ନ୍ୟୁଜ୍ରାଜ୍ୟ

ଦିଲ୍ଲୀ ଲାଲକିଲ୍ଲା ହିଂସା ଘଟଣାର ମୁଖ୍ୟ ଅଭିଯୁକ୍ତ ଦୀପ ସିଦ୍ଧୁ ଗିରଫ

ସତ୍ୟଶିଖା ୦୯/୦୨/୨୦୨୧ : ଦିଲ୍ଲୀ ପୁଲିସର ସ୍ପେଶାଲ ସେଲ ଦୀପ ସିଦ୍ଧୁଙ୍କୁ ଗିରଫ କରିଛି । ଗତ ଜାନୁଆରୀ ୨୬ରେ ଟ୍ରାକ୍ଟର ରାଲି ଆଳରେ ଦିଲ୍ଲୀ ଲାଲକିଲ୍ଲାରେ ସଂଗଠିତ ହିଂସା ଘଟଣାରେ ସିଦ୍ଧୁ ମୁଖ୍ୟ ସୂତ୍ରଧର ବୋଲି କୁହାଯାଉଛି । ପ୍ରାୟ ୧୫ ଦିନ ହେବ ଫେରାର ଥିବା ଦୀପ ସିଦ୍ଧୁକୁ ସ୍ୱତନ୍ତ୍ର ସେଲ୍ ଟିମ୍ ପଞ୍ଜାବର ଜିରାକପୁର ନାମକ ଏକ ଅଞ୍ଚଳରୁ ଗିରଫ କରିଛି । ତାକୁ ଧରାଇ ଦେବା ପାଇଁ ପୁଲିସ ଏକ ଲକ୍ଷ ଟଙ୍କା ପୁରସ୍କାର ଘୋଷଣା କରିଥିଲା । ଆଜି ଦୀପ ସିଦ୍ଧୁକୁ କୋର୍ଟରେ ହାଜର କରାଯିବ ବୋଲି ସୂଚନା ମିଳିଛି ।

ପୁଲିସର କବଳରୁ ଦୂରରେ ଥିବାବେଳେ ସିଦ୍ଧୁ ସାମାଜିକ ଗଣମାଧ୍ୟମରେ ଲଗାତାର ଭିଡିଓ ବାର୍ତ୍ତା ଦେଉଥିଲା । ଏକଥା ମଧ୍ୟ ଦାବି କରାଯାଇଛି ଯେ ପଞ୍ଜାବୀ ଅଭିନେତା ସିଦ୍ଧୁ ଅପଲୋଡ୍ କରିଥିବା ଭିଡିଓ ପଛରେ ତାଙ୍କର ଜଣେ ଅତି ଘନିଷ୍ଠ ମହିଳା ବନ୍ଧୁ ଅଛନ୍ତି ଯିଏ କାଲିଫର୍ଣ୍ଣିଆରେ ରହନ୍ତି । ପୁଲିସର ସୂଚନାନୁସାରେ, ସିଦ୍ଧୁ ଭିଡିଓ ତିଆରି କରୁଥିଲେ ଓ ନିଜ ମହିଳା ବନ୍ଧୁ ଏବଂ ଅଭିନେତ୍ରୀମାନଙ୍କ ଦ୍ୱାରା ବିଭିନ୍ନ ସୋସିଆଲ ମିଡିଆ ପ୍ଲାଟଫର୍ମରେ ଅପଲୋଡ୍ କରୁଥିଲେ ।

