥମ ରାଷ୍ଟ୍ର ହୋଇ ପାରିଛି । ତେବେ ଭାରତ ଏହି ସଫଳତା ମାତ୍ର ୨୬ ଦିନ ସମୟ ମଧ୍ୟରେ ହାସଲ କରିଛି । ଅନ୍ୟ ପକ୍ଷରେ ଆମେରିକା ଏଥିପାଇଁ ୨୭ ଦିନ ସମୟ ନେଇଥିବା ବେଳେ ବ୍ରିଟେନ୍ ୪୮ଦିନ ସମୟ ନେଇଛି ।
ପ୍ରତିଦିନ ପ୍ରତିଷେଧକ ନେଉଥିବା ସ୍ୱାସ୍ଥ୍ୟ କର୍ମୀମାନଙ୍କ ସଂଖ୍ୟା କ୍ରମଶ ବୃଦ୍ଧି ପାଇବାରେ ଲାଗିଛି । ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି, ୧୩ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ଶତକଡ଼ା ୬୫ ଭାଗରୁ ଅଧିକ ପଞ୍ଜିକୃତ ସ୍ୱାସ୍ଥ୍ୟ କର୍ମୀ ପ୍ରତିଷେଧକ ଟିକା ନେଇ ସାରିଛନ୍ତି । ରାଜ୍ୟଗୁଡ଼ିକ ମଧ୍ୟରେ ବିହାର ଶୀର୍ଷ ସ୍ଥାନରେ ରହିଛି । ସେଠାରେ ଶତକଡ଼ା ୭୯ ଭାଗ ସ୍ୱାସ୍ଥ୍ୟ କର୍ମୀ ପ୍ରତିଷେଧକ ଟିକା ନେଇଛନ୍ତି । ୭ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଶତକଡ଼ା ୪୦ଭାଗରୁ କମ୍ ସ୍ୱାସ୍ଥ୍ୟ କର୍ମୀ ପ୍ରତିଷେଧକ ଟିକା
ନେଇଛନ୍ତି । ସେଗୁଡ଼ିକ ମଧ୍ୟରେ ପୁଡୁଚେରୀର ସ୍ଥାନ ସବୁଠୁ ନିମ୍ନରେ ରହିଛି । ପୁଡୁଚେରୀରେ ମାତ୍ର ୧୭.୫ % ସ୍ୱାସ୍ଥ୍ୟ କର୍ମୀ ପ୍ରତିଷେଧକ ଟିକା ନେଇଛନ୍ତି ।
