ହିମନ୍ତ ବିଶ୍ୱଶର୍ମା ହେବେ ଆସାମର ନୂଆ ମୁଖ୍ୟମନ୍ତ୍ରୀ

ସତ୍ୟଶିଖା(ଗୌହାଟୀ) ୧୦.୦୫.୨୦୨୧: ହିମନ୍ତ ବିଶ୍ୱଶର୍ମା ଆସାମର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେବେ। ବିଜେପି ବିଧାୟକ ଦଳ ବୈଠକରେ ଆଜି ତାଙ୍କୁ ନେତା ଭାବେ ଚୟନ କରାଯାଇଛି।

ହିମନ୍ତ ବିଶ୍ୱଶର୍ମା ଜଣେ ହାଇକୋର୍ଟ ଓକିଲରୁ ଏବେ ମୁଖ୍ୟମନ୍ତ୍ରୀ ଆସନରେ ବସିବେ। ଆସାମର ଜାଲୁକବରୀ ବିଧାନସଭା ଆସନରୁ ସେ କ୍ରମାଗତ ପଞ୍ଚମ ଥର ଜିତିବାରେ ସଫଳ ହୋଇଛନ୍ତି। ବିଧାନସଭା ନିର୍ବାଚନରେ ​​କଂଗ୍ରେସର ରୋମେନ ଚନ୍ଦ୍ର ବୋରଠାକୁରଙ୍କୁ ୧,୦୧,୯୧୧ ଖଣ୍ଡ ଭୋଟ ବ୍ୟବଧାନରେ ପରାସ୍ତ କରିଥିଲେ। ୨୦୧୫ରେ ହିମନ୍ତ ବିଜେପିରେ ଯୋଗ ଦେଇଥିଲେ। ୨୦୧୬ ବିଧାନସଭା ନିର୍ବାଚନ ଓ ୨୦୧୯ ଲୋକସଭା ନିର୍ବାଚନରେ ​ତାଙ୍କର ଭୂମିକା ଥିଲା ଗୁରୁତ୍ୱପୂର୍ଣ୍ଣ।

ଏଥର ବିଧାନସଭା ନିର୍ବାଚନ ପୂର୍ବରୁ ଯେତେବେଳେ ରାଜ୍ୟରେ ସିଏଏ ବିରୋଧରେ ବିକ୍ଷୋଭ ପ୍ରଦର୍ଶନ କରାଯାଉଥିଲା ହିମନ୍ତ ଜୋରଦାର ପ୍ରଚାର କରି ଭୋଟରଙ୍କ ସହ କଥା ହୋଇଥିଲେ। ହିମନ୍ତ ବିଶ୍ୱଶର୍ମା ୧ ଫେବୃଆରୀ ୧୯୬୯ ରେ ଗୁଆହାଟୀରେ ଜନ୍ମଗ୍ରହଣ କରିଥିଲେ। କଟନ କଲେଜ ଗୁଆହାଟୀରୁ ତାଙ୍କର ପ୍ରାଥମିକ ଶିକ୍ଷା କରିଥିଲେ। ରାଜନୀତି ବିଜ୍ଞାନରେ ପିଜି କରିବା ପରେ ୧୯୯୧-୯୨ ମସିହାରେ କଟନ କଲେଜ ଗୁଆହାଟିର ସାଧାରଣ ସମ୍ପାଦକ ହୋଇଥିଲେ।

ପରେ ସରକାରୀ ଆଇନ ମହାବିଦ୍ୟାଳୟରୁ ଏଲଏଲବି ଓ ଗୁଆହାଟି କଲେଜରୁ ପିଏଚଡି ଡିଗ୍ରୀ ହାସଲ କରିଥିଲେ। ଆଇନ ଡିଗ୍ରୀ ହାସଲ କରିବା ପରେ ହିମନ୍ତ ଗୁଆହାଟି ହାଇକୋର୍ଟରେ ୫ ବର୍ଷ ଯାଏଁ ଓକିଲାତି କରିଥିଲେ। ମେ ୨୦୦୧ରେ ପ୍ରଥମ ଥର ପାଇଁ ଜାଲୁକବରୀ ଆସନ ଜିତିଥିଲେ। ଏହା ପରେ ସେ ଆସାମର ପୂର୍ବ ସରକାରରେ ଅର୍ଥ, କୃଷି ଓ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ଭଳି ଗୁରୁତ୍ୱପୂର୍ଣ୍ଣ ବିଭାଗର ମନ୍ତ୍ରୀ ଥିଲେ। ତତ୍କାଳୀନ ମୁଖ୍ୟମନ୍ତ୍ରୀ ତରୁଣ ଗୋଗୋଇଙ୍କ ସହ ବିବାଦ ପରେ ସେ ଜୁଲାଇ ୨୦୧୪ ରେ କଂଗ୍ରେସରୁ ଇସ୍ତଫା ଦେଇଥିଲେ।