ନୂଆଦିଲ୍ଲୀ: ଋଣ ଟଙ୍କା ନେଇ ଭାରତରୁ ଫେରାର ହୋଇଯାଇଥିବା ହୀରା ବ୍ୟବସାୟୀ ନୀରବ ମୋଦି ଓ ତାଙ୍କ ମାମୁ ମେହୁଲ ଚୋକ୍ସିଙ୍କୁ ଜୋରଦାର ଝଟକା ଲାଗିଛି। ସେମାନେ ହଂକଂରୁ ଦୁବାଇ ଚାଲାଣ କରିବାକୁ ଥିବା ପ୍ରାୟ ୨୩ଶହ କେଜିରୁ ଅଧିକ ପରିମାଣର ହୀରା, ମୋତି ଓ ଅଳଙ୍କାର ଏବେ ଭାରତ ଫେରିବ। ଏହି ସବୁ ସାମଗ୍ରୀର ମୂଲ୍ୟ ପ୍ରାୟ ୧୩୫୦ କୋଟି ହେବ ବୋଲି ଜଣାପଡ଼ିଛି।
ସେମାନେ ୨୦୧୮ ମସିହାରୁ ଏହି ସବୁ ସାମଗ୍ରୀକୁ ହଂକଂରୁ ଦୁବାଇ ପଠାଇବାକୁ ଯୋଜନା କରିଥିଲେ ହେଁ ପ୍ରବର୍ତ୍ତନ ନିର୍ଦ୍ଦେଶାଳୟ ଏହା ଉପରେ ରୋକ ଲଗାଇବାକୁ ସକ୍ଷମ ହୋଇଥିଲା। ଶେଷରେ ଏଗୁଡ଼ିକ ହଂକଂରୁ ସିଧା ଭାରତ ଆସିବ ବୋଲି ଜଣାପଡ଼ିଛି।
ଆହୁରି ପଢ଼ନ୍ତୁ
୧୦୮ଟି ପ୍ୟାକେଟରେ ଥିବା ଏହି ଅଳଙ୍କାରଗୁଡ଼ିକ ନୀରବ ମୋଦି ଓ ଚୋକ୍ସିଙ୍କ ନିୟନ୍ତ୍ରଣରେ ଥିବା କମ୍ପାନୀ ନାଁରେ ବୁକିଂ ହୋଇଥିଲା। ଜଣେ ତଦନ୍ତକାରୀ ଅଧିକାରୀ କହିଛନ୍ତି, ହୀରା, ମୋତି ଓ ରୂପାର ଅଳଙ୍କାର ଏହି ୧୦୮ଟି ପ୍ୟାକେଟ ମଧ୍ୟରେ ରହିଛି। ଏହାର ଓଜନ ୨୩୪୦ କେଜି ହୋଇଥିବା ବେଳେ ଏଗୁଡ଼ିକର ମୂଲ୍ୟ ପ୍ରାୟ ୧୩୫୦ କୋଟି ହେବ।
ଦୀର୍ଘ ଦୁଇ ବର୍ଷ ହେଲାଣି ଭାରତ ସରକାର ହଂକଂକୁ ସିଧାସଳଖ ଏଗୁଡ଼ିକୁ ମୁମ୍ବାଇ ପଠାଇବା ପାଇଁ ଅନୁରୋଧ କରି ଚାଲିଥିଲେ। ଏଗୁଡ଼ିକୁ ମୁମ୍ବାଇ ଆସିଲେ, ବିଧିବଦ୍ଧ ଭାବେ ପଞ୍ଜାବ ନ୍ୟାଶନାଲ ବ୍ୟାଙ୍କ ଦୁର୍ନୀତିରେ ଏହାକୁ ସିଜ୍ କରାଯିବ। ୧୦୮ଟି ପ୍ୟାକେଟ ମଧ୍ୟରୁ ୩୨ଟି ନୀରବ ମୋଦିଙ୍କର ହୋଇଥିବା ବେଳେ ୭୬ଟି ଚୋକ୍ସିଙ୍କ ନାଁରେ ରହିଛି।
ପିଏନବିରୁ ପ୍ରାୟ ୧୪ ହଜାର କୋଟିର ଋଣ ନେଇ ନୀରବ ମୋଦି ଓ ଚୋକ୍ସି ବିଦେଶକୁ ଫେରାର ହୋଇଯାଇଛନ୍ତି।
