କେନ୍ଦ୍ର ସରକାରୀ କର୍ମଚାରୀ ଓ ପେନସନଭୋଗୀଙ୍କ ପାଇଁ ଖୁସି ଖବର

ସତ୍ୟଶିଖା (ନୂଆଦିଲ୍ଲୀ) ୨୦/୦୧/୨୦୨୧ : କେନ୍ଦ୍ର ସରକାରୀ କର୍ମଚାରୀଙ୍କୁ ଖୁସି ଖବର ଦେବାକୁ ଯାଉଛନ୍ତି କେନ୍ଦ୍ର ସରକାର । ଦରବୃଦ୍ଧିକୁ ଦେଖି ସରକାର ଖୁବ୍ ଶୀଘ୍ର ମହଙ୍ଗା ଭତ୍ତା ବୃଦ୍ଧି କରିବାକୁ ଯାଉଛନ୍ତି । ମହଙ୍ଗା ଭତ୍ତା ୪ ପ୍ରତିଶତ ବଢାଇବାକୁ ସରକାର ଯୋଜନା କରୁଥିବା କୁହାଯାଉଛି । ସରକାର ଏଭଳି ନିଷ୍ପତ୍ତି ନେଲେ ୫୦ ଲକ୍ଷ କର୍ମଚାରୀ ଏବଂ ୬୧ ଲକ୍ଷ ପେନସନଭୋଗୀ ଉପକୃତ ହେବେ ।

କରୋନା ଭାଇରସ୍ ସଂକ୍ରମଣ ଯୋଗୁଁ ଆର୍ଥିକ ମାନ୍ଦାବସ୍ଥାକୁ ଦେଖି ଅପ୍ରେଲ ୨୦୨୦ରୁ ମହଙ୍ଗା ଭତ୍ତା ବୃଦ୍ଧି କରିବା ଉପରେ ରୋକ୍ ଲଗାଇଥିଲେ ସରକାର । ମାତ୍ର ଏବେ ଅନେକ ରିପୋର୍ଟରେ ଏହା କୁହାଯାଉଛି ଯେ, ସରକାର ମହଙ୍ଗା ଭତ୍ତା ବଢାଇପାରନ୍ତି । କିନ୍ତୁ କେନ୍ଦ୍ର ସରକାରଙ୍କ ତରଫରୁ ଏହାକୁ ନେଇ ଔପଚାରିକ ଭାବେ କିଛି ଘୋଷଣା କରାଯାଇନାହିଁ ।ବର୍ତ୍ତମାନ କେନ୍ଦ୍ର ସରକାରୀ କର୍ମଚାରୀଙ୍କ ମହଙ୍ଗା ଭତ୍ତା ୧୭ ପ୍ରତିଶତ ରହିଛି । ସରକାର ପ୍ରତିଶ୍ରୁତି ଦେଇଥିଲେ ଯେ, ମହଙ୍ଗା ଭତ୍ତା ୪ ପ୍ରତିଶତ ବୃଦ୍ଧି କରିବେ । ମାତ୍ର କରୋନା ଭାଇରସ୍ ଯୋଗୁଁ ଏହାକୁ ଜୁଲାଇ ୨୦୨୧ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି । ମହାଙ୍ଗା ଭତ୍ତାର ହିସାବ ସପ୍ତମ ବେତନ କମିଶନ ଆଧାରରେ କରାଯିବ ।