ସାମାନ୍ୟ ବଚସାରୁ ସ୍ତ୍ରୀକୁ ପୋଡି ମାରିଦେଲା ସ୍ୱାମୀ

ସତ୍ୟଶିଖା (କୁଚିଣ୍ଡା) ୩୦.୦୩.୨୦୨୨: ରାଜ୍ୟର ଅନେକ ସ୍ଥାନରେ ସ୍ତ୍ରୀକୁ ସ୍ୱୀମୀର ଅତ୍ୟାଚାର ଦିଆଯାଉଥିବା ଘଟଣା ଦିନକୁ ଦିନ ବଢ଼ିବାରେ ଲାଗିଛି । ସାତ ଜନମର ସାଥୀ ହେବା ପାଇଁ ହାତ ଧରିଥିଲେ। ହେଲେ ଗୋଟିଏ ଜନମରେ ଶେଷ ହୋଇଗଲା ଜୀବନ। ସାମାନ୍ୟ କଥାକୁ ନେଇ ହେଲା ସ୍ୱାମୀ ଓ ସ୍ତ୍ରୀଙ୍କ ମଧ୍ୟରେ କଳହ। ଆଉ ତା’ପରେ ସାତ ଜନମର ସାଥୀକୁ ଘରେ ପୁରାଇ କିରୋସିନ ଢାଳି ପୋଡ଼ିଦେଲା ମଦ୍ୟପ ସ୍ୱାମୀ। ଏଭଳି ଅଭାବନୀୟ ଘଟଣା ଘଟିଛି ସମ୍ବଲପୁର ଜିଲ୍ଲା ମହୁଲପାଲି ଥାନା ଅନ୍ତର୍ଗତ ଖଟାଟାଙ୍ଗର ଗାଁରେ। ମୃତ ମହିଳା ଜଣଙ୍କ ହେଲେ ଲିଲିମା ରଣା। ପୁଲିସ ସ୍ୱାମୀ ରଘୁରାଜ ରଣାଙ୍କୁ ଅଟକ ରଖି ପଚରାଉଚରା କରୁଛି।

ଅଭିଯୋଗ ଅନୁସାରେ, ଗତକାଲି ସକାଳେ ରଘୁରାଜ ମଦ ପିଇ ଆସି ଲିଲିମାଙ୍କୁ ମାରଧର କରିଥିଲେ। ଲିଲିମା ରାଗି ଯାଇ ବାପ ଘରକୁ ପଳାଇ ଯାଇଥିଲେ। ପରେ ବାପା ଝିଅକୁ ବୁଝାଇସୁଝାଇ ଆଣି ସ୍ୱାମୀ ପାଖରେ ଛାଡ଼ି ଦେଇ ଯାଇଥିଲେ। ରାତି ବେଳକୁ ପୁଣି ରଘୁରାଜ ମଦ ପିଇ ଆସି ସ୍ତ୍ରୀଙ୍କ ସହ ଝଗଡ଼ା କରିଥିଲେ। ପରେ ଏକ ଘର ଭିତରେ ପୁରାଇ ଲିଲିମାଙ୍କ ଉପରେ କରୋସିନ ଢ଼ାଳି ନିଆଁ ଲଗାଇ ଦେଇଥିଲେ। ପଡ଼ୋଶୀ ଲୋକେ ଚିତ୍କାର ଶୁଣି ଲିଲିମାଙ୍କୁ ଉଦ୍ଧାର କରି ଡାକ୍ତରଖାନାରେ ଭର୍ତ୍ତି କରିଥିଲେ। ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ଲିଲିମାଙ୍କୁ ରଘୁରାଜ ପୋଡ଼ି ମାରି ଦେଇଥିବା ତାଙ୍କ ଭାଇ ଥାନାରେ ଅଭିଯୋଗ କରିଛନ୍ତି। ପୁଲିସ  ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ଓ ଘଟଣାର ତଦନ୍ତ କରୁଛି।