ସତ୍ୟଶିଖା (ଭୁବନେଶ୍ୱର) ୧୫/୦୨/୧୦୨୧ : ନନ୍ଦନକାନକ ବଟାନିକାଲ ଗାର୍ଡନ ପରିସରରେ ଥିବା ଜଙ୍ଗଲରେ ରବିବାର ଦିନ ଭୟାବହ ଅଗ୍ନିକାଣ୍ଡ ଘଟି ପ୍ରାୟ ୮ରୁ ୧୦ଏକର ଜଙ୍ଗଲ ଜମିରୁ ବୃକ୍ଷଲତା ଜଳି ଧ୍ବଂସ ହୋଇଯାଇଛି । ସୋମବାର ପରିବେଷବିତ୍ ଡା. ପ୍ରଦୀପ ତରେଇଙ୍କ ନେତୃତ୍ଵରେ ଏକ ଟିମ୍ ଏହି ସ୍ଥାନ ପରିଭ୍ରମଣ କରିବା ସହିତ ନଷ୍ଟ ହୋଇ ପଡିଥିବା ପରିବେଶ ପ୍ରତି ଚିନ୍ତା ପ୍ରକଟ କରିଛନ୍ତି ।
ରବିବାର ଦିନ ଦ୍ବିପ୍ରହରରେ ନନ୍ଦନକାନନରେ ଥିବା ରାଜ୍ୟ ଉଦ୍ଭିଦଉଦ୍ଯାନ ପରିସରରେ ଭୟାବହ ଅଗ୍ନିକାଣ୍ଡ ଘଟିଥିଲା । ଏଥିରେ ପ୍ରାୟ ୮ଏକର ଜଙ୍ଗଲ କ୍ଷତି ହେବା ସହିତ କେତେକ ଜୀବଜନ୍ତୁଙ୍କ ମୃତଦେହ ଠାବ କରାଯାଇଛି । ଅଧିକାଂଶ ଜୀବଜନ୍ତୁ ଆହାତ ଅବସ୍ଥାରେ ଘଞ୍ଚ ଜଙ୍ଗଲ ଭିତରକୁ ପସି ଯାଇଥିବା ସ୍ଥାନୀୟ ଲୋକେ ଆଶଙ୍କା କରୁଛନ୍ତି । ରବିବାର ଏକ ମୟୂରର ମୃତଦେହ ଠାବ ହୋଇଥିଲା । ଅଧିକ ମୃତାହତ ଜୀବଜନ୍ତୁଙ୍କ ଶରୀର ମିଳିବା ଆଶଙ୍କା କରି ରବିବାରଠାରୁ କର୍ମଚାରୀମାନେ ଖୋଜାଖୋଜି କରିଛନ୍ତି । ରବିବାରଠୁ ନିଆଁ ଲିଭା ସରିଥିବା ବେଳେ ଆଜି ମଧ୍ୟ କେତେକ ସ୍ଥାନରେ ନିଆଁ ଜଳୁଥିବା ଦେଖି ନିୟୋଜିତ କର୍ମଚାରୀମାନେ ଏହାକୁ ଲିଭାଇବା ପାଇଁ ଚେଷ୍ଟା କରିଛନ୍ତି ।
ସୋମବାର ଡା. ପ୍ରଦୀପ ତରେଇ ନିଜ ସଂଗଠନ ସହ ଏହି ସ୍ଥାନ ପରିଦର୍ଶନ କରିଛନ୍ତି । କର୍ତ୍ତୃପକ୍ଷ ନନ୍ଦନକାନନ ସୀମା ସୁରକ୍ଷା ପ୍ରତି ଗୁରୁତ୍ବଦେଉ ନଥିବା କଥା ଡା. ତରେଇ ଅଭିଯୋଗ କରିଛନ୍ତି । ଏଠାରେ ଥିବା ପାଚେରୀ ପୋତି ହୋଇଛି ବୋଲି ସେମାନେ ଅଭିଯୋଗ କରିଛନ୍ତି ।
ଏହି ଅଞ୍ଚଳକୁ ଗତ କିଛି ବର୍ଷ ହେଲା ଇକୋ ସେନସେଟିଭ ଜୋନ ଭାବେ ବିବେଚନା କରାଯାଇଛି । ଫଳରେ ଏହି ଅଞ୍ଚଳରେ ଗୃହ ନିର୍ମାଣ କରିବା ବାରଣ କରାଯାଇଛି । ଏହାର ଉଚ୍ଚସ୍ତରୀୟ ତଦନ୍ତ ହେବା ଆବଶ୍ୟକ ବୋଲି ଡା. ତରେଇ ଦାବି କରିଛନ୍ତି ।
