ସତ୍ୟଶିଖା (ନୂଆଦିଲ୍ଲୀ) ୧୫/୦୨/୧୦୨୧ : କରୋନା ମହାମାରୀ ଓ ଲକଡାଉନ ଯୋଗୁଁ ସବୁ କ୍ଷେତ୍ରରେ ମାନ୍ଦାବସ୍ଥା ଦେଖା ଦେଇଥିଲା । ଫଳରେ ସୁନା ରୁପା ଦାମ ମଧ୍ୟ ଆକାଶଛୁଆଁ ହୋଇଥିଲା । ଲକଡାଉନ କୋହଳ ହେବାପରେ ଗତ ଅଗଷ୍ଟ ମାସରେ ସୁନା ରୁପା ଦାମ ସର୍ବୋଚ୍ଚ ସ୍ଥରରେ ପହଞ୍ଚିଥିଲା । ଏହାପରେ ସ୍ଥିତି ସୁଧାରିବାକୁ ନିବେଶକ ଅନ୍ୟ ବିକଳ୍ପ ଖୋଜିବା ଆରମ୍ଭ କରିଥିଲେ । କରୋନା ଭ୍ୟାକସିନ ଓ ଟୀକାକରଣ ଅଭିଯାନ ଆରମ୍ଭ ହେବାପରେ ସୁନା ରୁପା ଦାମ ହ୍ରାସ ପାଇଥିଲା । ଅଗଷ୍ଟରୁ ଏବେ ସୁଦ୍ଧା ସୁନା ରୁପା ଦାମ ପାଖାପାଖି ୧୦ ହଜାର ଟଙ୍କା ହ୍ରାସ ପାଇଛି । ୧୦ ଗ୍ରାମ ସୁନା ଦାମ ୧୦ ହଜାର କମିଥିବାବେଳେ ରୁପା କିଲୋ ପ୍ରତି ପାଖାପାଖି ୧୦ ହଜାର କମିଛି ।
ଗତ ଅଗଷ୍ଟ ମାସରେ ୧୦ ଗ୍ରାମ ସୁନା ଦାମ ୫୬ ହଜାର ୨୦୦ ଟଙ୍କା ହୋଇଥିଲା । ରୁପା କିଲୋ ପ୍ରତି ସର୍ବୋଚ୍ଚ ୭୭ ହଜାର ୮୪୦ ଟଙ୍କା ହୋଇଥିଲା । ଫେବୃଆରୀ ୧୩ ତାରିଖରେ ଦିଲ୍ଲୀ ବଜାରରେ ସୁନା ଦାମ ୪୬ ହଜାର ୩୯୦ ଟଙ୍କାରେ ପହଞ୍ଚିଥିଲା । ରୁପା କିଲୋ ପ୍ରତି ୬୭ ହଜାର ୮୯୪ ଟଙ୍କା ହୋଇଛି । ଗତ କିଛି ବର୍ଷ ହେଲା ସୁନା ରୁପା ଦାମ ଲଗାତାର ବଢ଼ିବାରେ ଲାଗିଛି ।
୧୩ ତାରିଖରେ ସୁନା ଦାମ ୧୦ ଗ୍ରାମକୁ ୪୫୭ ଟଙ୍କା ହ୍ରାସ ପାଇ ୪୬ ହଜାର ୩୯୦ରେ ପହଞ୍ଚିଥିଲା । ରୁପା କିଲୋ ପ୍ରତି ୩୪୭ ଟଙ୍କା ହ୍ରାସ ପାଇ ୬୭ ହଜାର ୮୯୪ ଟଙ୍କା ହୋଇଛି । ସୋମବାର ଦିନ ୨୪ କ୍ୟାରେଟ ସୁନା ଦାମ ୪୭ ହଜାର ୩୩୨ ଟଙ୍କାରେ ପହଞ୍ଚିଛି । ରୁପା ୬୯ ହଜାର ୪୨୪ ଟଙ୍କାରେ ପହଞ୍ଚିଛି । ୨୨ କ୍ୟାରେଟ୍ ସୁନା ଦାମ ୪୩ ହଜାର ୪୦୬ ଟଙ୍କା ରହିଛି । ଇଣ୍ଡିଆ ବୁଲିୟନ ଆଣ୍ଡ ଜ୍ୱେଲର୍ସ ଆସୋସିଏସନ ଦ୍ୱାରା ଜାରି ହୋଇଥିବା ଏହି ଦାମ ସହ ଆପଣଙ୍କ ସହରରେ ସୁନା ରୁପା ଦାମରେ ୫୦୦ ରୁ ହଜାରେ ଟଙ୍କା ଅନ୍ତର ହୋଇପାରେ ।
