ସତ୍ୟଶିଖା (ଜୟପୁର) ୨୧/୧୧/୨୦୨୦ : କୋରାପୁଟ ସୀମାନ୍ତ ସମ୍ବାଇ ପଞ୍ଚାୟତର ସୁନାବେଡା ଗାଁର ବିବାଦୀୟ ସ୍ଥାନକୁ ଯାଇ ସ୍ଥିତି ପରଖିବେ ଦକ୍ଷିଣାଞ୍ଚଳ ଆରଡିସି ଟି. ଅପାଙ୍ଗ ଆଓ । ତାଙ୍କ ସହ ଜିଲ୍ଲା ପ୍ରଶାସନର ଏକ ଟିମ୍ ସହ ପଟ୍ଟାଙ୍ଗୀ ତହସିଲଦାର, ଆରଆଇ ଓ ରେଭେନ୍ୟୁ ସୁପରଭାଇଜର ମଧ୍ୟ ଘଟଣାସ୍ଥଳକୁ ଯିବେ । ଲଗାତାର ଏହି ଖବର ନ୍ୟୁଜ ୭ରେ ପ୍ରସାରଣ ପରେ ଘଟଣାସ୍ଥଳରେ ପହଞ୍ଚି ଉଭୟ ରାଜ୍ୟର ଅଧିକାରୀମାନେ ରାସ୍ତା ଅବରୋଧ ହଟାଇବା ସହ ଆପୋଷ ଆଲୋଚନା ମାଧ୍ୟମରେ ଏହି ସମସ୍ୟାର ସମାଧାନ କରିବାକୁ ରାଜି ହୋଇଛନ୍ତି । ଏପରିକି ଓଡିଶା ପଟରୁ ୫ଜଣିଆ ଟିମ୍ ଯାଇ ଓଡିଶା ସୀମାରେ ଥିବା ଖୁଣ୍ଟ ମଧ୍ୟ ଚିହ୍ନଟ କରିଛନ୍ତି । ତେବେ ଆରଡିସିଙ୍କ ଗସ୍ତ ପୂର୍ବରୁ ପୁଣିଥରେ ସୀମାନ୍ତ ଆନ୍ଧ୍ରର ଲୋକ ଆରମ୍ଭ କରିଛନ୍ତି ଦାଦାଗିରି । ସୀମାବର୍ତ୍ତି ଅଞ୍ଚଳରେ ରାସ୍ତା କଡରେ ପଥର ରଖି ଅସ୍ଥାୟୀ ସୀମା ଚିହ୍ନଟ କରିବା ସହ ପତାକା ମାରି ପୁଣିଥରେ ଓଡିଶାକୁ ଦେଇଛନ୍ତି ଖୋଲା ଚ୍ୟାଲେଞ୍ଜ । ଏପରିକି ରାସ୍ତାରେ ବର୍ଡର ମଧ୍ୟ ଲେଖିଛନ୍ତି ।
