ସତ୍ୟଶିଖା(ନୂଆଦିଲ୍ଲୀ) ୨୧.୦୭.୨୦୨୧: କରୋନାରେ ଦେଶରେ କେତେ ଲୋକ ପ୍ରାଣ ହରାଇଛନ୍ତି ? ଏହାର ବାସ୍ତବ ତଥ୍ୟ ଏଯାବତ ବି ଜଣାପଡ଼ୁନାହିଁ । ସରକାରୀ ତଥ୍ୟରେ ଯେତିକି ମୃତକ ଦର୍ଶାଯାଉଛି ତାହାଠାରୁ ଢେ଼ରଗୁଣା ମୃତୁ୍ୟ ବରଣ କରିଥିବା ନେଇ ଅଭିଯୋଗ ବି ଆସୁଛି । ତେବେ ଭାରତରେ କରୋନା ମୃତୁ୍ୟ ବାସ୍ତବ ସଂଖ୍ୟାଠାରୁ ୧୦ ଗୁଣା ଅଧିକ ବୋଲି କୁହାଯାଉଛି ।
ସରକାରୀ ତଥ୍ୟ ଅନୁଯାୟୀ ଦେଶରେ ପ୍ରାୟ ୪,୧୫,୦୦୦ କରୋନା ମୃତୁ୍ୟ ହୋଇଛି । ଆମେରିକାର ଗବେଷଣା ସଂସ୍ଥା ‘ସେଂଟର ଫର ଗ୍ଲୋବାଲ ଡେଭେଲପମେଂଟ’ ରିପୋର୍ଟ ଅନୁଯାୟୀ ସ୍ୱାଧୀନତା ପରେ କରୋନା ଭାରତ ପାଇଁ ସବୁଠୁ ବଡ଼ ବିପତି । ମହାମାରୀ ଆରମ୍ଭରୁ ଚଳିତ ବର୍ଷ ଜୁନ ପର୍ଯ୍ୟନ୍ତ ପ୍ରାୟ ୩୪ ଲକ୍ଷରୁ ୪୭ ଲକ୍ଷ ଲୋକ କରୋନାରେ ପ୍ରାଣ ହରାଇଥିବା ଏହି ରିପୋର୍ଟରେ କୁହାଯାଇଛି । ୧୩୦ କୋଟି ଲୋକଙ୍କ ଦେଶ ଭାରତରେ କରୋନା ମୃତୁ୍ୟର ଯେଉଁ ବିଭୀଷିକା ଦେଖିବାକୁ ମିଳିଛି ତାହାକୁ ନେଇ ଅଧିକ ଅଧ୍ୟୟନ ପାଇଁ ମଧ୍ୟ ବିଶେଷଜ୍ଞମାନେ ଗୁରୁତ୍ୱାରୋପ କରିଛନ୍ତି । ଆମେରିକାରେ ସରକାରୀ ଭାବେ ମୃତୁ୍ୟ ସଂଖ୍ୟା ୬ ଲକ୍ଷ ୯ ହଜାର କୁହାଯାଇଥିବା ବେଳେ ବ୍ରାଜିଲରେ କରୋନା ମୃତୁ୍ୟ ୫ ଲକ୍ଷ ୪୨ ହଜାର ବୋଲି ଦର୍ଶାଯାଇଛି । ଏହି ପରିସଂଖ୍ୟାନ ଦୃଷ୍ଟିରୁ ଭାରତ ତୃତୀୟ ସ୍ଥାନରେ ଥିଲେ ମଧ୍ୟ ବାସ୍ତବ ସ୍ଥିତି ଭିନ୍ନ ବୋଲି ରିପୋର୍ଟରେ କୁହାଯାଇଛି ।
ନିକଟରେ ଭାରତରେ କିଛି ରାଜ୍ୟରେ ମଧ୍ୟ ହଜାର ହଜାର ପୁରୁଣା ମୃତୁ୍ୟ ନୂଆ ତଥ୍ୟରେ ଯୋଡ଼ାଯାଉଛି । ହାର୍ଭାର୍ଡ ବିଶ୍ୱବିଦ୍ୟାଳୟର ଜଣେ ବିଶେଷଜ୍ଞ କହିଛନ୍ତି ଯେ ପରିସଂଖ୍ୟାନକୁ ଆଧାର କରି ମୃତୁ୍ୟସଂଖ୍ୟା ଆକଳନ କରିବା ଏକ ଜଟିଳ ବ୍ୟାପାର । ଫ୍ରାନ୍ସର ବିକାଶ ଗବେଷଣା ଅନୁଷ୍ଠାନର ଜନସଂଖ୍ୟା ବିଶେଷଜ୍ଞ କ୍ରିଷ୍ଟୋପ ଗିଲମୋଟ ଆକଳନ କରିଛନ୍ତି ଯେ ଭାରତରେ ମେ’ ଶେଷ ସୁଦ୍ଧା ୨୨ ଲକ୍ଷ ଲୋକଙ୍କ ମୃତୁ୍ୟ ହୋଇଛି । ପ୍ରତି ୧୦ ଲକ୍ଷରେ ଭାରତର କରୋନା ମୃତୁ୍ୟ ବିଶ୍ୱ ହାରାହାରି ମୃତୁ୍ୟର ଅଧା ହେବ । ଭାରତରେ ଅଧିକାଂଶ ପରିବାର କରୋନା ଯୋଗୁଁ ପ୍ରଭାବିତ । ଭାରତରେ ପ୍ରତି ୭ ଜଣରେ ଜଣଙ୍କର କରୋନାରେ ମୃତୁ୍ୟ ହୋଇଛି ବୋଲି ଗିଲ ମୋଟଙ୍କ ଟିମ ଏକ ନିର୍ଯ୍ୟାସରେ ପହଞ୍ଚିଛି ।