ନିକଟରେ ସେ ଏକ ଭିଡିଓ ଜାରି କରି କହିଛନ୍ତି ଯେ ସେ କିଛି ଭୁଲ କରିନାହାଁନ୍ତି । ତେଣୁ ସେ କୌଣସି କାହାକୁ ଭୟ କରନ୍ତି ନାହିଁ । ସେ ଏହି ମାମଲା ସହ ଜଡିତ ପ୍ରମାଣ ସଂଗ୍ରହ କରୁଛନ୍ତି ଏବଂ ଦୁଇ ଦିନ ପରେ ପୁଲିସ ନିକଟରେ ହାଜର ହେବେ । ତାଙ୍କ ପରିବାରକୁ ହଇରାଣ ନକରିବାକୁ ସେ ଅନୁସନ୍ଧାନକାରୀ ସଂସ୍ଥାକୁ ଭିଡିଓ ବାର୍ତ୍ତା ମାଧ୍ୟମରେ କହିଥିଲେ ।ଦୀପ ସିଦ୍ଧୁ ଜଣେ ପଞ୍ଜାବୀ ଅଭିନେତା । ସିଦ୍ଧୁ ପଞ୍ଜାବର ମୁକସର ଜିଲ୍ଲାରେ ୧୯୮୪ ମସିହାରେ ଜନ୍ମଗ୍ରହଣ କରିଥିଲେ ଏବଂ ପରେ ସେ ଆଇନ ଅଧ୍ୟୟନ କରିଥିଲେ । ଦୀପ କିଙ୍ଗଫିସର ମଡେଲ ହଣ୍ଟର ବିଜେତା ହୋଇଛନ୍ତି ଏବଂ ମିଷ୍ଟର ଇଣ୍ଡିଆ ପ୍ରତିଯୋଗିତାରେ ଆଖ୍ୟା ଅର୍ଜନ କରିଛନ୍ତି । କ୍ୟାରିଅର ପ୍ରାରମ୍ଭରେ ସେ ମଡେଲିଂ ଜଗତରେ ପ୍ରବେଶ କରିଥିଲେ କିନ୍ତୁ ସଫଳ ହୋଇପାରିନଥିଲେ । କିଙ୍ଗଫିସର ମଡେଲ ହଣ୍ଟ ପୁରସ୍କାର ଜିତିବାର କିଛି ଦିନ ପୂର୍ବରୁ ସେ ବାରର ସଦସ୍ୟ ମଧ୍ୟ ଥିଲେ । ୨୦୧୫ରେ ଦୀପ ସିଦ୍ଧୁଙ୍କ ପ୍ରଥମ ପଞ୍ଜାବୀ ଚଳଚ୍ଚିତ୍ର ‘ରମତା ଯୋଗୀ’ ମୁକ୍ତିଲାଭ କରିଥିଲା । ୨୦୧୮ର ଚଳଚ୍ଚିତ୍ର ‘ଜୋରା ଦାସ ନମ୍ବରିଆ’ରେ ଗ୍ୟାଙ୍ଗଷ୍ଟର ଭୂମିକାରେ ସେ ଅଭିନୟ କରି ଲୋକପ୍ରିୟ ହୋଇଥିଲେ ।

ଲଗାତାର ଦୁଇ ମାସ ଧରି ଦୀପ ସିଦ୍ଧୁ କୃଷକ ଆନ୍ଦୋଳନରେ ସକ୍ରିୟ ଥିଲେ । କିଛି ଦିନ ପୂର୍ବେ ଶିଖ୍ ଫର ଜଷ୍ଟିସ୍ ସହିତ ତାଙ୍କର ସମ୍ପର୍କ ନେଇ ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) ପକ୍ଷରୁ ଏକ ବିଜ୍ଞପ୍ତି ଜାରି କରାଯାଇଥିଲା । ଗତ ବର୍ଷ ଆନ୍ଦୋଳନ ସମୟରେ କୃଷକ ସଂଘର ନେତୃତ୍ୱ ଉପରେ ଦୀପ ପ୍ରଶ୍ନ କରିଥିଲେ । ସେହି ସମୟ ମଧ୍ୟରେ ସେ ଶମ୍ଭୁ ମୋର୍ଚ୍ଚା ନାମରେ ଏକ ନୂତନ କୃଷକ ସଙ୍ଗଠନ ଘୋଷଣା କରିଥିଲେ ।

Show More
Back to top button