ସତ୍ୟଶିଖା(ଭୁବନେଶ୍ୱର) ୦୫.୦୬.୨୦୨୧: କରୋନା ବିରୋଧରେ ଟିକାକରଣକୁ ସମଗ୍ର ବିଶ୍ୱ ଏବେ ଗୁରୁତ୍ୱ ଦେଉଛନ୍ତି। ଭାରତରେ ମଧ୍ୟ ଟିକାକରଣ ଚାଲିଛି। ହେଲେ ଟିକାର ଅଭାବ ଥିବାରୁ ଦେଶରେ ଅନେକ ଟିକାକରଣ କେନ୍ଦ୍ର ବନ୍ଦ ହୋଇଯାଇଛି। ଏହାକୁ ନେଇ ବିରୋଧୀ ସରକାରଙ୍କ ଉପରେ ଅନେକ ପ୍ରଶ୍ନ ଉଠାଇଛନ୍ତି। ଏହାରି ଭିତରେ ନୀତି ଆୟୋଗର ସଦସ୍ୟ ତଥା କୋଭିଡ ଟାସ୍କ ଫୋର୍ସ କମିଟିର ମୁଖ୍ୟ ଡାକ୍ତର ଭି.କେ ପାଲ ଟିକାକରଣକୁ ନେଇ ଏକ ରିପୋର୍ଟ ରଖିଛନ୍ତି। ଯେଉଁଥିରେ ସେ କହିଛନ୍ତି କରୋନାର ପ୍ରଥମ ଡୋଜ ଦେବା ସଂଖ୍ୟାରେ ଭାରତ ଆମେରିକାକୁ ଟପିଯାଇଛି।
ପାଲ କହିଛନ୍ତି, “ତଥ୍ୟ ଅନୁଯାୟୀ, ଭାରତରେ କୋଭିଡ ଟିକାର ଅତି କମରେ ଗୋଟିଏ ଡୋଜ ନେଇଥିବା ଲୋକଙ୍କ ସଂଖ୍ୟା ୧୭.୨ କୋଟି ଥିବାବେଳେ ଆମେରିକାରେ ଏହି ସଂଖ୍ୟା ୧୬.୯ କୋଟି ରହିଛି। ସଂଖ୍ୟାକୁ ଦେଖିଲେ ଆମେରିକାକୁ ଭାରତ ପଛରେ ପକାଇ ଦେଇଛି। ଭାରତ ଟିକାକରଣ ଅଭିଯାନରେ କ୍ରମାଗତ ଭାବରେ ଆଗକୁ ବଢ଼ୁଛି। ଆଗାମୀ ଦିନରେ ଏହା ଆହୁରି ତ୍ୱରାନ୍ୱିତ ହେବ”।
