ସତ୍ୟଶିଖା( ରାୟଗଡ଼ )୧୯ .୦୭. ୨୦୨୨: ରାୟଗଡ଼ ଜିଲ୍ଲାର କାଶୀପୁର ଅଞ୍ଚଳରେ ଝାଡ଼ାବାନ୍ତି ନୁହେଁ ହଇଜା ବ୍ୟାପିଥିବା ସ୍ପଷ୍ଟ ହୋଇଛି। ଏହା ‘ଭିବ୍ରିଓ କଲେରା’ ବୋଲି ଜଣାପଡ଼ିଛି। ଗତ ୫ ଦିନ ଧରି ଜାରି ରହିଥିବା ଅନୁଧ୍ୟାନ ସହ ନମୁନା ପରୀକ୍ଷଣ କରି ଏହି ରିପୋର୍ଟ ଦେଇଛି RMRC। ସାମ୍ବାଦିକ ସମ୍ମିଳନୀ କରି ଏହି ସୂଚନା ଦେଇଛନ୍ତି ରାୟଗଡ଼ା ଜିଲ୍ଲାପାଳ। ଶେଷଥର ୨୦୧୭ ମସିହାରେ ଏହି ରୋଗ ଚିହ୍ନଟ ହୋଇଥିବା ବେଳେ ୫ ବର୍ଷ ପରେ ଏବେ ପୁଣି ଥରେ ଏହା ମୁଣ୍ଡ ଟେକିଛି।
ଯାହାର ଲକ୍ଷଣ ବାହାରୁଛି ତାଙ୍କୁ ତୁରନ୍ତ ଆଡମିଶନ କରାଯାଉଛି। ଠିକ୍ ସମୟରେ ଚିକିତ୍ସା ଆରମ୍ଭ ହେଲେ ଶୀଘ୍ର ସୁସ୍ଥ ହୋଇପାରିବେ ରୋଗୀ। ତାସହ ହେଲପ୍ ଲାଇନ୍ ନଂ ୯୪୩୭୪୪୮୭୪୭ ଜାରି କରାଯାଇଛି। ଅସୁସ୍ଥମାନେ ନିଜେ ହସ୍ପିଟାଲ ଆସି ନ ପାରିଲେ ତୁରନ୍ତ ଏହି ନମ୍ବରରେ ଫୋନ୍ କଲେ ସେମାନଙ୍କୁ ଆମ୍ବୁଲାନ୍ସ ଯୋଗେ ହସ୍ପିଟାଲ ଅଣାଯିବା ବ୍ୟବସ୍ଥା କରାଯିବ ବୋଲି କହିଛନ୍ତି ଜିଲ୍ଲାପାଳ।
ଏହାବାଦ କାଶୀପୁର ଅଞ୍ଚଳରେ ଥିବା ସବୁ ପାନୀୟ ଜଳର ପରୀକ୍ଷା କରାଯାଉଛି। ଏହି ରିପୋର୍ଟ ଆସନ୍ତା ୨ରୁ ୩ ଦିନ ଭିତରେ ଆସିଯିବ। ସେ ପର୍ଯ୍ୟନ୍ତ ଉକ୍ତ ପାଣି ପିଇବାକୁ ଗାଁ ଲୋକଙ୍କୁ ବାରଣ କରାଯାଇଛି। ପ୍ରତି ଗାଁକୁ ଟ୍ୟାଙ୍କର ଯୋଗେ ଦିନକୁ ୨ରୁ ୩ ଥର ପାନୀୟ ଜଳ ଯୋଗାଇ ଦିଆଯାଉଛି ବୋଲି ଜିଲ୍ଲାପାଳ ସୂଚନା ଦେଇଛନ୍ତି।
ସୂଚନାଯୋଗ୍ୟ, ‘ଭିବ୍ରିଓ କଲେରା’ ପ୍ରଥମେ କାଶୀପୁରରେ ୨୦୦୭ରେ ଚିହ୍ନଟ ହୋଇଥିଲା। ଏହାପରେ ୨୦୧୦ ଓ ୨୦୧୨ ଓ ୨୦୧୭ରେ ବି ଚିହ୍ନଟ ହୋଇଥିଲା। ଏବେ ପୁଣି ଥରେ ଦୀର୍ଘ ୫ ବର୍ଷ ପରେ ଏହି ରୋଗ ବ୍ୟାପି ଏ ପର୍ଯ୍ୟନ୍ତ ୭ ଜଣଙ୍କ ଜୀବନ ଯାଇ ସାରିଲାଣି।
