ସତ୍ୟଶିଖା(ଭୁବନେଶ୍ୱର) ୨୭.୦୭.୨୦୨୧: ପାରଳାଖେମୁଣ୍ଡି ଏସିଏଫଓ ସୌମ୍ୟରଞ୍ଜନ ମହାପାତ୍ରଙ୍କ ମୃତୁ୍ୟ ଏବେ ରହସ୍ୟଘେରରେ ରହିଛି । ଏହି ମାମଲା ଦିନକୁ ଦିନ ଅଡ଼ୁଆ ସୂତା ଭଳି ଛନ୍ଦି ହୋଇଯାଉଛି । ମୃତୁ୍ୟ ପଛର ପ୍ରକୃତ କାରଣ ଖୋଜିବାକୁ ପୁଲିସ ତଦନ୍ତକୁ ଜୋରଦାର କରିଛି । ତେବେ ଏହା ଭିତରେ ସୌମ୍ୟଙ୍କ ଶବ ବ୍ୟବଚ୍ଛେଦ ରିପୋର୍ଟ ଆସିଛି । ସୌମ୍ୟଙ୍କ ପରିବାରକୁ ଉକ୍ତ ରିପୋର୍ଟ ଦିଆଯାଇଛି । ସୌମ୍ୟଙ୍କ ପରିବାର ଲୋକ କଟକ ମର୍କତନଗର ଥାନାରୁ ଶବ ବ୍ୟବଚ୍ଛେଦ ରିପୋର୍ଟ ନେଇଥିବା ଜଣାଯାଇଛି । ୯୫ ପ୍ରତିଶତ ପୋଡ଼ି ଯାଇଥିବାରୁ ସୌମ୍ୟଙ୍କ ମୃତୁ୍ୟ ହୋଇଥିବା ରିପୋର୍ଟରେ ଉଲ୍ଲେଖ କରାଯାଇଛି । ପାକସ୍ଥଳୀ ଖାଲି ଥିବା ଓ ସେଥିରୁ କୌଣସି ଦୁର୍ଗନ୍ଧ ନଥିବା ରିପୋର୍ଟରେ ଉଲ୍ଲେଖ କରାଯାଇଛି । ପୋଷ୍ଟମର୍ଟମର ୬ ଘଣ୍ଟା ପୂର୍ବରୁ ସୌମ୍ୟଙ୍କ ମୃତୁ୍ୟ ହୋଇଥିବା ରିପୋର୍ଟରେ ଉଲ୍ଲେଖ ରହିଥିବା ଜଣାଯାଇଛି ।
ଅନ୍ୟପକ୍ଷରେ ସୌମ୍ୟଙ୍କ ପରିବାର ଲୋକ ସୌମ୍ୟଙ୍କ ପତ୍ନୀ ବିଦ୍ୟାଭାରତୀଙ୍କୁ ଗିରଫ କରାଯିବାକୁ ଦାବି କରିଛନ୍ତି । ମୁଖ୍ୟ ଆସାମୀ ବୋହୂ, ତାଙ୍କୁ ଗିରଫ କାହିଁକି କରାଯାଉନାହିଁ ବୋଲି ସୌମ୍ୟଙ୍କ ବାପା କହିଛନ୍ତି । ଏହା ଭିତରେ କିଛି ଚକ୍ରାନ୍ତ ଚାଲିଛି, ବୋହୂକୁ ଗିରଫ କଲେ ସତ ବାହାରିବ ବୋଲି ସୌମ୍ୟଙ୍କ ବାପା କହିଛନ୍ତି । ସେହିପରି ବିଦ୍ୟାଭାରତୀ ଓ ତାଙ୍କ ବାପା ମାଆ ସବୁ ଜାଣିଛନ୍ତି ବୋଲି ସୌମ୍ୟଙ୍କ ମାଆ କହିଛନ୍ତି । ଅକ୍ଷୟ ନାମ ବ୍ୟକ୍ତିଙ୍କ ନାଁ ନେଇ ସୌମ୍ୟଙ୍କ ଭାଇ ବି ଅଭିଯୋଗ ଆଣିଛନ୍ତି । ଅକ୍ଷୟଙ୍କ ସହ ବିଦ୍ୟାଭାରତୀଙ୍କ ସମ୍ପର୍କର ତଦନ୍ତ ହେଉ ବୋଲି ସୌମ୍ରଙ୍କ ଭାଇ ଦାବି କରିଛନ୍ତି ।
