ସତ୍ୟଶିଖା( ଭୁବନେଶ୍ୱର )୩୧.୧୦.୨୦୨୨:
ଡାକ୍ତର ସମ୍ରାଟ କର
ସେ ଦିନ ସକାଳୁ ସକାଳୁ ସୁଦୂର ନୂଆଦିଲ୍ଲୀରୁ ବନ୍ଧୁ ଅବିନାଶଙ୍କ ଫୋନ ପାଇଲି । ସେ ତାଙ୍କ ସାନ ଭାଇ ସୁଜିତ କୁମାର ବିଷୟରେ କହୁଥାନ୍ତି । ସେ ଜଣେ ଭଲ ମେଧାବୀ ଛାତ୍ର, ପ୍ରତିଭାବାନ ଓ କୃତବିଦ୍ୟ ଛାତ୍ର ଭାବେ ବେଶ ପରିଚିତ । କିନ୍ତୁ ତା ଭିତରେ ଯେତେ ପ୍ରତିଭା ରହିଥିଲେ ମଧ୍ୟ ଆତ୍ମବିଶ୍ୱାସର ଢ଼ଙ୍ଗ ଦୃଢ଼ ହୋଇପାରୁନଥିବା କଥା ନେଇ ସେ ଟିକିଏ ଅନ୍ୟ ମାନଙ୍କ ପାଖରେ ସତସିଦ୍ଧ ପ୍ରମାଣ ହୋଇପାରୁନାହିଁ । ଏହି ଘଟଣା ତା ସହିତ ଆମ ସମସ୍ତଙ୍କ ପରିବାରର ଦୁଃଖ ମଧ୍ୟ ବଢ଼ି ଯାଉଛି । ମୁଁ ବନ୍ଧୁ ଅବିନାଶକୁ କହିଲି ତୁମେ ବ୍ୟସ୍ତ ହୁଅନାହିଁ, ସର୍ବପ୍ରଥମେ ଶୁଣ । ଆମେ ଜୀବନରେ ୪୦ ବର୍ଷ ପର୍ଯ୍ୟନ୍ତ ପହଂଚି ବହୁତ କିଛି ହାସଲ କରି ଦେଇଥାଉ । ତଥାପି ମଣିଷର ଆକାଂକ୍ଷା କେବେ ପୁରା ହୋଇନଥାଏ । ବରଂ ପରକୁ ପର ନୂଆ ସଫଳତା ପାଇବାକୁ ଚେଷ୍ଟା କରିଥାଉ । ଆମେ ଜାଣିଛୁ ଏହି ଦୁନିଆରେ ଉଚ୍ଚାଭିଳାଷୀଙ୍କୁ ସନ୍ତୁଷ୍ଟ କରିବା କଷ୍ଟକର କିନ୍ତୁ ସେମାନେ ମଧ୍ୟ ଗୋଟିଏ ସ୍ଥିତିରେ ପହଂଚିବା ପରେ ତାଙ୍କ ଭିତରେ ଥିବା ଉଚ୍ଚ ଅଭିଳାଷ କମିଯାଏ । ଜୀବନରେ ଟିକେ ସଫଳତା ମିଳିବା ପରେ ଆମେ ଟିକିଏ ଆତ୍ମବିଶ୍ୱାସୀ ହୋଇଥାଉ ଏବଂ ଏହା ଖରାପ ନୁହେଁ । ବରଂ ଏହା ଆମର ସାମର୍ଥ୍ୟର ଏକ ପ୍ରମାଣ ଯେ କୌଣସି ବି କାମ କରିବାକୁ ଆମ ଭିତରେ ଆତ୍ମବିଶ୍ୱାସ ଅଛି । ଆଉ ଏଥିରେ ସନ୍ଦେହ କରୁନାହୁଁ । କିନ୍ତୁ ଆମ ଭିତରୁ କିଛି ଲୋକ ଥାଆନ୍ତି ଯିଏ ପ୍ରତ୍ୟେକ ମୁହୂର୍ତରେ ନିଜକୁ ସନ୍ଦେହ କରିଥାନ୍ତି । ସେହି ବ୍ୟକ୍ତିଙ୍କ ପାଖରେ ଜୀବନରେ ସବୁକିଛି ଥାଏ ତଥାପି ସେ ନିଜର ଦକ୍ଷତା ଉପରେ ସନ୍ଦେହ କରିଥାନ୍ତି । ନିଜ ଉପରେ କେବେ ବି ବିଶ୍ୱାସ କରିପାରନ୍ତି ନାହିଁ । ସେମାନଙ୍କ ଭିତରେ ପ୍ରତିଭା ଯେତେ ଥାଉ ନା କାହିଁକି କିନ୍ତୁ ସେମାନେ ଆତ୍ମବିଶ୍ୱାସୀ ବୋଲି ମିଛ ଢ଼ଙ୍ଗ କରନ୍ତି । ଏପରି ବ୍ୟକ୍ତିମାନେ ଏକ ପ୍ରକାର ମାନସିକ ରୋଗରେ ପୀଡ଼ିତ ଥାଆନ୍ତି । ଯାହାକୁ କୁହାଯାଇଥାଏ ଇମ୍ପୋଷ୍ଟର ସିଣ୍ଡ୍ରୋମ । ଜୀବନରେ ସବୁକିଛି ପାଇ ମଧ୍ୟ ନିଜ ଉପରେ ବିଶ୍ୱାସ ନରଖିବା ହେଉଛି ଇମ୍ପୋଷ୍ଟର ସିଣ୍ଡ୍ରୋମ ।
