

ସତ୍ୟଶିଖା (ଢେଙ୍କାନାଳ) ୧୨.୦୩.୨୦୨୨: ଆହତ ଦନ୍ତାହାତୀ ଆକ୍ରମଣରେ ବନ କର୍ମଚାରୀଙ୍କ ମୃତ୍ୟୁ । ଢେଙ୍କାନାଳ ସଦର ବନାଞ୍ଚଳରେ ଏଭଳି ଘଟଣା ଘଟିଥିବା ସୂଚନା ମିଳିଛି । ମୃତକ ଜଣଙ୍କ ହେଉଛନ୍ତି ଏଲିଫ୍ୟାଣ୍ଟ ସ୍କ୍ୱାର୍ଡ ବିଶ୍ୱରଞ୍ଜନ ପାଣିଗ୍ରାହୀ । ପ୍ରଥମେ ଗୁରୁତର ଅବସ୍ଥାରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ପରେ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି ।
ସୂଚନାଅନୁଯାୟୀ ବିଶ୍ୱରଞ୍ଜନ ଢେଙ୍କାନାଳ ସଦର ରେଞ୍ଜ ଅଧୀନରେ କାମ କରୁଥିଲେ । ଗତକାଲି ସଦର ବନାଞ୍ଚଳର ଗହମଖୁଣ୍ଟି ଗ୍ରାମ ନିକଟସ୍ଥ ଟିକିଲି ବନ୍ଧ ନିକଟରେ ବୁଲୁଥିବା ଏକ ଆହତ ଦନ୍ତା ହାତୀକୁ ଜଗିଥିଲେ ବିଶ୍ୱରଞ୍ଜନ । ତେବେ ଦନ୍ତାହାତୀଟି ବିଶ୍ବରଞ୍ଜନଙ୍କୁ ଆକ୍ରମଣ କରି ଟେକି କଚାଡି ଦେବାରୁ ଗୁରୁତର ଅବସ୍ଥାରେ ତାଙ୍କୁ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।ମାତ୍ର ଗତ ରାତିରେ ତାଙ୍କୁ କଟକ ଏସସିବିକୁ ସ୍ଥାନାନ୍ତରିତ କରାଯାଇଥିବାବେଳେ ବିଳମ୍ବିତ ରାତିରେ ତାଙ୍କର ମୃତ୍ୟୁ ଘଟିଥିବା ଖବର ମିଳିଛି ।
ଦନ୍ତା ହାତୀଟିର ଡାହାଣ ଗୋଡ଼ରେ ଗଭୀର କ୍ଷତ ଯୋଗୁଁ ହାତୀଟି ଟିକିଲି ପୋଖରୀ ପାଖରେ ଠିଆ ହୋଇ ରହିଥିଲା । ଶିକାରୀଙ୍କ ଗୁଳିମାଡରେ ଏହି ଦନ୍ତା ଆହତ ହୋଇଥିବା ଅନୁମାନ କରାଯାଇଥିଲା । ଏନେଇ ଖବର ପ୍ରସାରଣ ପରେ ବନବିଭାଗ ହାତୀର ଚିକିତ୍ସା ପାଇଁ ପଦକ୍ଷେପ ଆରମ୍ଭ କରିଥିଲା । ତେବେ ହାତୀକୁ ଜଗିବା ପାଇଁ ବନକର୍ମଚାରୀ ମାନଙ୍କୁ ପଠାଇଥିଲା ବନବିଭାଗ । ଏହି ବନକର୍ମଚାରୀଙ୍କ ମଧ୍ୟରେ ଏଲିଫ୍ୟାଣ୍ଟ ସ୍କ୍ୱାର୍ଡ ବିଶ୍ୱରଞ୍ଜନ ପାଣିଗ୍ରାହୀ ମଧ୍ୟ ସାମିଲ ଥିଲେ।