ସତ୍ୟଶିଖା (ନୂଆଦିଲ୍ଲୀ) ୩୦/୦୧/୨୦୨୧ : ରାଜଧାନୀ ଦିଲ୍ଲୀରେ ଶୁକ୍ରବାର ଇସ୍ରାଏଲ ଦୂତାବାସ ସାମ୍ନାରେ ବିସ୍ଫୋରଣ ହୋଇଥିଲା । ଏହି ଘଟଣାରେ ଛାନଭିନ୍ ଆରମ୍ଭ ହୋଇଯାଇଛି । ପୋଲିସ ଏହାକୁ ମାମୁଲି ବିସ୍ଫୋରଣ କହିଥିଲେ ମଧ୍ୟ ତିନୋଟି କାର୍ କ୍ଷତିଗ୍ରସ୍ତ ହୋଇଛି । ଏଥିରେ କେହି ମୃତାହତ ହୋଇନଥିବା ସୂଚନା ମିଳିଛି । ତେବେ ଦିଲ୍ଲୀ ପୋଲିସକୁ ଏକ ଲଫାପା ମିଳିଛି । ଏହା ଇସ୍ରାଏଲ ଦୂତାବାସ ନାଁରେ ଆସିଛି । ଏଥିରେ ଲେଖାଯାଇଛି ଯେ, ଏହା ଏକ ଟ୍ରେଲର, ଆଗକୁ ଆହୁରି ଆକ୍ରମଣ ହୋଇପାରେ ।
ସୂତ୍ରାନୁସାରେ, ଏହି ଧମକପୂର୍ଣ୍ଣ ଚିଠିରେ ପ୍ରାଣ ହରାଇଥିବା ଇରାନ ସୈନ୍ୟମୁଖ୍ୟ ମେଜର ଜେନେରାଲ କାସିମ୍ ସୁଲେମାନୀର ନାଁ ଲେଖାଯାଇଛି । ସୁଲେମାନୀ ଇରାନର ସବୁଠାରୁ ଶକ୍ତିଶାଳୀ କମାଣ୍ଡର ଥିଲେ । ଆମେରିକା ଏକ ଡ୍ରୋନ ଆକ୍ରମଣରେ ତାକୁ ନିପାତ କରିଥିଲା । ଚିଠିରେ ସୁଲେମାନୀ ବ୍ୟତୀତ ଆଉଜଣଙ୍କ ନାଁ ଲେଖାଯାଇଛି । ଅନ୍ୟ ନାଁ ଏକ ବୈଜ୍ଞାନିକଙ୍କର ବୋଲି ଜଣାପଡିଛି । ଏଥିରେ ଇସ୍ରାଏଲ ରାଜଦୂତଙ୍କୁ ସମ୍ବୋଧିତ କରାଯାଇଛି । ପ୍ରତିଶୋଧପରାୟଣ ହୋଇ ଏପରି ବିସ୍ଫୋରଣ କରାଯାଇଥିବା ସନ୍ଦେହ କରାଯାଉଛି ।
ଏହା ଦ୍ୱିତୀୟ ଥର ହୋଇଛି ଯେତେବେଳେ ଇରାନ ଦୂତାବାସକୁ ଟାର୍ଗେଟ କରାଯାଇଛି । ଏହାପୂର୍ବରୁ ୨୦୧୨ରେ ଇସ୍ରାଏଲର ରାଷ୍ଟ୍ରଦୂତ ତେଲ୍ ୟେହୋସୁୟା ଓ ଭାରତୀୟ ଡ୍ରାଇଭର ଏକ ବିସ୍ଫୋରଣରେ ଆହତ ହୋଇଥିଲେ । ଏହା ମ୍ୟାଗ୍ନେଟିକ୍ ବ୍ଲାଷ୍ଟ୍ ଥିଲା । ଏଥିରେ ମୋଟ୍ ୪ଜଣ ଆହତ ହୋଇଥିଲେ । ଏହି ଘଟଣାରେ ଇସ୍ରାଏଲ ଇରାନକୁ ଦାୟୀ କରିଥିଲା ।
