ସତ୍ୟଶିଖା : ୦୫/୦୪/୨୦୨୫:
ଶନିବାର ପବିତ୍ର ଅଶୋକାଷ୍ଟମୀ। ଗଡ଼ିବ ମହାପ୍ରଭୁ ଶ୍ରୀଲିଙ୍ଗରାଜଙ୍କ ରୁକୁଣା ରଥ । ରାମେଶ୍ୱର ଅଭିମୁଖେ ଯାତ୍ରାରମ୍ଭ କରିବ ରଥ। ରଥଗଡ଼ାରୁ ଘରଘର ନାଦ କରି ବାହାରିବ ପ୍ରଭୁଙ୍କ ରଥ । ଏହି ପଞ୍ଚ ଦିବସୀୟ ଯାତ୍ରାରେ ଏକାମ୍ରର ଆରାଧ୍ୟ ଶ୍ରୀଲିଙ୍ଗରାଜ, ଦୋଳଗୋବିନ୍ଦ ଏବଂ ଭଉଣୀ ରୁକ୍ମିଣୀ ରାମେଶ୍ୱରଙ୍କ ପୀଠକୁ ଯିବେ। ସେଠାରେ ୪ ଦିନ ଅବସ୍ଥାନ କରି ୯ ତାରିଖରେ ବାହୁଡ଼ା ଯାତ୍ରା କରିବେ।
ଶୁକ୍ରବାର ରାତିରେ ବ୍ରାହ୍ମଣମାନଙ୍କ ଦ୍ୱାରା ରଥ ପ୍ରତିଷ୍ଠା କରାଯାଇଛି । ଠାକୁରଙ୍କ ଏହି ପ୍ରସିଦ୍ଧ ଯାତ୍ରାକୁ ଶୃଙ୍ଖଳିତ କରିବା ଦିଗରେ ପ୍ରଶାସନ ତରଫରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି। ରଥଯାତ୍ରାର ସୁରକ୍ଷା ପାଇଁ ଡିସିପିଙ୍କ ନେତୃତ୍ୱରେ ୧୩ ପ୍ଳାଟୁନ ଫୋର୍ସ ମୁତୟନ ରହିବେ । ଏହାବ୍ୟତୀତ ରାସ୍ତାରେ ପାଣି ସିଞ୍ଚନ କରିବ ଅଗ୍ନିଶମ ବିଭାଗ। ବିଏମ୍ସି ତରଫରୁ ଆଲୋକୀକରଣ, ସଫେଇ ଓ ପିଇବା ପାଣିର ବ୍ୟବସ୍ଥା କରାଯାଇଛି। ସେହିପରି ଗମନାଗମନ ପାଇଁ କ୍ରୁଟ୍ ପକ୍ଷରୁ ଅଧିକ ମୋ ବସର ବ୍ୟବସ୍ଥା କରାଯାଇଛି ।
ରଥଯାତ୍ରା ପାଇଁ ନିର୍ଦ୍ଧାରିତ ନୀତି ଅନୁଯାୟୀ, ଭୋର ୫ଟାରେ ମନ୍ଦିର ପହୁଡ଼ ଖୋଲି ମଙ୍ଗଳ ଆଳତି ଓ ଅବକାଶ ନୀତି ସମାପନ ହେବ। ଦିନ ସାଢେ ୧୨ଟାରୁ ସାଢେ ଗୋଟାଏ ମଧ୍ୟରେ ଦେବଦେବୀଙ୍କୁ ପହଣ୍ଡି କରାଯାଇ ରଥ ଉପରକୁ ବିଜେ କରାଯିବ । ରଥ ଉପରେ ଏବଂ ତଳେ ୧୪ ପ୍ରକାରର ପୂଜା ବଢ଼ିବା ପରେ ଅଶ୍ୱ ଯୋଚା ଯିବ। ଆଜ୍ଞାମାଳ ପାଇଲା ପରେ ରଥ ଗଡ଼ିବ ।
ରଥ ଟଣା ଯିବା ସମୟରେ କର୍ଡନ ଭିତରେ କେବଳ ଖଉଡ଼ା(ରଥରେ ବ୍ରେକ୍ ଲଗାଉ ଥିବା ସେବାୟତ) ଓ ମହାରଣା ସେବାୟତମାନେ ରହିପାରିବେ। ଏଥର ମଧ୍ୟ ରଥ ଟଣା ଅପରାହ୍ନ ଠିକ ସାଢେ ୩ଟାରେ ଆରମ୍ଭ ହେବ ବୋଲି ଚୂଡ଼ାନ୍ତ ହୋଇଛି। ରଥ ଗଡ଼ିବା ବାଟରେ ଗୋପାଳ ତୀର୍ଥ, ଶିବତୀର୍ଥ, ଭାରତୀ ମଠ ଓ ଅସୁର କିଆରୀଠାରେ ଦେବଦେବୀଙ୍କୁ ଭୋଗ ଲାଗି ହେବ। ରାମେଶ୍ୱର ପହଞ୍ଚିବା ପରେ ସେଠାରେ ପ୍ରଥମେ ଅଶୋକା କୁଣ୍ଡରେ ମହାପ୍ରଭୁ ସ୍ନାନ କରିବେ । ପରେ ୧୪ଟି ଅଶୋକା କଢି ମଧ୍ୟ ଲାଗି ହେବେ । ରାମେଶ୍ୱରଙ୍କ ସହ ଭେଟ ଆଳତି କରାଯାଇ ସେଠାରେ ଆସ୍ଥାନକୁ ବିଜେ କରିବେ।
