ସତ୍ୟଶିଖା ( ବାଲେଶ୍ୱର ) : ଖଇରା ବ୍ଲକ ଅଧିନ କୁପାରୀ ସାଂସ୍କୃତିକ ପୀଠ ପୁଣ୍ୟଭୂମି ଭାବେ ଏକ ସ୍ଵତନ୍ତ୍ର ପରିଚୟ ସୃଷ୍ଟି କରିଛି। ଏହା ପର୍ଯ୍ୟଟନ କ୍ଷେତ୍ରର ମାନ୍ୟତା ମଧ୍ୟ ଲାଭ କରିଛି। କୁପାରୀ ପର୍ଯ୍ୟଟନ କ୍ଷେତ୍ରର ମାନ୍ୟତା ପାଇବାପରେ ତାର ଉନ୍ନତି ପାଇଁ ଯେତେ ମାତ୍ରାରେ ଧ୍ୟାନ ଦିଆଯାଉନାହିଁ, ତାଠାରୁ ଅଧିକ ମାତ୍ରାରେ ଏ ଅଞ୍ଚଳରୁ ମିଳୁଥିବା ମାଙ୍କଡ଼ା ପଥରକୁ ବିକ୍ରି କରି ଏହି ପୁଣ୍ୟଭୂମିକୁ ଶୂନ୍ୟ କରିବାରେ ଲାଗିଛନ୍ତି ଖଣିମାଫିଆ ମାନେ । ବାଉଁଶଗଢ଼ିଆ ପଞ୍ଚାୟତ ଅଧିନ କୁପାରୀ ଅଞ୍ଚଳରେ ରହିଥିବା ଖଣି ଗୁଡିକୁ ପୂର୍ବରୁ ଖଣିମାଫିଆମାନେ ଖନନ କରି ବିକ୍ରି କରିଆସୁଥିଲେ । କୁପାରୀ ପର୍ଯ୍ୟଟନ କ୍ଷେତ୍ରର ମାନ୍ୟତା ପାଇବା ପରେ ଏହାର ଉନ୍ନତି ପାଇଁ କୋୖଣସି ମାଙ୍କଡ଼ା ପଥର ଖଣି ନିଲାମ ଦିଆଯାଇନଥିଲା । ହେଲେ ଏହାକୁ ବେଖାତିରକରି ଖଣିମାଫିଆ ମାନେ ବେଆଇନି ଭାବେ ଏହି ଖଣି ଗୁଡିକୁ ଖନନ କରି ପ୍ରତ୍ୟେକ ଦିନ ଟନ ଟନ ପଥର ବିକ୍ରି କରୁଥିବାର ଦେଖିବାକୁ ମିଳିଛି । ମହାମାରୀ କରୋନା ପାଇଁ ପ୍ରଶାସନ ଲକଡାଉନ ଏବଂ ସଟଡାଉନ ନିୟମ କରିଥିଲେବି ଏହାକୁ ବେଖାତିର କରି ଖଣିମାଫିଆମାନେ ଦିନ ଦ୍ଵିପ୍ରହରରେ ମେସିନ ସହାର୍ଯ୍ୟରେ ବେଆଇନ ଭାବେ ଖଣି ଖନନ କରିଚାଲିଥିବା ବେଳେ ପ୍ରଶାସନିକ ଅଧିକାରୀ ମାନେ ଏଥିପ୍ରତି ଦୃଷ୍ଟି ଦେଉନଥିବା ସାଧାରଣରେ ଅଭିଯୋଗ ହେଉଛି । ଯାହାଫଳରେ ରାଜ୍ୟ ସରକାର କୋଟି କୋଟି ଟଙ୍କାର ରାଜସ୍ବ ହରାଉଥିବାବେଳେ ସେପଟେ ଖଣିମାଫିଆ ମାନେ ମାଲାମାଲ ହେଉଥିବାବେଳେ ଖଣି ଖନନ କରି ପଥର ଗୁଡିକୁ ବିକ୍ରି କରିସାରିବା ପରେ ସୃଷ୍ଟି ହେଉଥିବା ବୃହତ ଖାଲ ଗୁଡିକୁ ପୋତୁ ନଥିବାରୁ ଗୃହପାଳିତ ପ୍ରାଣୀ ଓ ବନ୍ୟଜନ୍ତୁମାନେ ଉକ୍ତ ଖାଲରେ ପଡ଼ି ପ୍ରାଣ ହରାଉଥିବା ଜଣାପଡିଛି । ଏହାଛଡା ବର୍ଷା ଦିନେ ଖଣିରେ ପାଣି ଭର୍ତ୍ତି ରହିବା କାରଣରୁ ସୃଷ୍ଟି ହେଉଥିବା କୁତ୍ରିମ ପୋଖରୀରେ ବହୁ ଜନସାଧାରଣ ମାନେ ପଡି ଅକାଳରେ ମୃତ୍ୟୁ ବରଣ କରୁଥିବାର ନଜିର ରହିଛି। ଏ ବିଷୟରେ ପ୍ରଶାସନ ପାଖରେ ବାରମ୍ବାର ଅଭିଯୋଗ ହୋଇ ଆସୁଥିଲେ ମଧ୍ୟ ପ୍ରଶାସନ ସବୁ ଜାଣି ନିରବଦ୍ରଷ୍ଟା ସାଜିବା ସାଧାରଣରେ ପ୍ରଶ୍ନବାଚୀ ସୃଷ୍ଟିକରିଛି । ଯଦି ପ୍ରଶାସନ କି ବିଭାଗୀୟ ଅଧିକାରୀ ଏଥି ପ୍ରତି ଦୃଷ୍ଟି ନ ଦିଅନ୍ତି ତାହେଲେ ପର୍ଯ୍ୟଟନ କ୍ଷେତ୍ରର ମାନ୍ୟତା ପାଇଥିବା ଏହି ପୁଣ୍ୟଭୂମି ଆଗାମୀ ଦିନରେ ଲୋପ ପାଇଯିବ ବୋଲି ବୁଦ୍ଧିଜୀବୀମାନେ ଆଲୋଚନା କରୁଛନ୍ତି ।
