ସତ୍ୟଶିଖା ୧୩ .୦୮.୨୦୨୦ : ସାରା ଦେଶରେ ପାଳନ ହେଉଛି ଭଗବାନ କୃଷ୍ଣଙ୍କ ଜନ୍ମ ଉତ୍ସବ । ମଥୁରାରୁ ଦ୍ଵାରିକା ଯାଏଁ ଚାଲିଆଡ଼େ ଖୁସୀର ମାହୋଲ । ମନ୍ଦିର ଗୁଡ଼ିକରେ ପୂଜାର୍ଚ୍ଚନା କରାଯାଉଛି । ଶ୍ରଦ୍ଧାଳୁମାନେ ସେମାନଙ୍କ ଘରେ କୃଷ୍ଣଙ୍କ ଝୁଲଣା ସଜାଇ ଜନ୍ମୋତ୍ସବ ପାଳନ କରୁଛନ୍ତି । ତେବେ ଚଳିତ ବର୍ଷ କରୋନା ମହାମାରୀ ସଙ୍କଟ ଉପୁଜିଥିବାରୁ କୋଭିଡ କଟକଣା ମାନି ସାମାଜିକ ଦୂରତ୍ଵ ରକ୍ଷା କରି ନୂଆ ଅନ୍ଦାଜରେ ପାଳନ ହେଉଛି ଶ୍ରୀକୃଷ୍ଣ ଜନ୍ମୋତ୍ସବ । ଚଳିତ ବର୍ଷ ବହୁ ମନ୍ଦିରରେ ଭକ୍ତଙ୍କ ପ୍ରବେଶ ଉପରେ କଟକଣା ଲାଗିଛି । ତେବେ ଭକ୍ତମାନଙ୍କ ପାଇଁ ବହୁ ମନ୍ଦିରରେ ଅନଲାଇନ ଦର୍ଶନ ବ୍ୟବସ୍ଥା କରାଯାଇଛି । ଭକ୍ତମାନେ ମଧ୍ୟ ବୁଝି ସାରିଛନ୍ତି ଯେତେବେଳେ ପରିସ୍ଥିତି ଉତ୍କଟ ରହିବ ସେହି ସମୟରେ ଦର୍ଶନ ଓ ପୂଜାର ଉପାୟ ପରିବର୍ତ୍ତନ ହେବା ଜରୁରୀ । ଦିଲ୍ଲୀରେ ଦ୍ଵାରିକା ଯାଏଁ ମଥୁରାରୁ ନୋଏଡା ଯାଏଁ କୃଷ୍ଣ ମନ୍ଦିର ଗୁଡ଼ିକୁ ବେଶ୍ ମନଲୋଭା କରି ସଜାଯାଇଛି ।
ଇତିହାସରେ ପ୍ରଥମ ଥର ପାଇଁ ଦ୍ଵାରିକାଧୀଶ ମନ୍ଦିରରେ ଭକ୍ତଙ୍କୁ ଜନ୍ମାଷ୍ଟମୀ ଅବସରରେ ମନ୍ଦିରରେ ଦର୍ଶନ କରିବାକୁ କଟକଣା ଲଗାଯାଇଛି । ଦ୍ଵାରିକାଧୀଶ ମନ୍ଦିର ଟ୍ରଷ୍ଟ ଜରିଆରେ ଜନ୍ମାଷ୍ଟମୀ ପର୍ବର ସିଧାପ୍ରସାରଣ ବ୍ୟବସ୍ଥା କରାଯାଇଛି । ଭଗବାନ କୃଷ୍ଣଙ୍କ ଜନ୍ମଦିବସ ପ୍ରତି ବର୍ଷ ଭାଦ୍ରବ ମାସ କୃଷ୍ଣ ପକ୍ଷ ଅଷ୍ଟମୀ ତିଥିରେ ପଡେ। ଏହି ଦିନ ଭଗବାନ କୃଷ୍ଣଙ୍କ ଜନ୍ମ ହୋଇଥିଲା । ଭାଦ୍ରବ ମାସ କୃଷ୍ଣ ପକ୍ଷ ଷଷ୍ଠୀ ତିଥିରେ ଭଗବାନ ବଳଭଦ୍ରଙ୍କ ଜନ୍ମ ହୋଇଥିଲା । ଶ୍ରୀମଦଭାଗବତ ଗୀତାରେ ଉଲ୍ଲେଖ ରହିଛି ଯେ, ଭଗବାନ କୃଷ୍ଣଙ୍କ ଜନ୍ମ ରୋହିଣୀ ନକ୍ଷତ୍ରରେ ହୋଇଥିଲା ।