ଏହି ମାନସିକ ରୋଗରେ ପୀଡ଼ିତ ବ୍ୟକ୍ତି ସବୁବେଳେ ନିଜ ଦକ୍ଷତା ଉପରେ ସନ୍ଦେହ କରିଥାଏ । ଏହି ମାନସିକ ରୋଗ ସେହି ଲୋକଙ୍କ ଠାରେ ଦେଖାଯାଏ, ଯେଉଁମାନେ ଜୀବନରେ ଅନେକ ସଫଳତା ହାସଲ କରିସାରିଥିବେ । ଏହା ସେହିମାନଙ୍କୁ ପ୍ରଭାବିତ କରେ ଯେଉଁମାନେ ସେମାନଙ୍କର ସଫଳତା ସ୍ୱୀକାର କରିବାକୁ ଚାହୁଁ ନଥିବେ । ସେମାନେ ନିଜକୁ ପ୍ରଶ୍ନ ପଚାରନ୍ତି ପ୍ରକୃତରେ ସେମାନେ ପ୍ରଶଂସା ପାଇବା ଯୋଗ୍ୟ କି ନାହିଁ, ସନ୍ଦେହ କରନ୍ତି । ଜଣେ ସାଧାରଣ ବ୍ୟକ୍ତି ଯଦି ଜୀବନରେ କିଛି ହାସଲ କରିଥାଏ ଲୋକମାନେ ତାଙ୍କର ପ୍ରଶଂସା କରନ୍ତି ଏବଂ ପ୍ରତିବଦଳରେ ଲୋକଟି ମନରେ ଆତ୍ମବିଶ୍ୱାସ ସୃଷ୍ଟି ହୁଏ, ଆଗକୁ ବଢ଼ିବାର ପ୍ରେରଣା ମିଳେ । କିନ୍ତୁ ଇମ୍ପୋଷ୍ଟର ସିଣ୍ଡ୍ରୋମ ରୋଗରେ ପୀଡ଼ିତ ବ୍ୟକ୍ତି ଭାବନ୍ତି ସେ ଏକ ପ୍ରକାର ଛଳନା କରୁଛନ୍ତି ଏବଂ ଏହାକୁ ସେ ତାଙ୍କ ଭାଗ୍ୟ ଯୋଗୁ ପାଇଛନ୍ତି । ଏମିତି ବ୍ୟକ୍ତି ପ୍ରତିଦିନ ଅନୁଭବ କରନ୍ତି, ସେ କିଛି ଜାଣି ନାହାନ୍ତି ଏବଂ ତାଙ୍କର ସତ ଦିନେ ନା ଦିନେ ସମସ୍ତଙ୍କ ଆଗକୁ ଆସିଯିବ । ଏହି ସିଣ୍ଡ୍ରୋମ ହେବାର ନିର୍ଦ୍ଦିଷ୍ଟ କୌଣସି କାରଣ ନାହିଁ । ବରଂ କିଛି ପରିସ୍ଥିତି ଏଥିପାଇଁ ଦାୟୀ ହୋଇଥାଏ ବୋଲି ମନସ୍ତତ୍ୱବିଦମାନେ କୁହନ୍ତି । ପ୍ୟାରେଂଟିିଙ୍ଗ ମଧ୍ୟ ଏଥିପାଇଁ ଦାୟୀ । ଯେମିତି ସ୍କୁଲରେ ଭଲ ମାର୍କ ଆଣିବା ପାଇଁ ପିଲା ଉପରେ ଅଧିକ ଚାପ ପକାଇବା, ଅନ୍ୟ ପିଲାଙ୍କ ସହିତ ତୁଳନା କରିବା, ନିୟନ୍ତ୍ରିତ ବା ଅଧିକ ପ୍ରୋଟେକ୍ଟିଭ ପରିବେଶ, ପିଲାବେଳେ ଲୋକଙ୍କ ଠାରୁ ବାରମ୍ବାର ନିଜ ବିଷୟରେ ଆଲୋଚନା ଶୁଣିବା ଏସବୁ ଇମ୍ପୋଷ୍ଟର ସିଣ୍ଡ୍ରୋମ ପାଇଁ ଦାୟୀ ହୋଇପାରେ । ଏ କ୍ଷେତ୍ରରେ ରୋଗୀକୁ ଆଦୌ ଅବହେଳା ନକରି ବା ମାନସିକ ରୋଗୀ କହି ବିରକ୍ତି କରାନ୍ତୁ ନାହିଁ । ମାନସିକ ରୋଗ ବିଶେଷଜ୍ଞଙ୍କ ପରାମର୍ଶ ନେଇ ଏକ ଭଲ ରୁଟିନ ଟିଏ ତିଆରି କରନ୍ତୁ । ତାଙ୍କୁ କେବଳ ଚିକିତ୍ସା ନୁହେଁ ଏହା ସହ ଡାକ୍ତରୀ ପରାମର୍ଶ ସହ ମନସ୍ତାତ୍ୱିକ ପ୍ରୋତ୍ସାହନ ଦିଅନ୍ତୁ ଏହା ହିଁ ତାଙ୍କ ପାଇଁ ବଡ଼ ମୂଲ୍ୟବାନ ଚିକିତ୍ସା ସାବ୍ୟସ୍ତ ହେବ ।
ମାନସିକ ରୋଗ ବିଶେଷଜ୍ଞ, ପୁରୀଘାଟ ରୋଡ, କଟକ
ମୋ : ୯୧୩୨୪୩୩୩୩୩
