ସତ୍ୟଶିଖା ୨୭ . ୦୮.୨୦୨୦ : ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ବୈତରଣୀରେ ଦେଖାଦେଇଛି ବନ୍ୟା ପରିସ୍ଥିତି । ଭଣ୍ଡାରିପୋଖରୀ ଓ ଧାମନଗର ବ୍ଲକର ବିଭିନ୍ନ ପଞ୍ଚାୟତରେ ବନ୍ୟା ଜଳ ପ୍ରବେଶ କରିଛି । ଭଣ୍ଡାରିପୋଖରୀ ମାଳଦା ନିକଟରେ ଥିବା ଶରତା ପୋଲ ଉପରେ 5 ଫୁଟର ବନ୍ୟା ଜଳ ପ୍ରବାହିତ ହେଉଥିବାରୁ, ଭଣ୍ଡାରିପୋଖରୀ- ଯାଜପୁର ଟାଉନ କୁ ଯୋଗାଯୋଗ ବିଛିନ୍ନ ହୋଇଛି । ସେହିପରି ଧାମନଗର ଦୋବଲ ନିକଟରେ ରାସ୍ତା ଉପରେ ପାଣି ଚାଲୁଥିବାରୁ, ଧାମନଗର- ଯାଜପୁର କୁ ଯୋଗାଯୋଗ ବିଛିନ୍ନ ହୋଇଛି ।
ମୁଖ୍ୟତଃ ଭଣ୍ଡାରିପୋଖରୀ କଣ୍ଟି ଘାଇ ଓ ବାଲି ପୋଖରୀ ଏସକେପ ଦ୍ୱାରା ବନ୍ୟା ଜଳ ପ୍ରବେଶ କରି ଜନ ବସତିକୁ ପାଣି ମାଡିଚାଲିଛି । ଭଣ୍ଡାରୀପୋଖରୀ ର ନପଙ୍ଗ, ଷୋଳମପୁର, କୂରିଗାଁ, ମାଳଦା, ରହଣିଆ, ରଣଜିତ, ବାଲି ପୋଖରୀ ପଞ୍ଚାୟତ ସମେତ ଆହୁରି ଅନେକ ଗାଁ ମାନଙ୍କରେ ପାଣି ପଶିଯାଇଛି । ଏପରିକି ଲୋକଙ୍କ ଘରେ ପାଣି ପଶିଥିବାର ସୂଚନା ମିଳିଛି । ସେହିପରି ଧାମନଗର ବ୍ଲକ ର ବିଭିନ୍ନ ଏସକେପ ଦ୍ୱାର ବନ୍ୟା ଜଳ ପ୍ରବେଶ କରିବାରୁ, ଉକ୍ତ ବ୍ଲକର ପଧାନି, ସୋହଡା, କରଦା, ଦୋବଲ, ଦିହୁଡ଼ି ଆନନ୍ଦପୁର, ହସନାବାଦ ପଞ୍ଚାୟତ ସହ ଅନେକ ଗାଁ ରେ ବନ୍ୟାଜଳ ପଶିଛି । ବୈତରଣୀ ର ତଳ ମୁଣ୍ଡରେ ବନ୍ୟା ଆସିବାରୁ ଅନେକ ଗାଁ ଜଳବନ୍ଦୀ ଘେରରେ ରହିଥିବା ବେଳେ ଅନେକ ଚାଷ ଜମି ଜଳମଗ୍ନ ହୋଇଛି ।
