ସତ୍ୟଶିଖା (ଭୁବନେଶ୍ୱର) ୨୯/୦୧/୨୦୧୧ : କ୍ରମାଗତ ଭାବେ ୫ ଦିନ ହେଲା ଦେଶର ସୁନା ଓ ରୁପା ଦର ହ୍ରାସ ପାଉଛି । ଏମ୍ସିଏକ୍ସ ବା ମଲ୍ଟି କମୋଡିଟି ଏକ୍ସଚେଞ୍ଜରେ ସୁନା ଦର ଆଜି ୦.୩୩ ପ୍ରତିଶତ ହ୍ରାସ ଘଟି ୧୦ ଗ୍ରାମ ପିଛା ୪୮,୭୦୨ ଟଙ୍କା ରହିଛି । ସେହିଭଳି ରୁପା ଦାମ ୧ ପ୍ରତିଶତ ହ୍ରାସ ଘଟି କିଲୋ ପିଛା ୬୫,୮୬୬ ଟଙ୍କା ରହିଛି । ଗତକାଲି ସୁନା ଦାମରେ ୦.୧୧ ପ୍ରତିଶତ ଏବଂ ରୁପା ଦାମରେ ୦.୬୪ ପ୍ରତିଶତ ହ୍ରାସ ଘଟିଥିଲା । ଗତ ଅଗଷ୍ଟ ମାସରେ ସୁନା ଦାମ ରେକର୍ଡ ୫୬,୩୦୦ ଟଙ୍କା ଛୁଇଁଥିଲା । ତେଣୁ ସେହି ମୂଲ୍ୟ ତୁଳନାରେ ସୁନା ଦାମ୍ ଏବେ ପ୍ରାୟ ୭୫୦୦ ଟଙ୍କା କମ୍ ରହିଛି ।
ଅନ୍ତର୍ଜାତୀୟ ବଜାରରେ ମଧ୍ୟ ଆଜି ସୁନା ଦର ୦.୩ ପ୍ରତିଶତ ହ୍ରାସ ଘଟି ଆଉନ୍ସ ପିଛା ୧୮୩୯.୨୧ ଡଲାର ରହିଛି । ରୁପା ଦର ମଧ୍ୟ ୦.୨ ପ୍ରତିଶତ ହ୍ରାସ ଘଟି ଆଉନ୍ସ ପିଛା ୨୫.୧୮ ଡଲାର ଥିବାବେଳେ ପ୍ଲାଟିନମ୍ ଦର ୦.୨ ପ୍ରତିଶତ ହ୍ରାସ ଘଟି ୧୦୬୩.୭୬ ଡଲାର ରହିଛି । ତେବେ ୨୦୨୦ ମସିହାରେ ବିଶ୍ୱରେ ସୁନା ଚାହିଦା ଗତ ୧୧ ବର୍ଷ ମଧ୍ୟରେ ସବୁଠୁ କମ୍ ରହିଛି ବୋଲି ୱାର୍ଲଡ ଗୋଲ୍ଡ କାଉନସିଲ୍ ରିପୋର୍ଟରୁ ଜଣାଯାଇଛି। ଗତବର୍ଷ ବିଶ୍ୱରେ ସୁନା ଚାହିଦା ୨୦୧୯ ତୁଳନାରେ ୧୪ ପ୍ରତିଶତ ହ୍ରାସ ଘଟି ୩୭୫୯.୬ ଟନ୍ ରହିଛି । ୨୦୦୯ ମସିହା ଠାରୁ ପ୍ରଥମ ଥର ପାଇଁ ସୁନା ଚାହିଦା ୪ ହଜାର ଟନ୍ ତଳେ ରହିଛି । ଭୁବନେଶ୍ୱରରେ ମଧ୍ୟ ସୁନା ଓ ରୁପା ଦର କମିଛି। ଗତ ସପ୍ତାହକ ମଧ୍ୟରେ ୨୨ କ୍ୟାରେଟ୍ ସୁନା ଦର ପାଖାପାଖି ୧୩୦୦ ଟଙ୍କା ହ୍ରାସ ପାଇଛି । ଗୁରୁବାର କେତେକ ପ୍ରମୁଖ ସୋ’ରୁମ୍ରେ ସୁନା ଦର ୧୦ ଗ୍ରାମ ପିଛା ୪୮୯୮୦ ଟଙ୍କା ରହିଥିବାବେଳେ ରୁପା ଦର ୧୦ ଗ୍ରାମ ପିଛା ୭୦୦ ଟଙ୍କା ରହିଛି ।
