ଦେଶରେ ୨୪ ଘଂଟାରେ ୧୬ ହଜାର ୭୬୪ ନୂଆ ଆକ୍ରାନ୍ତ

ସତ୍ୟଶିଖା(ନୂଆଦିଲ୍ଲୀ) ୩୧.୧୨.୨୦୨୧:  ଦେଶରେ ୧୫ ହଜାର ଟପିଲା ଦୈନିକ ସଂକ୍ରମଣ । ଦିନକରେ ୧୬ ହଜାର ୭୬୪ ନୂଆ ଆକ୍ରାନ୍ତ ଚିହ୍ନଟ ହୋଇଛନ୍ତି । ଯାହାକି ଗତକାଲିର ମାମଲାଠାରୁ ୨୭ ପ୍ରତିଶତ ବୃଦ୍ଧି । କରୋନା ସଂକ୍ରମଣର ଏହି ବୃଦ୍ଧି ହାର ଅଧିକ ଚିନ୍ତା ବଢାଇ ଦେଲାଣି । ସୋମବାର ଠାରୁ ଦେଖିବାକୁ ଗଲେ ଦୈନିକ ସଂକ୍ରମଣ ହାର ୨.୬ ପ୍ରତିଶତ ବୃଦ୍ଧି ଘଟିଲାଣି । ଗତ ଅକ୍ଟୋବର ୨୦ ତାରିଖରେ ଦେଶରେ ୧୮ ହଜାରରୁ ଅଧିକ ମାମଲା ଆସିଥିଲା । ଏହାକୁ ଦେଖିବାକୁ ଗଲେ ବର୍ତମାନ ଡିସେମ୍ୱର ୩୧ ତାରିଖର ଦୈନିକ ସଂକ୍ରମଣ ସର୍ବାଧିକ । ମହାରାଷ୍ଟ୍ର ଓ ଦିଲ୍ଲୀରୁ ଅଧିକ ଆକ୍ରାନ୍ତ ଚିହ୍ନଟ ହେଉଛନ୍ତି । ମୁମ୍ବାଇ ଓ ଦିଲ୍ଲୀ ପୁଣି ଥରେ କରୋନାର ହଟସ୍ପଟ୍ ହୋଇଛି । ମୁମ୍ବାଇରେ ଗତ ୨୪ ଘଂଟା ମଧ୍ୟରେ ୩ ହଜାର ୬୭୧ ନୂଆ ମାମଲା ଆସିଥିବା ବେଳେ ଦିଲ୍ଲୀରେ ୮ ମାସ ପରେ ସବୁଠାରୁ ଅଧିକ ୧୩ ଶହ ୧୩ କେସ୍ ଆସିଛି । ସେହିପରି ଦେଶରେ ଓମିକ୍ରନ୍ ଆକ୍ରାନ୍ତଙ୍କ ସଂଖ୍ୟା ହଜାରେ ପାର କରିଛି । ମୋଟ୍ ଓମିକ୍ରନ୍ ସଂକ୍ରମିତଙ୍କ ସଂଖ୍ୟା ୧୨୭୦ରେ ପହଂଚିଛି । ମହାରାଷ୍ଟ୍ର ଓ ଦିଲ୍ଲୀରୁ ରେକର୍ଡ ସଂଖ୍ୟକ ସଂକ୍ରମିତ ଚିହ୍ନଟ ହୋଇଛନ୍ତି । ମହାରାଷ୍ଟ୍ରରେ ସର୍ବାଧିକ ୪୫୦ ଓ ଦିଲ୍ଲୀରେ ୩୨୦ ଜଣ କରୋନାର ଏହି ନୂଆ ଭ୍ୟାରିଆଂଟ କବଳରେ ଆସିସାରିଲେଣି । ସେହିପରି କେରଳରୁ ୧୦୯, ଗୁଜରାଟରୁ ୯୭, ରାଜସ୍ଥାନରୁ ୬୯ ଓ ତେଲେଙ୍ଗାନାରୁ ୬୨ ଜଣ ସଂକ୍ରମିତ ହୋଇ ସାରିଲେଣି । ଓଡ଼ିଶାରୁ ମୋଟ୍ ୧୪ ଜଣ ଓମିକ୍ରନ୍ରେ ସଂକ୍ରମିତ ହୋଇଛନ୍ତି ।