ଭାରତ-ଅଷ୍ଟ୍ରେଲିଆ ପ୍ରଥମ ଟ୍ବେଣ୍ଟି୨୦ ଆଜି

ସତ୍ୟଶିଖା ୦୪/୧୨/୨୦୨୦ : ଭ୍ରମଣକାରୀ ଭାରତ ବିପକ୍ଷରେ ଘରୋଇ ଦିନିକିଆ ସିରିଜ୍‌ର ପ୍ରଥମ ୨ଟି ମ୍ୟାଚ୍‌କୁ ସହଜରେ ଜିତିବା ପରେ ୩ୟ ଦିନିକିଆରେ ପରାସ୍ତ ହୋଇଛି ଅଷ୍ଟ୍ରେଲିଆ । ଦଳର କିଛି ପ୍ରମୁଖ ଖେଳାଳି ଆହତହେବା ଅଷ୍ଟ୍ରେଲିଆ ପରାଜୟର କାରଣ ହୋଇଥିଲା । ସମାନ ଆହତଗତ ସମସ୍ୟା ସହ ଭାରତ ବିପକ୍ଷରେ ଟ୍ବେଣ୍ଟି୨୦ ସିରିଜ୍ ଖେଳିବ ଅଷ୍ଟ୍ରେଲିଆ । ଶୁକ୍ରବାର ମାନୁକା ଓଭାଲ୍‌ରେ ୩ ମ୍ୟାଚ୍‌ ବିଶିଷ୍ଟ ଟି୨୦ ସିରିଜ୍‌ର ପ୍ରଥମ ମ୍ୟାଚ୍‌ ଖେଳାଯିବ । ଡେଭିଡ୍‌ ୱାର୍ଣ୍ଣର, ପ୍ୟାଟ୍‌ କମିନ୍‌ସ, ମିଚେଲ ଷ୍ଟାର୍କ ଓ ମାର୍କସ ଷ୍ଟୋଇନିସ୍‌ଙ୍କ ପରି ପ୍ରମୁଖ ଖେଳାଳିଙ୍କ ବିନା ଅଷ୍ଟ୍ରେଲିଆ ଟି୨୦ ସିରିଜ୍ ଖେଳିବ । ତେଣୁ ଏହି ସିରିଜ୍ ଜିତି ଦିନିକିଆ ସିରିଜ୍ ପରାଜୟର ପ୍ରତିଶୋଧ ନେବା ପାଇଁ ଭାରତୀୟ ଦଳ ନିକଟରେ ଏହା ଶ୍ରେଷ୍ଠ ସୁଯୋଗ । ଭାରତୀୟ ଦଳରେ ଆହତଗତ ସମସ୍ୟା ନାହିଁ । ପୁଣି ୩ୟ ଦିନିକିଆ ଜିତି ଏହା ଆତ୍ମବିଶ୍ବାସରେ ଭରପୂର ରହିଛି । ତେଣୁ ଟ୍ବେଣ୍ଟି୨୦ ସିରିଜ୍‌ରେ ମଧ୍ୟ ବିଜୟଧାରା ଜାରି ରଖିବାକୁ ଭାରତ ଚାହିଁବ ।ଗତ ଆଇପିଏଲ୍‌ରେ ଭଲ ପ୍ରଦର୍ଶନ କରିଥିବା ଖେଳାଳି ଭାରତୀୟ ଦଳରେ ଥିବାରୁ ପ୍ରଥମ ମ୍ୟାଚ୍‌ ସହ ସିରିଜ୍ ଜିତିବା ପାଇଁ ଏହା ଫେଭରିଟ୍ ‌। ଶିଖର ଧାୱନଙ୍କ ସହ କେ.ଏଲ୍‌. ରାହୁଲ ଇନିଂସ ଓପନ୍‌ କରିବେ । ଆଇପିଏଲ୍‌ରେ ଓପନ୍‌କରି ସର୍ବାଧିକ ରନ୍ କରିଥିବା ରାହୁଲଙ୍କୁ ତାଙ୍କ ପ୍ରିୟ ଓପ୍‌ନିଂ ସ୍ଥାନ ମିଳିବ । ଶ୍ରେୟାସ ଆୟରଙ୍କ ପରେ ମନୀଷ ପାଣ୍ଡେ ୫ନଂ ସ୍ଥାନରେ ବ୍ୟାଟିଂକରିବେ । ଦିନିକିଆ ପଦାର୍ପଣରେ ବାମହାତି ପେସ୍ ବୋଲର ଟି. ନଟରାଜନ୍ ଭଲ ପ୍ରଦର୍ଶନ କରିଛନ୍ତି । ତାଙ୍କୁ ଟି୨୦ ସିରିଜ୍‌ରେ ସୁଯୋଗ ମିଳିବା ନିଶ୍ଚିତ । ଦୀପକ ଚହର ୨ୟ ପେସ୍ ବୋଲର ଭାବେ ଖେଳିଲେ ମହମ୍ମଦ ସାମି ଓ ଯଶପ୍ରୀତ ବୁମ୍‌ରାଙ୍କ ମଧ୍ୟରୁ ଜଣଙ୍କୁ ବିଶ୍ରାମ ମିଳିବ । ରବୀନ୍ଦ୍ର ଜାଡ଼େଜାଙ୍କ ସହ ୟୁଜବେନ୍ଦ୍ର ଚହଲ ସ୍ପିନର ଭାବେ ଖେଳିବେ । ଦିନିକିଆ ସିରିଜ୍‌ର ୩ଟିଯାକ ମ୍ୟାଚ୍‌ରେ ବିସ୍ଫୋରକ ଇନିଂସ ଖେଳିଥିବା ହାର୍ଦିକ ପାଣ୍ଡ୍ୟାଙ୍କ ଫର୍ମ ଭାରତକୁ ଉତ୍ସାହିତ କରିଛି । ଅନ୍ୟପକ୍ଷରେ ଆଇସିିସି ମାନ୍ୟତାରେ ୨ନଂ ଦଳ ଅଷ୍ଟ୍ରେଲିଆ ଏକ ଭଲ ଟ୍ବେଣ୍ଟି୨୦ ଏକାଦଶ ଛିଡ଼ା କରିବାରେ ଅସୁବିଧା ଅନୁଭବ କରୁଛି ।