ସତ୍ୟଶିଖା (ଭଞ୍ଜନଗର) ୧୭.୦୫.୨୦୨୨: ଗଞ୍ଜାମ ଜିଲ୍ଲା ଗାଙ୍ଗପୁର ଥାନା ଅନ୍ତର୍ଗତ ବୁଢ଼ାକେନ୍ଦୁ ଜଙ୍ଗଲରୁ ଜଣେ ଅଗ୍ନିଶମ କର୍ମଚାରୀଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଛି । ଆସିକା ଅଗ୍ନିଶମ କେନ୍ଦ୍ରରେ ହାବିଲଦାର ଭାବେ କାର୍ଯ୍ୟରତ ଥିବା ଦୟାନିଧି ମହନ୍ତ ନାମକ ଜଣେ ବ୍ୟକ୍ତି ଆତ୍ମହତ୍ୟା କରିଛନ୍ତି । ମିଳିଥିବା ସୂଚନାଅନୁଯାୟୀ, ଏକ ସୁଇସାଇଡ ନୋଟ୍ ଲେଖି ଗଛରେ ରଶି ଲଗାଇ ଆତ୍ମହତ୍ୟା କରିଛନ୍ତି ଦୟାନିଧି । ଦୟାନିଧିଙ୍କ ମୃତଦେହ ନିକଟରେ ଏକ ବ୍ୟାଗ ପଡିଥିଲା । ଏହି ବ୍ୟାଗରୁ ଦୁଇ ପୃଷ୍ଠାର ସୁଇସାଇଡ୍ ନୋଟ୍କୁ ଜବତ କରିଛି ପୁଲିସ ।
ଦୟାନିଧି ସୁଇସାଇଡ୍ ନୋଟରେ ସେ ଅନେକ କଥା ଲେଖିଥିବା ଜଣାଯାଇଛି । “ମାନନୀୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଜୀ ଓ ୟୁ.ପି ମୁଖ୍ୟମନ୍ତ୍ରୀ ଯୋଗୀ ଜୀ । ନିବେଦନର ଅଭିପ୍ରାୟ ଏହି କି ଯେ ମୁଁ ଦୟାନିଧି ମହନ୍ତ, ଆସିକା ଅଗ୍ନିଶମ କେନ୍ଦ୍ରରେ ଡ୍ରାଇଭର ହାବିଲଦାର ଭାବେ କାର୍ଯ୍ୟରତ ।
ମୁଁ ଦୁଇ ବର୍ଷ ହେବ ମାନସିକ ଚାପରେ ରହୁଥିଲି । ଛୁଟି ପାଇଁ ବାରମ୍ବାର ଆବେଦନ କରୁଥିଲେ ମଧ୍ୟ ଉପରିସ୍ଥ ଅଧିକାରୀ ଛୁଟି ମଞ୍ଜୁର କରୁ ନଥିଲେ । ଘର ନିକଟରେ ଚାକିରି ପାଇଁ ଆବେଦନ କରିଥିଲି । ହେଲେ ଘରଠାରୁ ୫୦୦ କି.ମି ଦୂରରେ ମୋତେ ଚାକିରି ଦିଆଯାଇଥିଲା । ଯାହାଫଳରେ ମୁଁ ପରିବାର ଲୋକଙ୍କୁ ସମୟ ଦେଇପାରୁ ନଥିଲି । ଛୁଟି ମିଳୁ ନ ଥିବାରୁ ଘରକୁ ଯାଇପାରୁ ନ ଥିଲି । ମୋ ସ୍ତ୍ରୀ ମୋତେ ଛାଡି ପଳାଇଛି । ବାପାମା’ଙ୍କର ମୃତ୍ୟୁ ହୋଇଯାଇଛି । ଏହି ଚାକିରି କରି କି ଲାଭ?”
ଗତକାଲି ରାତିରେ ବୁଢାକେନ୍ଦୁ ରାସ୍ତା ଉପରେ ଅଗ୍ନିଶମ ଗାଡି ରହିଥିବା ସ୍ଥାନୀୟ ଲୋକ ଦେଖିଥିଲେ । ତେବେ ଆଜି ସକାଳେ ବୁଢାକେନ୍ଦୁ ଜଙ୍ଗଲରେ ଏକ ଗଛରେ ଦୟାନିଧିଙ୍କ ଝୁଲନ୍ତା ମୃତଦେହ ଦେଖି ସ୍ଥାନୀୟ ଲୋକ ପୁଲିସକୁ ଖବର ଦେଇଥିଲେ । ପୁଲିସ ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି । ଗାଙ୍ଗପୁର ପୁଲିସ ଘଟଣାର ତଦନ୍ତ କରୁଛି । ଗାଙ୍ଗପୁର ପୁଲିସ ଓ ଭଞ୍ଜନଗର ଅଗ୍ନିଶମ କର୍ମଚାରୀ ପହଞ୍ଚି ତଦନ୍ତ ଜାରି ରଖିଛନ୍ତି ।
