ସତ୍ୟଶିଖା(ଭୁବନେଶ୍ୱର) ୧୩.୧୧.୨୦୨୧: ରାଜ୍ୟର ବିଭିନ୍ନ କଲେଜ ଓ ବିଶ୍ୱବିଦ୍ୟାଳୟଗୁଡ଼ିକରେ ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ନାମଲେଖା ପରେ ଖାଲିପଡ଼ିଥିବା ପିଜି ସିଟଗୁଡ଼ିକରେ ସ୍ପଟ ନାମଲେଖା ଲାଗି ଉଚ୍ଚଶିକ୍ଷା ପକ୍ଷରୁ ବିସ୍ତୃତ ଗାଇଡ୍ଲାଇନ ପ୍ରକାଶ ପାଇଛି । ଯେଉଁ ଛାତ୍ରଛାତ୍ରୀ ପ୍ରଥମ ଓ ଦ୍ୱିତୀୟ ପର୍ଯ୍ୟାୟରେ ଚୟନ ହୋଇ ନାମ ଲେଖାଇଥିବେ କିମ୍ବା ନାମ ନଲେଖାଇଥିବେ ସେମାନେ ସ୍ପଟ ନାମଲେଖା ପ୍ରକ୍ରିୟା ଲାଗି ଆବେଦନ କରିପାରିବେ । ଏହା ସହିତ ଯେଉଁ ପିଲାମାନେ କମନ ପିଜି ପ୍ରବେଶିକା ପରୀକ୍ଷା ଦେଇଥିବା ସତ୍ତ୍ୱେ ପ୍ରଥମ ଓ ଦ୍ୱିତୀୟ ପର୍ଯ୍ୟାୟରେ ଚୟନ ନହୋଇ ନାମଲେଖାରୁ ବଞ୍ଚିତ ହୋଇଥିବେ ସେମାନେ ମଧ୍ୟ ସ୍ପଟ ନାମଲେଖା ଲାଗି ଅନ୍ଲାଇନ ଆବେଦନ କରିପାରିବେ ।
୧୭ ତାରିଖ ଦିନ ୧୧ଟାରୁ ୨୧ ତାରିଖ ରାତି ୧୧.୪୫ ମିନିଟ ପର୍ଯ୍ୟନ୍ତ ଷ୍ଟୁଡେଣ୍ଟ ଲଗ୍ଇନ ଆଇଡିରୁ କମନ ଆପ୍ଲିକେସନ ଫର୍ମ ମିଳିବ । ସେହିଭଳି ୨୪ ତାରିଖ ସନ୍ଧ୍ୟା ୫ଟା ସମୟରେ ସ୍ପଟ ନାମଲେଖା ଲାଗି ଚୟନ ହୋଇଥିବା ପିଲାଙ୍କ ତାଲିକା ପ୍ରକାଶ ପାଇବ । ୨୫ ତାରିଖ ଦିନ ୧୧ଟାରୁ ୨୬ ତାରିଖ ସନ୍ଧ୍ୟା ୫ଟା ପର୍ଯ୍ୟନ୍ତ ଛାତ୍ରଛାତ୍ରୀ ଇଣ୍ଟିମେସନ ଲେଟର ପାଇବା ଲାଗି ଫି’ ଦାଖଲ କରିବେ । ୨୬ ତାରିଖରୁ ୨୯ ତାରିଖ ପର୍ଯ୍ୟନ୍ତ ଛାତ୍ରଛାତ୍ରୀ ଯେଉଁ କଲେଜ କିମ୍ବା ବିଶ୍ୱବିଦ୍ୟାଳୟରେ ନାମଲେଖା ଲାଗି ଇଣ୍ଟିମେସନ ଲେଟର ପାଇଥିବେ ସେଠାରେ ଫଟୋ କପି ଓ କମନ ଆପ୍ଲିକେସନ ଫର୍ମ ସହିତ ରିପୋର୍ଟିଂ କରି ନାମଲେଖାଇପାରିବେ ।
୩୦ ତାରିଖରେ ସ୍ପଟ ନାମଲେଖା ଡାଟା ଅପଡେଟ କରାଯିବ । ଯଦି ଧାର୍ଯ୍ୟସମୟ ମଧ୍ୟରେ କୌଣସି ପିଲା ନାମଲେଖାଇବାକୁ ନଆସନ୍ତି ତେବେ ଡିସେମ୍ବର ୩ତାରିଖ ଦିନ ୨ଟାରେ ପରବର୍ତ୍ତୀ ଅପେକ୍ଷାରତ ପିଲାଙ୍କ ତାଲିକା ପ୍ରକାଶ ପାଇବ । ସେମାନେ ୪ତାରିଖରୁ ୬ ତାରିଖ ମଧ୍ୟରେ ଫି’ ଦାଖଲ କରି ଇଣ୍ଟିମେସନ ଲେଟର ପାଇପାରିବେ । ୬ରୁ ୭ ତାରିଖ ମଧ୍ୟରେ ସେମାନଙ୍କ ନାମଲେଖା ଶେଷ ହୋଇ ୮ ତାରିଖରେ ସାମ୍ସ ପୋର୍ଟାଲରେ ଡାଟା ଅପଡେଟ କରାଯିବ ବୋଲି ଉଚ୍ଚଶିକ୍ଷା ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
