ସତ୍ୟଶିଖା(ଭୁବନେଶ୍ୱର) ୨୦.୧୨.୨୦୨୧: ୩ ଦିନ ହେଲା ରାଜ୍ୟରେ ପ୍ରବଳ ଜାଡ଼ ସହ କାଲୁଆ ପବନ ଜନଜୀବନକୁ ଅସ୍ତବ୍ୟସ୍ତ କରିଥିଲା। ରବିବାର ଦିନ ରାଜ୍ୟର ଅଧିକାଂଶ ସ୍ଥାନରେ ପାରଦ ୨ରୁ ୩ ଡିଗ୍ରି ପର୍ଯ୍ୟନ୍ତ ବଢ଼ିଛି। ଅନୁଗୁଳରେ ସର୍ବାଧିକ ୩ଡିଗ୍ରି ବୃଦ୍ଧି ଘଟିଥିବା ବେଳେ ଫୁଲବାଣୀରେ ୨.୫ ଡିଗ୍ରି, ପାରାଦୀପରେ ୨.୨ ଡିଗ୍ରି, ଭୁବନେଶ୍ବରରେ ୨.୧ ଡିଗ୍ରି ଓ କଟକରେ ୨.୦ ଡିଗ୍ରି ଲେଖାଏଁ ତାପମାତ୍ରା ବୃଦ୍ଧି ପାଇଛି। ଗତ ୩ ଦିନ ଅପେକ୍ଷା ଓଡ଼ିଶାର ବିଭିନ୍ନ ଜିଲ୍ଲାରେ ପାରଦସ୍ତର ଅପେକ୍ଷାକୃତ ବଢ଼ିଥିଲେ ବି ପ୍ରବଳ ଶୀତ ଜାରି ରହିଛି। ଦୁଇ ଦିନ ତଳେ (୧୭ ତାରିଖ) ଦାରିଙ୍ଗବାଡ଼ି ୬.୫ ଡିଗ୍ରି ସହ ଓଡ଼ିଶାର ସବୁଠୁ ଥଣ୍ଡା ସହର ଭାବେ ରେକର୍ଡ କରିଥିଲା। ଗତକାଲି ରାତିରେ ଏଠାକାର ତାପମାତ୍ରା ୨ ଡିଗ୍ରି ବଢ଼ି ୮.୫ରେ ପହଞ୍ଚିଛି। କିନ୍ତୁ ଏ ସ୍ଥିତି ବେଶି ଦିନ ରହିବ ନାହିଁ। ଆସନ୍ତା ୨ ଦିନରେ ରାଜ୍ୟର ତାପମାତ୍ରା ପୁଣି ୩ଡିଗ୍ରି ପର୍ଯ୍ୟନ୍ତ ହ୍ରାସ ପାଇବ ବୋଲି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପୂର୍ବାନୁମାନ କରିଛି।
